MATHAÏOS 16 - KA BAIBL

Ka jingpan ïa ka dak

¹ Haba ki Pharisi bad ki Saddusi ruh ki la ïawan hajan, ki da tynjuh ïa u, ki la ïapan ba un pyni ïa ka dak na bneng ha ki.

² U te u la ïathuh bad u la ong ha ki, “Haba la janmiet, phi ong, ‘Kan rang, naba ka saw ka bneng:’

³ mynstep ruh, ‘Kan khih ka lyer mynta, naba ka bneng ka saw jngut’: phi kiba arsap! phi tip ban bishar shisha ïa ka khmat ka bneng, hynrei, phim lah bishar ïa ki dak ki aïom.

⁴ Ka pateng bynriew bymman bad baklim ka wad ïa ka dak; te yn ym ai ka dak ha ka, hynrei, tang ïa kata ka dak u Jonah u nongïathuhlypa.” Haba u la iehnoh te ïa ki, u la leit noh.

U thiat ki Pharisi bad ki Saddusi

⁵ Haba ki synran jong u te ki la ïawan sha shiliang, ki la klet ban wallam kpu.

⁶ U Jisu te u la ong ha ki, “To sumar, to kiar na u thiat ki Pharisi bad ki Saddusi.”

⁷ Ki te ki la ïakren hi paralok, ki da ong, “Naba ngim shym la wallam kpu keiñ!”

⁸ Haba U Jisu te u la tip ïa kata, u la ong ha ki, “A phi kiba rit jingngeit! balei phi ïakren hi paralok, naba phim shym la wallam kpu?

⁹ Phim pat sngewthuh, lymne phim kynmaw ïa kita ki san tylli ki kpu jong kita san hajar, bad katno tukri phi la ïakhar ruh?

¹⁰ lymne ïa kita ki hynñiew tylli ki kpu jong kita ki saw hajar, bad katno tukri phi la ïakhar ruh?

¹¹ Kumno ba phim sngewthuh ba ngam shym ong ha phi shaphang u kpu? hynrei, ban sumar na uta u thiat ki Pharisi bad ki Saddusi.”

¹² Ynda kumta, ki la sngewthuh ba um shym la ong ban sumar na u thiat u kpu, hynrei, na ka jinghikai ki Pharisi bad ki Saddusi.

Ka jingphla u Petros shaphang U Jisu

¹³ Haba U Jisu u la wan sha ki phang ka Kaisaria Philippi, u la kylli ïa ki synran jong u, u da ong, “Ki briew ki ong uei ïa nga, U Khun u briew?”

¹⁴ Ki la ong te, “Don kiba ong u Ïoannis u Nongpynbaptis, kiwei te, u Elias, bad kiwei pat, u Jeremaïah lane uwei na ki nongïathuhlypa.”

¹⁵ U la ong ha ki, “Phi te phi ong ba nga long uei?”

¹⁶ U Simon Petros u la ïathuh bad u la ong, “Me long U Khrist, U Khun U Blei ba-im.”

¹⁷ U Jisu te u la ïathuh bad u la ong ha u, “Suk ma me, ko Simon u khun u Jonah, naba ka doh bad ka snam kam shym la pyni ïa kata ha me, hynrei, U Kpa jong nga uba ha bneng.

¹⁸ Nga ruh nga ong ha me, ba me long u Petros, bad halor une u mawsiang ngan tei ïa ka balang jong nga; te ki khyrdop ka dujok kin ym lah ïa ka.

¹⁹ Bad ngan ai ha me ïa ki shabi ka hima ki bneng; te kaei kaei ruh ïa kaba men teh ha ka khyndew yn teh ïa ka ha bneng ruh, bad kaei kaei ruh ïa kaba men pyllait ha ka khyndew yn pyllait ïa ka ha bneng ruh.”

²⁰ Ynda kumta, u la adong ïa ki synran jong u ban ym ïathuh hano hano ruh ba u long uta U Khrist.

U Jisu u ïathuhlypa ïa ka jingïap bad ka jingmihpat jong u

²¹ Naduh kata, U Jisu u la sdang ban pyni ha ki synran jong u, ba ka dei ïa u ban leit noh sha Jerusalem, ban shah ruh shibun kiei kiei na ki tymmen basan bad na ki rangbah lyngdoh bad na ki nongthoh de, bad ba yn pynïap ruh ïa u, bad ba yn pynmih pat ïa u ha ka balai ka sngi.

²² Haba u Petros te u la shim kyrpang ïa U, u la sdang ban sneng ïa U, u da ong, “To isynei ïa lade, ko Trai, kata kan ym long ïa me.”

²³ Haba U la phai te U la ong ha u Petros, “Khie leit shadien jong nga, me u Soitan! Me long u mawjynthut ïa nga! naba mem ñiew ïa kiei kiei ki jong U Blei, hynrei, ïa kiei kiei ki jong ki briew.”

²⁴ Ynda kumta, U Jisu u la ong ha ki synran jong u: “Lada uno uno ruh u mon ban wan nadien jong nga, ai ba un len ïa lade, bad un rah ïa la ka diengphna, bad un wan bud ïa nga.

²⁵ Naba uno uno ruh uba mon ban pynim ïa la ka mynsiem, un duh noh ïa ka, bad uno uno ruh u ban duh noh ïa la ka mynsiem na ka bynta jong nga, un shem ïa ka.

²⁶ Naba u briew un myntoi aïu, lada un ïoh ïa ka pyrthei baroh, bad un duh noh ïa la ka mynsiem? Lane u briew un ïapli da ei ïa la ka mynsiem?

²⁷ Naba U Khun u briew un sa wan ha ka burom U Kpa jong u lem bad ki angel jong u, ynda kumta, un ai ha uwei pa uwei katba kum ka jingleh jong u.

²⁸ Shisha nga ong ha phi, don kiba ïeng hangne ki ban ym mad ïa ka jingïap, tad ynda ki la ïohi ïa U Khun u briew ba u wan ha ka hima jong u.”