MATHAÏOS 14 - KA BAIBL

Ka jingïap u Ïoannis Nongpynbaptis

¹ Mynkata u Herod uba u Tetrark u la ïohsngew ïa ka jingbna shaphang U Jisu,

² bad u la ong ha ki shakri jong u, “Une u long u Ïoannis u Nongpynbaptis; u la mihpat na ki nongïap; namar kata keiñ, kine ki borbah ki ïatrei ha u.”

³ Naba u Herod haba u la kem ïa u Ïoannis, u la khum ïa u, bad u la buh ruh ïa u ha ka byndi na ka bynta ka Herodias, ka tnga u Philip, u para jong u.

⁴ Naba u Ïoannis u la ong ha u, “Ym bit ïa me ban ïoh ïa ka.”

⁵ Haba u mon te ban pynïap ïa u, u la sheptieng ïa u paidbah, naba ki ju ñiew ïa u kum u nongïathuhlypa.

⁶ Te haba la dei ka sngi kha u Herod, ka khun ka Herodias ka la shad ha khmat jong ki, bad ka la pynsngewbha ïa u Herod.

⁷ Namar kata, u la kular da kaba smai ban ai ha ka kat kaba kan pan.

⁸ Ka ruh, haba ka la suh buit ka kmie jong ka, ka la ong, “To ai ha nga hangne ïa ka khlieh u Ïoannis u Nongpynbaptis ha ka pliang.”

⁹ U syiem te u la sngewsih, hynrei, na ka bynta kita ki jingsmai, bad kita kiba ïashong bam bad u, u la hukum ban ai.

¹⁰ Haba u la phah te, u la khrai khlieh ïa u Ïoannis ha kata ka byndi.

¹¹ Te la wallam ïa ka khlieh jong u ha ka pliang, bad la ai ha kata ka khynnah; ka ruh ka la leit lam ha ka kmie jong ka.

¹² Te haba ki la ïawan ki synran jong u, ki la ïarah noh ïa ka met, bad ki la ïatep ïa ka; bad ki la leit ïathuh ha U Jisu.

Kaba bsa ïa ki san hajar

¹³ Haba U Jisu u la ïohsngew ruh, u la leit noh nangta ha ka lieng, sha ka jaka kynjah weibriew; te haba ki paidbah ki la ïohsngew, ki la ïabud ïa u da ki kjat na ki shnong.

¹⁴ Haba U Jisu ruh u la mih noh, u la ïohi ïa u paidbah babun, bad u la sngewsynei ïa ki bad u la pynkhiah ïa ki bapang jong ki.

¹⁵ Te haba ka la kham noh ka sngi, ki la ïawan ha u ki synran jong u, ki da ong, “Kane ka long ka jaka kynjah, ka por ruh ka la kham palat; to pyllait noh ïa ki paidbah, ba kin leit sha ki shnong ban thied jingbam ïa lade.”

¹⁶ U Jisu te u la ong ha ki, “Kim donkam ban leit noh; to ai ma phi ha ki ban bam.”

¹⁷ Ki te ki ong ha u, “Ngi don hangne sa tang san tylli ki kpu, bad ar tylli ki dohkha.”

¹⁸ Te u la ong, “Wallam ïa ki hangne ha nga.”

¹⁹ Te u la hukum ban pynshong shaniah ïa ki paidbah ha u phlang, bad u la shim ïa kita ki san tylli ki kpu bad ïa kita ki ar tylli ki dohkha, bad haba u la khmied sha bneng, u la nguh, bad u la kdiah, u la ai ïa ki kpu ha ki synran, bad kita ki synran ha ki paidbah.

²⁰ Te ki la ïabam baroh, bad ki la kdang; bad ki la ïakhar na kiba lwet basah tam, dap khat-ar tukri.

²¹ Kita kiba la ïabam te ki long kumba san hajar ki rangbah, nalor ki kynthei bad ki khynnah.

U Jisu u ïaid halor ka duriaw

²² Kumne kumne ruh U Jisu u la kyntu ïa ki synran jong u ban kiew halor kata ka lieng, bad ban leit noh ha shuwa jong u sha shiliang, katba u dang pyllait noh ïa ki paidbah.

²³ Te haba u la pyllait noh ïa ki paidbah, u la kiew sha u lum weibriew ban duwai; bad haba ka la janmiet ruh, u la don hangta weibriew.

²⁴ Hynrei mynkata, kata ka lieng ka la don hapdeng ka duriaw, ïa kaba la pynkhih eh da ki jingat phyllung; naba ka lyer ka la beh pyrshah.

²⁵ Te ha ka jingap miet ka basaw U Jisu u la leit ha ki, u da ïaid halor ka duriaw.

²⁶ Haba kita ki synran te ki la ïohi ïa u ba u ïaid halor ka duriaw, ki la sngewkyiuh eh, ki da ong, “Ka long ka rngai”; te ki la ïalynñiar na kaba sheptieng.

²⁷ Hynrei, U Jisu kumne kumne ruh u la kren ha ki, u da ong, “To sngewshlur; dei ma nga; to wat sheptieng.”

²⁸ U Petros te u da ïathuh, u la ong ha U, “Ko Trai, lada dei ma me, hukum ïa nga ban wan sha me halor ka um.”

²⁹ U te u la ong, “To wan.” Te haba u Petros u la hiar na kata ka lieng, u la ïaid halor ka um ban leit sha U Jisu.

³⁰ Hynrei, haba u la ïohi ïa kata ka lyer ba ka jur, u la sngewsheptieng, bad haba u la sdang ban ngam, u la pyrta, u da ong, “Ko Trai, to pynim ïa nga.”

³¹ Kumne kumne ruh U Jisu haba u la kner ïa la ka kti, U la kem ïa u, bad U la ong ha u, “A me uba rit jingngeit! balei ba me la sngew-artatien?”

³² Haba ki la ïakiew te halor kata ka lieng, ka lyer ka la jah noh.

³³ Te kita kiba ha kata ka lieng ki la mane dem ïa u, ki ïa-ong, “Shisha me uba U Khun U Blei.”

U Jisu u pynkhiah ïa ki bapang ha ka ri Gennesaret

³⁴ Te haba ki la lah poi sha shiliang, ki la wan ha ka ri Gennesaret.

³⁵ Te haba ki briew ha kata ka jaka ki la ithuh ïa u, ki la phah kylleng ïa kata ka ri baroh, bad ki la wallam ha u ïa ki bapang baroh;

³⁶ bad ki la ïakyrpad ïa u ba kin shu ïoh ktah tang ïa ka rmiang ka jaiñkup jong u; te baroh kat kiba la ktah, ki la khiah phar.