MATHAÏOS 10 - KA BAIBL

U Jisu u jied ïa ki khat-ar ngut ki Apostol

¹ Te haba u la khot ha lade ïa ki khat-ar ngut ki synran jong u, u la ai bor ïa ki halor ki mynsiem bymkhuid kat ban beh noh ïa ki, bad ban pynkhiah ïa ka jingpang baroh bad ïa ka jingkhrew baroh.

² Ki kyrteng jong kita ki khat-ar ngut ki apostol te ki la long kine: u banyngkong, u Simon, ïa uba la khot “u Petros”, bad u Andriw u para jong u; u Jakob u khun u Sebedi, bad u Ïoannis u para jong u;

³ u Philip, bad u Bartholomai; u Thomas, bad u Mathaïos u nongkhrong; u Jakob u khun u Alphaïos, bad u Lebbaïos, ïa uba ki sin “Thaddaïos”,

⁴ u Simon u Bashitrhem, bad u Judas Iskariot, uba la die noh ïa U ruh.

Ka kam ïalap jong ki khat-ar ngut ki Apostol

⁵ Ïa kine ki khat-ar ngut, U Jisu u la phah noh, bad u la hukum ïa ki, u da ong, “Wat leit ha ka lynti ki Jentil, ha ka shnong ki kynja Samaria ruh phi wat rung.

⁶ Hynrei, phin kham ïaleit ha kita ki langbrot kiba la jah noh na ka ïing Israel.

⁷ Katba phi ïaid ruh, to ïalap, da ong, ‘Ka hima ki bneng ka la jan.’

⁸ To pynkhiah ïa ki bapang, to pynkhuid ïa ki bapang 'ñiangthohlieh, to pynim pat ïa ki baïap, to beh noh ïa ki ksuid: phi la pdiang ei, phin ïa-ai ei.

⁹ Wat ïabuh lypa ïa ka ksiar, lymne ka rupa, lymne ka rnong, ha ki 'saipan jong phi;

¹⁰ lymne ka ïarong ïa ka lynti, lymne ar tylli ki jingphong, lymne ki juti, lymne u diengduh; naba ka dei ïa u nongtrei ban ïoh la ka bam.

¹¹ Sha kano kano ka nongbah lane ka nongrit ba phin leit rung, to wad uei ha kata uba bit nam; te hangta phin ïaishong tad ynda phi mih noh.

¹² Haba phi leit hapoh ka ïing ruh, phin khublei ïa ka.

¹³ Lada kata ka ïing ruh ka long kaba bit shisha, ai ba ka jingsuk jong phi kan wan ha kata; hynrei, lada kam long kaba bit, ai ba ka jingsuk jong phi kan wan phai pat ha phi.

¹⁴ Lada uno uno ruh un ym pdiang ïa phi, lymne sngew ruh ïa ki ktien jong phi, haba phi mih noh na kata ka ïing lane na kata ka shnong, to ïakynther noh ïa ka 'dewmet na ki kjat jong phi.

¹⁵ Shisha nga ong ha phi, ba kan long kham jem ïa ka ri Sodom bad Gomorra ha ka sngi bishar ban ïa kaba kan long ïa kata ka shnong.

Ki jingshah lehbeiñ ba kin ïakynduh

¹⁶ “Ha khmih, nga phah noh ïa phi kum ki langbrot hapdeng ki suri; namar kata, phin ïalong ki basian kum ki bseiñ, bad ki bajemnud kum ki paro.

¹⁷ Hynrei, to ïasumar na ki briew, naba kin ïa-ai noh ïa phi ha ki jingbishar, bad kin ïasympat ïa phi ha ki synagog jong ki;

¹⁸ yn ïalam ruh ïa phi ha khmat ki lyngskor bad ki syiem na ka bynta jong nga, ïa ka ban long ka jingphla ha ki bad ha ki Jentil.

¹⁹ Hynrei, ynda ki ïa-ai noh ïa phi, wat sngewkhuslai, kumno, lane kaei ba phin kren; naba yn ai ha phi ha kata ka por, ïa kaei ba phin kren.

²⁰ Naba ym dei ma phi kiba kren, hynrei, U Mynsiem U Kpa jong phi uba kren ha phi.

²¹ U para te un ai noh ïa la u para ïa ka ban ïap, u kpa ruh ïa la ki khun: ki khun ruh kin ïeng ïaleh ïa ki kmie ki kpa, bad kin ïa-pynïap ruh ïa ki.

²² Te phin long ïa kiba la shun da ki briew baroh na ka bynta ka kyrteng jong nga: hynrei, uta uba da ïaineh ha ban da kut, uta keiñ u ban lait im.

²³ Hynrei, haba ki ïabehbeiñ ïa phi ha kawei ka shnong, to ïaphet sha kawei pat: naba shisha nga ong ha phi, ba phin ym pat lah pyndep ïa ki shnong ki Israel, tad ynda un wan U Khun u briew.

²⁴ “U synran um long halor u nonghikai, lymne u shakri halor u kynrad jong u.

²⁵ La biang ïa u synran ba un long kum u nonghikai jong u, ïa u shakri ruh kum u kynrad jong u. Lada ki la khot ‘Belsebul’ ïa u trai ïing, kaba katno tam ba kin ïakhot sin ïa kita kiba na ka ïing jong u!

Ïano ban kham sheptieng

²⁶ “Namar kata, to wat sheptieng ïa ki: naba ym don kaei kaei ruh ba la tap, ïa kaba yn ym pynpaw; bad ba la buhrieh, ïa ka ban ym pyntip.

²⁷ Ïa kaba nga ong ha phi ha ka ba-dum, to ïathuh ha ka bashai: bad ïa kaba phi ïohsngew da ka shkor, to phin ïalap nalor ïing.

²⁸ To wat sheptieng te ïa kita kiba pynïap ïa ka met, bad ki bym lah ban pynïap ïa ka mynsiem: hynrei, phin kham sheptieng ïa uta uba lah ban pynjot bad ïa ka mynsiem bad ïa ka met ha dujok.

²⁹ Kim ju die ar peisa ïa ki ar tylli ki sim ïing? hynrei, na kita, kawei kam hap ha khyndew khlem U Kpa jong phi.

³⁰ Wat ïa u 'ñiuh khlieh jong phi baroh ruh la ñiew.

³¹ Namar kata, to wat sheptieng; phi long kham kor ïa ki shibun ki sim ïing.

Kaba phla ïa U Jisu ha khmat ki briew

³² “Uno uno baroh te u ban phla ïa nga ha khmat ki briew, nga ruh ngan phla ïa u ha khmat U Kpa jong nga uba ha bneng.

³³ Hynrei, uno uno ruh u ban len ïa nga ha khmat ki briew, nga ruh ngan len ïa u ha khmat U Kpa jong nga uba ha bneng.

Ym ka jingsuk, hynrei ka wait

³⁴ “Wat mut ba nga la wan ban buh ka jingsuk ha ka pyrthei: ngam shym la wan ban buh ka jingsuk, hynrei, ka wait.

³⁵ Naba nga la wan ba u briew un ïaleh bad la u kpa, ka khun ruh bad la ka kmie, ka pyrsa kurim ruh bad la ka syngken kurim.

³⁶ Bad ki nongshun u briew kin long kiba na ïing jong u hi.

³⁷ Uta uba ieit ïa u kpa lane ka kmie nalor jong nga, ym dei ïa u ban ïoh ïa nga; bad uta uba ieit ïa u khun lane ïa ka khun nalor jong nga, ym dei ïa u ban ïoh ïa nga.

³⁸ Bad uta u bym shim ïa la ka diengphna bad bud nadien jong nga, ym dei ïa u ban ïoh ïa nga.

³⁹ Uta uba shem ïa la ka jingim un duh noh ïa ka; bad uta uba duh noh ïa la ka jingim na ka bynta jong nga un shem ïa ka.

Ka bainong

⁴⁰ “Uta uba pdiang ïa phi u pdiang ïa nga; uta te uba pdiang ïa nga u pdiang ïa uta uba la phah ïa nga.

⁴¹ Uta uba pdiang ïa u nongïathuhlypa ha ka kyrteng u nongïathuhlypa un ïoh ïa ka nong u nongïathuhlypa; bad uta uba pdiang ïa u riewhok ha ka kyrteng u riewhok un ïoh ïa ka nong u riewhok.

⁴² Bad uno uno ruh u ban ai dih tang shi khuri ka um khriat ïa uwei na kine ki barit, ha ka kyrteng u synran, shisha nga ong ha phi, un ym duh shuh la ka nong.”