MATHAÏOS 15 - KA BAIBL

Ka rukom pateng la pateng

¹ Ynda kumta, ki la ïawan ha U Jisu ki nongthoh bad ki Pharisi kiba na Jerusalem, ki da ong,

² “Balei ba ki synran jong me ki ryngkang ïa ka rukom pateng la pateng ki tymmen basan? naba kim da thet ïa ki kti jong ki haba kin sa bam jingbam.”

³ U da ïathuh te u la ong ha ki, “Balei ba phi ruh phi ryngkang ïa ka hukum U Blei da ka rukom pateng la pateng jong phi?

⁴ Naba U Blei u la hukum, u da ong: ‘Burom ïa la u kpa bad ïa la ka kmie ruh:’ bad ‘Uba krenbeiñ ïa u kpa lane ïa ka kmie, ai un ïap da ka jingpynïap.’

⁵ Hynrei, phi ong, ba uno uno ruh u ban ong ha la u kpa ne ha la ka kmie, ‘Kaei kaei ruh ka jong nga na kaba men da la myntoi, ka long ka jingainguh’,

⁶ un ym burom shuh te ïa u kpa jong u lane ïa ka kmie jong u. Kumta phi la pynduh noh ïa ka hukum U Blei da ka rukom pateng la pateng jong phi.

⁷ Phi kiba arsap! Bit kaba u Isaïah u la ïathuhlypa shaphang jong phi, u da ong,

⁸ “ ‘Kine ki briew ki wan hajan jong nga da ka shyntur jong ki, bad ki burom ïa nga da ki rmiang shyntur jong ki, hynrei, ka dohnud jong ki ka jngai noh na nga:

⁹ hynrei, ki mane thala ïa nga, haba ki hikai ïa ki hukum jong ki briew kum ka jinghikai.’ ”

Kaei kaba pyntngit ïa u briew

¹⁰ Te haba U la khot ha lade ïa u paidbah, U la ong ha ki: “To sngew phi, to sngewthuh ruh:

¹¹ Ym dei kata kaba rung ha ka shyntur kaba pyntngit ïa u briew, hynrei, kaba mih noh na ka shyntur, kata keiñ kaba pyntngit ïa u briew.”

¹² Ynda kumta, ki synran jong u ki la ïawan, bad ki la ïa-ong ha u, “Me tip ne em ba haba kita ki Pharisi ki la ïohsngew ïa kane ka ktien, ki la sngewthut?”

¹³ Hynrei, u la ïathuh bad u la ong, “Ïa ki jingthung baroh kiba U Kpa jong nga uba ha bneng um shym la thung, yn rat noh keiñ.

¹⁴ To iehnoh ïa ki; ki long ki nongïalam bamatlah ïa ki bamatlah. Te lada u bamatlah u ïalam ïa u bamatlah, kin ïahap baroh ar ngut ha ka thliew.”

¹⁵ U Petros te u la ïathuh bad u la ong ha u, “To batai ïa kata ka pharshi ha ngi.”

¹⁶ U Jisu te u la ong, “Phi ruh katta phim pat sngewthuh?

¹⁷ Phim pat sngewthuh, ba baroh kat kaba rung shapoh ka shyntur ka leit hapoh ka kpoh, bad ba bred noh ïa ka sharud?

¹⁸ Hynrei, kita kiei kiei ruh kiba mih noh na ka shyntur ki mih na ka dohnud; kita te ki pyntngit ïa u briew.

¹⁹ Naba na ka dohnud ki mih noh ki jingmut bymman, kaba pynïap, kaba klim, kaba ïakai kynthei, kaba tuh, kaba sakhi lamler, kaba krenbeiñ.

²⁰ Dei kine kiei kiei kiba pyntngit keiñ ïa u briew; hynrei, ban bam da ki kti khlem thet kam pyntngit ïa u briew.”

Ka jingngeit ka nong Kanaan

²¹ Te haba U Jisu u la mih noh nangta, u la leit sha ki phang ka Tyros bad ka Sidon.

²² Ha khmih ruh, ka kynthei ka nong Kanaan ka la wan na kita ki phang, bad ka la kyrpad ïa u, ka da ong, “To isynei ïa nga, ko Trai, U Khun u Dabid! ka khun jong nga ka kordit eh ba ka shong ksuid.”

²³ Hynrei, um shym jubab ha ka shikyntien ruh. Ki synran jong u te haba ki la ïawan hajan, ki la kyrpad ïa u, ki da ong, “To pyllait noh ïa ka, naba ka pyrta jam nadien jong ngi.”

²⁴ U da ïathuh u la ong te, “Ym shym la phah ïa nga, hynrei, tang ha kita ki langbrot kiba la jah noh na ka ïing Israel.”

²⁵ Ka, hynrei, haba ka la wan, ka la mane dem ha u, ka da ong, “Ko Trai, to ïarap ïa nga.”

²⁶ Hynrei, u la ïathuh bad u la ong, “Ym bit ban shim ïa ka jingbam ki khun bad ban bred ïa ka ha ki ksew.”

²⁷ Ka te ka la ïathuh, “Shisha, ko Trai, hynrei, wat ki ksew ki ïabam na kita kiba lwet kiba la hap na ka miej ki kynrad jong ki.”

²⁸ Ynda kumta, U Jisu u la ïathuh bad u la ong ha ka, “Ko kynthei, kaba khraw ka jingngeit jong pha; to kan long ïa pha kumba pha mon.” Ka khun jong ka, ka la khiah te naduh kata ka por.

U Jisu u pynkhiah ïa ki paidbah babun

²⁹ Te haba U Jisu u la leit noh nangta, u la wan hajan ka duriaw Galilaïa; haba u la kiew ruh sha u lum, u la shong hangta.

³⁰ Ki paidbah babun te ki la wan ha u, ki da don lem bad ki, ki ba-dkoh, ki bamatlah, ki bymnangkren, ki bakynriang, bad shibun kiwei kiwei ruh; bad ki la buh ïa ki hajan ki kjat U Jisu, te u la pynkhiah ïa ki.

³¹ Katba kita ki paidbah ki la sngewphylla, haba ki la ïohi ïa ki bymnangkren ba ki da kren, ïa ki bakynriang ba ki la khiah, ïa ki ba-dkoh ba ki da ïaid, ïa ki bamatlah ruh ba ki da ïohi, ki la ïaroh ruh ïa U Blei ki Israel.

Kaba bsa ïa ki saw hajar

³² Haba U Jisu te u la khot ha lade ïa ki synran jong u, u la ong, “Nga sngewsynei ïa u paidbah; naba ki la ïaishong bad nga mynta la lai sngi, bad kim don ei ei ruh ban bam; te ngam mon ban phah noh jingit ïa ki, ba ïoh ki ïapler ha lynti.”

³³ Te ki synran jong u ki la ïathuh ha u, “Nangno ngin ïoh ki kpu katta katta ha ka ri khlaw, kat ban pynkdang ïa u paidbah kat une?”

³⁴ U Jisu u la kylli te ïa ki, “Phi don katno tylli ki kpu?” Ki la ong te, “Hynñiew tylli, bad khyndiat ki dohkha rit.”

³⁵ Te u la hukum ïa ki paidbah ban shong shaniah ha khyndew.

³⁶ Haba u la shim te ïa kita ki hynñiew tylli ki kpu bad ïa kita ki dohkha, bad haba u la nguh, u la kdiah, bad u la ai ha ki synran jong u, kita ki synran de ha uta u paidbah.

³⁷ Kumta, baroh ki la ïabam bad ki la kdang; ki la ïakhar noh ruh na kiba lwet basah tam, dap hynñiew tukri.

³⁸ Kita kiba la ïabam te ki long kumba saw hajar ki rangbah, nalor ki kynthei bad ki khynnah.

³⁹ Haba u la pyllait noh ïa ki paidbah, u la kiew pat halor kata ka lieng, bad u la leit sha ki phang ka Magdala.