MATHAÏOS 12 - KA BAIBL

Ka jingkylli shaphang ka Sabbaton

¹ Mynkata, U Jisu u la leit ha ka sngi Sabbaton lyngba ïa ki lyngkha Kew; ki synran jong u te ki la thngan, bad ki la ïasdang ban kheit soh Kew, ban bam ruh.

² Hynrei, haba ki Pharisi ki la ïohi, ki la ong ha u, “Ha khmih, ki synran jong me ki leh ïa ka bymbit ban leh ha ka sngi Sabbaton.”

³ U te u la ong ha ki, “Phim ju la pule, kaei ba u Dabid u la leh, mynba u la thngan, bad kita kiba bad u ruh?

⁴ kumno ba u la leit hapoh ka templ, bad ba u la bam ïa kita ki 'pu pyni, ïa ki bymbit ïa u ban bam, lymne ïa kita kiba bad u, hynrei, tang ïa ki lyngdoh hi?

⁵ lane phim ju la pule ha Ka Hukum, ba ki lyngdoh ha ka templ ha ka sngi Sabbaton ki pynkheiñ ïa ka Sabbaton khlem pop ruh?

⁶ Hynrei, nga ong ha phi, ba uba kham khraw ïa ka templ u don hangne.

⁷ Hynrei, lada phi la lah tip kaei kane, ‘Ïa ka jingisynei nga mon, te ym ïa ka jingkñia,’ phin ym da la pynrem ïa kita kiba khlem pop.

⁸ Naba U Khun u briew, u long U Trai ka Sabbaton.”

U briew uba don ka kti ka baïap

⁹ Te haba u la mih noh nangta, u la leit ha ka synagog jong ki.

¹⁰ Ha khmih ruh, la don u briew uba don ka kti ka baïap. Te ki la kylli ïa u, ki da ong, “Ka bit ne em ban pynkhiah ha ka sngi Sabbaton?” ba kin ïakem daw ïa u.

¹¹ U te u la ong ha ki: “Uno u briew uba na phi uba don kawei ka langbrot, lada kata ka hap ruh ha ka thliew ha ka sngi Sabbaton, un ym shim bad rah noh ïa ka?

¹² u briew te katno u kham kor ïa ka langbrot! Kumta, ka bit ban leh bha ha ka sngi Sabbaton.”

¹³ Haba kumta u la ong ha uta u briew, “To rah ïa la ka kti.” U la rah te ïa ka; bad la pynbha pat ïa ka kum kata kawei.

¹⁴ Te haba kita ki Pharisi ki la leit noh, ki la ïasylla pyrshah ïa U, kumno ba kin ïoh pynïap noh ïa U.

U briew uba la jied jong U Blei

¹⁵ Hynrei, U Jisu haba u la tip u la leit noh nangta: te ki paidbah babun ki la ïabud ïa u, bad u la pynkhiah ïa ki baroh;

¹⁶ te u la maham ïa ki ba kin ym pynpaw ïa u:

¹⁷ kumta ba la pyndep ïa kata ba la ong da u Isaïah u nongïathuhlypa, u da ong,

¹⁸ “Ha khmih, u shakri jong nga ïa uba nga la jied; uba ieit jong nga ha uba ka mynsiem jong nga ka sngewbha eh: ngan buh ïa U Mynsiem jong nga ha u, bad un pynbna ïa ka jingbishar ha ki Jentil:

¹⁹ un ym ïaleh, lymne pyrta; lymne uei uei ruh un ym ïohsngew ïa ka ktien jong u ha ki lynti:

²⁰ un ym pynkheiñ ïa u khah uba la mong, bad un ym pynlip ïa u 'saihon uba sah tdem, tad ynda un pynphriang ïa ka jingbishar haduh ka jingjop:

²¹ te ha ka kyrteng jong u ki Jentil kin ïakyrmen.”

U Jisu bad u Belsebul

²² Ynda kumta, la wallam ha U ïa uba shong ksuid u bamatlah bad u bymnangkren; bad U la pynkhiah ïa u, kat haduh ba uta u bamatlah bad u bymnangkren u la ïohi bad u la kren ruh.

²³ Te kita ki paidbah baroh ki la ïasngewkyndit eh, bad ki la ïa-ong, “Une um long u khun u Dabid?”

²⁴ Hynrei, haba kita ki Pharisi ki la ïohsngew ki la ïa-ong, “Une u briew um beh noh ïa ki ksuid, lymda da u Belsebul u rangbah ki ksuid.”

²⁵ Hynrei, U Jisu haba u la tip ïa ki jingmut jong ki, u la ong ha ki, “Ka hima baroh kaba ïaleh makynti, kan jot; ka shnong ruh ne ka ïing baroh kaba ïaleh makynti, kan ym neh.

²⁶ Lada u Soitan ruh u shop noh ïa u Soitan, u ïaleh hi ïa lade; kumta, kan neh kumno ka hima jong u?

²⁷ Lada nga ruh nga beh noh ïa ki ksuid da u Belsebul, dano ba ki khun jong phi ki beh noh ïa ki? Namar kata, kin long ki nongbishar jong phi.

²⁸ Hynrei, lada nga beh noh ïa ki ksuid da U Mynsiem U Blei, kumta te, ka hima U Blei ka la wan shisyndon ha phi.

²⁹ Lane kumno uno uno ruh u lah ban leit hapoh ka ïing u bakhlaiñ, bad kurup ïa kiei kiei ruh ki jong u, lymda u khum shuwa ïa uta u bakhlaiñ? Ynda kumta te, un sa kurup ïa ka ïing jong u.

³⁰ U bymlong bad nga u ïaleh ïa nga: bad u bymïalum bad nga u pynsaphred.

³¹ Namar kata, nga ong ha phi, ba yn map ïa ki briew ïa ka pop baroh bad ïa kaba krenbeiñ blei: tang ïa kaba krenbeiñ ïa U Mynsiem Bakhuid, yn ym map shuh.

³² Bad uno uno ruh uba krenbeiñ ïa U Khun u briew, ïa uta lah ban map; hynrei, uno uno ruh uba krenbeiñ ïa U Mynsiem Bakhuid, ïa u yn ym map, ha kane ka pyrthei lymne ha kata ka ban sa wan.”

U dieng bad u soh jong u

³³ “Lane phin tharai babha ïa u dieng, bad ïa u soh jong u ruh; lane phin tharai basniew ïa u dieng, bad ïa u soh jong u ruh: naba ïa u dieng yn ithuh na u soh jong u.

³⁴ A phi ki khun ki ksiew ki bseiñ! Phi ki bymman, kumno phi lah ban kren ka babha? naba na ka jingshlei ka dohnud ba ka kren ka shyntur.

³⁵ U briew u babha u sei noh ïa kiei kiei ki babha na ka jingkynshew ka babha ka dohnud jong u: u briew babymman ruh u sei noh ïa kiei kiei babymman na ka jingkynshew babymman jong u.

³⁶ Hynrei, nga ong ha phi, ba ïa ka ktien thala baroh ïa kaba ki briew kin kren, kin ïa-ai jingkheiñ shaphang kata ha ka sngi bishar.

³⁷ Naba na ki ktien jong me yn pynksan ïa me, bad na ki ktien jong me yn pynrem ïa me.”

Ka jingpan ban ïoh ka dak

³⁸ Ynda kumta, kiba na ki nongthoh bad na ki Pharisi ki la ïathuh ki da ong, “Ko Nonghikai, ngi kwah ban ïohi ka dak na me.”

³⁹ U te u da ïathuh u la ong ha ki: “Ka pateng bynriew bymman bad baklim ka ïaiwad ka dak: hynrei, yn ym ai ka dak ha ka, hynrei, tang kata ka dak u Jonah u nongïathuhlypa.

⁴⁰ Naba kumba u Jonah u la shong lai sngi bad lai miet ha ka kpoh u dohkha khraw, kumta ruh U Khun u briew un shong lai sngi bad lai miet ha ka kpoh ka khyndew.

⁴¹ Ki nong Ninebeh kin ïaïeng lem bad kane ka pateng bynriew ha ka jingbishar, bad kin ïa-pynrem ïa ka: naba ki la ïakylla-ka-bamut da ka jingïalap u Jonah: ha khmih te, hangne uba kham khraw ïa u Jonah.

⁴² Ka syiem na shathie kan ïamih lem bad kane ka pateng bynriew ha ka jingbishar, bad kan pynrem ïa ka: naba ka la wan na sha ki bakut ka pyrthei ban ïohsngew ïa ka jingstad u Solomon; te ha khmih, hangne uba kham khraw ïa u Solomon.

Ka jingwan phai pat u mynsiem bymkhuid

⁴³ “Te haba u mynsiem bymkhuid u la mih noh na u briew, u ïaid ïa ki jaka ryngkhiang, ba u da wad ïa ka jaka shongthait, te um shem.

⁴⁴ Ynda kumta, u ong: ‘Ngan leit phai pat sha la ïing na kaba nga la mih noh’; te haba u la wan pat, u shem ïa ka ïing ba la suda, ba la sar, bad ba la buh beit ki jingbuh.

⁴⁵ Ynda kumta, u leit noh, u shim lem bad u, hynñiew ki mynsiem kiwei pat kiba kham bymman ïa u hi, te ki ïaleit hapoh bad ki shong sah hangta: ka bakhatduh te ïa uta u briew kan long kham sniew ïa ka banyngkong. Kumta, kan long ruh ïa kane ka pateng bynriew bymman.”

Ka kmie bad ki ba-ha-ïing ba-ha-sem U Jisu

⁴⁶ Haba u dang kren ha kita ki paidbah, ha khmih, ka kmie jong u bad ki hynmen hynbew jong u ruh ki ïaïeng shabar, ba ki ïakwah ban ïakren bad u.

⁴⁷ Uwei u la ong te ha U, “Ha khmih, ka kmie jong me bad ki hynmen hynbew jong me ruh ki ïaïeng shabar, ba ki ïakwah ban ïakren bad me.”

⁴⁸ U te U da ïathuh U la ong ha uta uba la ïathuh ha U, “Kano kaba long ka kmie jong nga? bad kino kiba long ki hynmen hynbew jong nga?”

⁴⁹ Bad haba u la kner ïa la ka kti sha ki synran jong u, u la ong, “Ha khmih ka kmie jong nga bad ki hynmen hynbew jong nga!

⁵⁰ Naba uno uno ruh u ban leh ïa ka mon U Kpa jong nga uba ha bneng, uta keiñ u long u para jong nga bad ka para bad ka kmie de.”