MATHAÏOS 11 - KA BAIBL

Ki nonglam-ktien na u Ïoannis Nongpynbaptis

¹ Ka la jia ruh, haba U Jisu u la wai noh kaba hukum ïa ki khat-ar ngut ki synran jong u, ba u la leit noh nangta ïa ka ban hikai bad ban ïalap ha ki shnong jong ki.

² Te haba u Ïoannis u la ïohsngew ha ka byndi shaphang ki jingleh U Khrist, u la phah da ki synran jong u,

³ bad u la kylli ha U, “Me long uta u ban sa wan, ne ngin ïa-ap ïa uwei pat?”

⁴ U Jisu te u la ïathuh bad u la ong ha ki, “To khie leit ïathuh ha u Ïoannis ïa kiei kiei ruh kiba phi ïohsngew bad ba phi ïohi ruh:

⁵ Ki bamatlah ki peit pat, ki ba-dkoh ruh ki ïaid, la pynkhuid ïa ki bapang 'ñiangthohlieh, ki bakyllut ruh ki ïohsngew, la pynim pat ïa ki nongïap, bad la ïalap ïa ka gospel ha ki baduk ruh:

⁶ suk ruh ma u, u ban ym thut ha nga.”

⁷ Te haba kita ki dang ïaleit noh, U Jisu u la sdang ban ong ha kita ki paidbah shaphang u Ïoannis: “Phi la leit sha ka ri khlaw ban jngoh aïu? ïa u phlang ba la pynkhih da ka lyer?

⁸ Hynrei, phi la leit ban ïohi aïu? ïa u briew ba la kup ki jaiñ bani? ha khmih, kita kiba kup ki jaiñ bani ki long ha ki ïingsyiem.

⁹ Hynrei, phi la mih noh ban ïohi aïu? ïa u nongïathuhlypa? shisha, nga ong ha phi, ïa uba kham khraw ïa u nongïathuhlypa.

¹⁰ Naba une u long uta ba la thoh shaphang jong u: “ ‘Ha khmih, nga phah ïa u nonglam-ktien jong nga ha shuwa ka khmat jong me, u ban khreh ïa ka lynti jong me ha shuwa jong me.’

¹¹ “Shisha nga ong ha phi, na kiba la kha na ki kynthei, ym don uba la mih uba kham khraw ïa u Ïoannis u Nongpynbaptis: hynrei, uta uba kham rit ha ka hima ki bneng, u kham khraw ïa u.

¹² Te naduh ki sngi u Ïoannis u Nongpynbaptis haduh mynta, la ïaknieh ïa ka hima ki bneng, bad kiba ïaknieh ki shim ïa ka da ka bor.

¹³ Naba Ki Nongïathuhlypa baroh bad Ka Hukum ki la ïathuhlypa haduh u Ïoannis.

¹⁴ Te lada phi mon ban pdiang, une u long u Elias u ban sa wan.

¹⁵ Uba don ki shkor ban sngew, to un sngew.

¹⁶ “Hynrei, kum kaei ngan pynsyriem ïa kane ka pateng bynriew? Ka long kum ki khynnah kiba ïashong ha ki jaka ïew, bad kiba ïakhot ïa ki lok jong ki,

¹⁷ ki da ong, “ ‘Ngi la put jingput ha phi, te phim shym la shad; ngi la rwai sngewsynei ha phi, te phim shym la sngewsih.’

¹⁸ “Naba u Ïoannis u la wan, um da bam um da dih, bad ki ong, ‘Uba shong ksuid’ ïa u.

¹⁹ U Khun u briew u la wan, u da bam u da dih ruh, te ki ong, ‘Ha khmih, u briew uba bam lalot, bad uba dih kyiad, u lok ki nongkhrong bad ki bapop!’ Hynrei, ka jingstad ka la ksan na ki khun jong ka.”

Ka jingkordit ïa ki shnong ki bym shym la kylla-ka-bamut

²⁰ Ynda kumta, u la sdang ban maham ïa kita ki shnong, ha kiba la leh kham bun ki kambah jong u, naba kim shym la kylla-ka-bamut.

²¹ “Kordit ïa pha Khorasin! Kordit ïa pha Bethsaida! naba lada la leh ha ka Tyros bad ka Sidon ïa kita ki kambah ïa kiba la leh ha phi, kin da la kylla-ka-bamut la mynslem da ki jaiñ khain bad da ka dpei.

²² Hynrei, nga ong ha phi, ba kan long kham jem ïa ka Tyros bad ka Sidon ha ka sngi bishar ban ïa kaba ïa phi.

²³ Ïa pha ka Kapernam ruh, ïa kaba la pynkyntiew haduh ka bneng, yn pynhiar keiñ haduh ka dujok: naba lada la leh ha Sodom ïa kita ki kambah ïa kiba la leh ha pha, kan da la sah haduh mynta.

²⁴ Hynrei, nga ong ha phi, ba kan long kham jem ïa ka ri Sodom ha ka sngi bishar ban ïa kaba ïa pha.”

To wan ha nga, te phin shem kaba jahthait

²⁵ Mynkata U Jisu u la ïathuh bad u la ong: “Nga nguh ïa me, ko Kpa, U Trai ka bneng bad ka khyndew, ba me la buhrieh ïa kine kiei kiei ruh na ki bastad bad ki basian, bad ba me la pynpaw ïa ki ha ki khunlung:

²⁶ shisha, ko Kpa, naba kumta ka la ibit ha khmat jong me.

²⁷ Kiei kiei baroh la ai ha nga na U Kpa jong nga: ym don ruh uba ithuh ïa U Khun, hynrei, tang U Kpa; lymne uba ithuh ïa U Kpa, hynrei, tang U Khun, bad uta ha uba uta U Khun u mon ban pynpaw ïa u.

²⁸ To wan ha nga, phi baroh ki bathait bad bakhia ka jingkit, te ngan pynjem ïa phi.

²⁹ To shim ïa ka lyngkor jong nga ha phi, to hikai ruh na nga; naba nga uba lui lui bad u barit ruh ha ka dohnud: te phin shem kaba jahthait ha ki mynsiem jong phi.

³⁰ Naba ka lyngkor jong nga ka long kaba jem, bad ka jingkit jong nga kaba sting.”