MATHAÏOS 17 - KA BAIBL

Ka jingkylladur

¹ Ynda la hynriew sngi ruh, U Jisu u la shim lem ïa u Petros, bad ïa u Jakob, bad ïa u Ïoannis u para jong u, bad U la leit lam ïa ki kyrpang sha u lum bajrong,

² bad la pynkylla dur ïa u ha khmat jong ki; ka khmat jong u te ka la tyngshaiñ kum ka sngi, bad ki jaiñ jong u ki la long lieh kum ka jingshai.

³ Ha khmih ruh, u Moses bad u Elias ki la paw ha ki, ki da ïakren bad u.

⁴ U Petros te u da ïathuh u la ong ha U Jisu, “Ko Trai, ka bha ïa ngi ban don hangne; lada me mon, ngan thaw hangne lai tylli ki ïingtrep; kawei ïa me, kawei ruh ïa u Moses, bad kawei ruh ïa u Elias.”

⁵ Haba u dang kren, ha khmih, u lyoh batyngshaiñ u la kah ïa ki: ha khmih ruh, ka ktien na uta u lyoh ka la ong, “Une u long U Khun jong nga uba ieit, ha uba nga sngewbha: phin sngew ïa u.”

⁶ Haba ki synran te ki la ïohsngew, ki la dem ngon, bad ki la sheptieng shibun eh.

⁷ U Jisu te haba u la wan hajan, u la ktah ïa ki, bad u la ong, “To ïeng, wat sheptieng ruh.”

⁸ Te haba ki la khmied la ki khmat, kim ïohi ïano ïano ruh, hynrei, tang ïa U Jisu hi.

⁹ Haba ki dang ïahiar te na uta u lum, U Jisu u la hukum ïa ki, u da ong, “Wat ïathuh hano hano ruh ïa kata ka jingithuhpaw, tad ynda U Khun u briew u la mihpat na ki baïap.”

¹⁰ Ki synran jong u te ki la ïakylli ïa u, ki da ong, “Na ka balei te ba ki nongthoh ki ong ba ka dei ba u Elias un wan shuwa?”

¹¹ U Jisu te u la ïathuh bad u la ong ha ki, “U Elias shisha u wan, bad un pynbha ïa kiei kiei baroh:

¹² hynrei, nga ong ha phi, ba u Elias u la wan lypa, bad kim shym la ithuh ïa u, hynrei, ki la leh ïa u katba ki la imon. Kumta ruh, U Khun u briew un sa shah shitom na ki.”

¹³ Ynda kumta, ki synran ki la ïasngewthuh ba u la ïathuh ha ki shaphang u Ïoannis u Nongpynbaptis.

U Jisu u pynkhiah ïa u khynnah u bapang bhur

¹⁴ Te haba ki la ïawan ha u paidbah, uwei u briew u la wan ha U, u da dem khohsiew ïa U, u da ong,

¹⁵ “Ko Trai, to isynei ïa u khun jong nga; naba u pang bhur, u kordit eh ruh, naba u hap jyndei ha ka ding, jyndei ha ka um ruh.

¹⁶ Nga la wallam ïa u ha ki synran jong me, te kim lah ban pynkhiah ïa u.”

¹⁷ U Jisu te u la ïathuh bad u la ong, “A phi ka pateng bynriew bymngeit bad bamutlop, sa katno ngan long lem bad phi? sa katno ngan shah ïa phi? to wallam ïa u shane sha nga.”

¹⁸ Te U Jisu u la sneng ïa uta u ksuid, u ruh u la mih noh na u; te uta u khynnah u la khiah naduh kata ka por.

¹⁹ Ynda kumta, ki synran ki la ïawan ha U Jisu jar jar, bad ki la ong, “Balei ba ngi ngim lah ban beh noh ïa u?”

²⁰ U Jisu te u la ïathuh ha ki, “Namar ka jingbymngeit jong phi: naba shisha nga ong ha phi, lada phi don ka jingngeit kaba kat iwei i symbai tyrso, phin ong ha une u lum, ‘To leit noh nangne hangtai’, te un leit noh keiñ; bad ym don kaei kaei ruh ïa kaba phin ym lah leh.

²¹ Hynrei, u kynja une um ju mih noh, hynrei, tang da ka jingduwai bad kaba shah jingit.”

U Jisu u ïathuhlypa shaphang la ka jingïap bad ka jingmihpat

²² Haba ki dang ïaïaid te ha Galilaïa, U Jisu u la ong ha ki, “Yn sa die noh ïa U Khun u briew ha ki kti ki briew,

²³ bad kin ïa-pynïap ïa u, hynrei, ha ka balai ka sngi yn sa pynmih pat ïa u.” Te ki la ïasngewsih eh.

Kaba siew ïa ka baikhrong

²⁴ Te haba ki la poi ha Kapernam, kita kiba ïakhrong ïa ki shiteng shekel ki la ïawan ha u Petros, bad ki la ïakylli, “U Nonghikai jong phi um ju siew ïa ki shiteng shekel?”

²⁵ U la ong, “Ho-oid.” Te ynda u la leit hapoh ïing, U Jisu u la kren shuwa ïa u, U da ong, “Me mut kumno, ko Simon? na kino ba ki syiem ka pyrthei ki ju shim khrong lane khajna? na la ki khun hi, ne na ki nongwei?”

²⁶ U Petros u la ong ha U, “Na ki nongwei.” U Jisu u la ong ha u, “Naba kumta te ki khun ki lait.

²⁷ Hynrei, ïoh ba ngin ïa-pynthut ïa ki, to khie leit sha ka duriaw, bred ïa u khwai, bad to shim ïa kata ka dohkha kaba la ngat nyngkong; bad haba me la pyn-ang ïa ka shyntur jong ka, men shem shi shekel; to shim ïa kata, to ai ruh ha ki na ka bynta jong nga bad jong me ruh.”