MATHAÏOS 18 - KA BAIBL

Uei uba kham khraw?

¹ Mynkata ki synran ki la ïawan ha U Jisu, ki da ong, “Uei uba kham khraw te ha ka hima ki bneng?”

² Te haba U Jisu u la khot ïa u khynnah, U la buh ïa u hapdeng jong ki,

³ bad u la ong, “Shisha nga ong ha phi, lada phim kylla, bad phim long ruh kum ki khynnah, phin ym leit bsut ha ka hima ki bneng.

⁴ Namar kata, uno uno ruh u ban pynrit ïa lade kum une u khynnah, uta u long uba kham khraw ha ka hima ki bneng;

⁵ uno uno ruh u ban pdiang te ïa iwei i khynnah kum ine ha ka kyrteng jong nga, u pdiang ïa nga.

Shaphang ki jingjynthut

⁶ “Uno uno ruh u ban pynthut te ïa iwei na kine ki barit kiba ngeit ha nga, ka la kham bha ïa u ba yn teh ïa u mawtylliat bakhraw ha ka ryndang jong u, bad ba yn pynngam jyllop ïa u ha kaba jylliew ka duriaw.

⁷ “Kordit ïa ka pyrthei namar ki jingjynthut! naba donkam ïa kita ki jingjynthut ban wan shisha, hynrei, kordit ïa uta u briew na uba wan kata ka jingjynthut!

⁸ Te lada ka kti jong me lane ka kjat jong me ka pynthut ïa me, to ot noh ïa ka, to bred noh ruh na me; ka kham bha ïa me ban leit bsut dkoh ne kynriang sha ka jingim, ban ïa kaba ïoh ar tylli ki kti ne ar tylli ki kjat, bad ban bred ïa me ha ka ding bymjukut.

⁹ Bad lada ka khmat jong me ka pynthut ïa me, to khlaw noh ïa ka, to bred noh ruh na me; ka kham bha ïa me ban leit bsut sha ka jingim tang kawei ka khmat, ban ïa kaba ïoh ar tylli ki khmat, bad ban bred ïa me ha ka dujok ding.

Ka pharshi shaphang ka langbrot ba la jah noh

¹⁰ “To sumar ba phin ym ibeiñ ïa iwei na kine ki barit; naba nga ong ha phi, ba ki angel jong ki ha bneng, ki ïohi ha la ka sngi ïa ka khmat U Kpa jong nga uba ha bneng.

¹¹ Naba U Khun u briew u la wan ban pynim ïa kaba la jot.

¹² Phi mut kumno? Lada u briew u la don shispah ki langbrot, te lada kawei na ki ka leit sakma, um iehnoh sah ïa ki khyndaiphew khyndai, bad leit sha lum ban wad ïa kata kaba la sakma?

¹³ Te lada ka jia ïa u ban shem ïa kata, shisha nga ong ha phi, ba u kham kmen namar kata, ban ïa namar kita ki khyndaiphew khyndai ki bym shym la leit sakma.

¹⁴ Kumta, kam long ka mon U Kpa jong phi uba ha bneng, ba in jah noh iwei na kine ki barit.

Shaphang u paralok uba leh pop

¹⁵ “Lada u paralok jong me u leh pop ïa me, to khie leit, bad sneng ïa u haba don tang ma u bad me hi: lada un sngew ïa me, me la pynbha ïa u paralok jong me.

¹⁶ Te lada um sngew, to shim lem bad me ïa uwei ne ar ngut kiwei pat, ba da ka shyntur ar ngut ne lai ngut ki sakhi yn pynskhem ïa ka ktien baroh.

¹⁷ Te lada um treh ban sngew ïa kita, to ïathuh ha ka balang; te lada um treh ban sngew ïa kata ka balang ruh, to ai un long ïa me kum u Jentil bad u nongkhrong.

Kaba teh bad kaba pyllait

¹⁸ “Shisha nga ong ha phi, ïa kiei kiei ruh kat kiba phin teh ha ka khyndew yn teh ïa ki ha bneng, bad ïa kiei kiei ruh kat kiba phin pyllait ha ka khyndew yn pyllait ïa ki ha bneng.

¹⁹ Pat nga ong ha phi, ba lada ar ngut na phi kin ïakut lem ha ka khyndew shaphang kaei kaei ruh ïa kaba kin ïapan, kan long ïa ki na U Kpa jong nga uba ha bneng.

²⁰ Naba ha kaba don ar ngut ne lai ngut kiba la ïaseng ha ka kyrteng jong nga, hangta nga don hapdeng jong ki.”

Ka pharshi u shakri bymman

²¹ Ynda kumta, u la wan u Petros ha U, bad u la ong, “Ko Trai, katno sien ba u paralok jong nga un leh pop ïa nga, bad ba ngan map ïa u? haduh hynñiew sien?”

²² U Jisu u la ong ha u, “Ngam ong ha me haduh hynñiew sien, hynrei, haduh hynñiewphew sien hynñiew!

²³ “Namar kata, ïa ka hima ki bneng yn tharai kum uwei u syiem, uba la mon ban ïakheiñ bad ki shakri jong u.

²⁴ Haba u la sdang te ban kheiñ, la wallam ha u ïa uwei ha uba u shah shiphew hajar ki talent.

²⁵ Hynrei, haba um don ban siew, u kynrad jong u, u la hukum ban die noh ïa u, bad ïa ka tnga jong u, bad ïa ki khun, bad ïa kiei kiei baroh kat kiba u don, ban siew noh ïa kata ka ram.

²⁶ Namar kata, uta u shakri haba u la dem u la mane ïa u, u da ong, ‘Ko kynrad, to ïaishah ïa nga, te ngan siew baroh ïa me’.

²⁷ U kynrad uta u shakri haba u la sngewsynei te, u la pyllait ïa u, bad u la map ïa kata ka ram ïa u.

²⁸ Te haba uta u shakri u la mih noh, u la shem ïa uwei na ki para shakri jong u ha uba u la shah shispah suka, bad u la kem ïa u na ka ryndang, u da ong, ‘Ai ïa nga ïa kaba nga la shah!’

²⁹ Namar kata, uta u para shakri jong u haba u la dem ha ki kjat jong u, u la kyrpad ïa u, u da ong, ‘To ïaishah ïa nga, te ngan siew ïa me.’

³⁰ U te um shah; hynrei, u la leit bred ïa u ha ka byndi, tad ynda un siew ïa kata ka ram.

³¹ Haba ki para shakri jong u ki la ïohi te ïa kiei kiei ba la leh, ki la ïasngewsih shibun eh, bad ki la ïawan ban ïathuh ïa kita kiei kiei baroh ba la leh, ha u kynrad jong ki.

³² Ynda kumta, haba u kynrad jong u, u la khot ha lade ïa u, u la ong ha u, ‘Me u shakri bymman! ïa kata ka ram baroh nga la map ïa me, naba me la kyrpad ïa nga:

³³ kam dei ba me ruh men isynei ïa u para shakri jong me, kumba nga la isynei ïa me?’

³⁴ Te u kynrad jong u, u la sngewbitar, bad u la ai noh ïa u ha ki nongpynshitom, haduh ba un da siew ïa ka ram jong u baroh.

³⁵ Kumta ruh, U Kpa jong nga uba ha bneng un leh ïa phi, lada phin ym ïamap uwei pa uwei ïa la u para naduh la ki dohnud.”