MATHAÏOS 1 - KA BAIBL

Ka jingkha pateng la pateng ïa U Jisu Khrist

¹ Ka kitab ka jingkha ïa U Jisu Khrist, uba u khun u Dabid, uba u khun u Abraham.

² U Abraham u la pynkha ïa u Isaak; bad u Isaak u la pynkha ïa u Jakob; bad u Jakob u la pynkha ïa u Juda bad ïa ki para jong u;

³ bad u Juda u la pynkha ïa u Phares bad ïa u Sera na ka Tamar; bad u Phares u la pynkha ïa u Esrom; bad u Esrom u la pynkha ïa u Aram;

⁴ bad u Aram u la pynkha ïa u Aminadab; bad u Aminadab u la pynkha ïa u Naason; bad u Naason u la pynkha ïa u Salmon;

⁵ bad u Salmon u la pynkha ïa u Boas na ka Rahab; bad u Boas u la pynkha ïa u Obed na ka Ruth; bad u Obed u la pynkha ïa u Jesse;

⁶ bad u Jesse u la pynkha ïa u Dabid Syiem. Bad u Dabid u la pynkha ïa u Solomon na kaba la ju long ka tnga u Uriah;

⁷ bad u Solomon u la pynkha ïa u Roboam; bad u Roboam u la pynkha ïa u Abia; bad u Abia u la pynkha ïa u Asa;

⁸ bad u Asa u la pynkha ïa u Josaphat; bad u Josaphat u la pynkha ïa u Joram; bad u Joram u la pynkha ïa u Osias;

⁹ bad u Osias u la pynkha ïa u Joatham; bad u Joatham u la pynkha ïa u Ahas; bad u Ahas u la pynkha ïa u Esekaïas;

¹⁰ bad u Esekaïas u la pynkha ïa u Manasseh; bad u Manasseh u la pynkha ïa u Amon; bad u Amon u la pynkha ïa u Josaïah;

¹¹ bad u Josaïah u la pynkha ïa u Jekhoniah bad ïa ki para jong u, hamar ka por ba la ring mraw ïa ki sha Babilon.

¹² Hadien kata ka jingring mraw sha Babilon te, u Jekhoniah u la pynkha ïa u Salathiel; bad u Salathiel u la pynkha ïa u Sorobabel;

¹³ bad u Sorobabel u la pynkha ïa u Abiud; bad u Abiud u la pynkha ïa u Eliakim; bad u Eliakim u la pynkha ïa u Asor;

¹⁴ bad u Asor u la pynkha ïa u Sadok; bad u Sadok u la pynkha ïa u Akhim; bad u Akhim u la pynkha ïa u Eliud;

¹⁵ bad u Eliud u la pynkha ïa u Eleasar; bad u Eleasar u la pynkha ïa u Mathan; bad u Mathan u la pynkha ïa u Jakob;

¹⁶ bad u Jakob u la pynkha ïa u Joseph, uba u tnga ka Mari, na kaba la kha ïa U Jisu, ïa uba la khot “U Khrist”.

¹⁷ Kumta, ki pateng bynriew baroh naduh u Abraham haduh u Dabid ki la long khatsaw pateng; naduh u Dabid ruh haduh ka jingring mraw sha Babilon khatsaw pateng; bad naduh ka jingring mraw sha Babilon haduh U Khrist khatsaw pateng.

Ka jingkha ïa U Jisu Khrist

¹⁸ Ka jingkha ïa U Jisu Khrist te ka la long kumne: Haba ka kmie jong u, ka Mari, ka la ïatehktien bad u Joseph, mynba kim pat ïashem, la paw ba ka la punkhun keiñ na U Mynsiem Bakhuid.

¹⁹ Hynrei, u Joseph, u tnga jong ka, ba u da long u bahok, ba um mon ruh ban pynbna ïa ka ha ki briew, u la mut ban pyllait noh jar jar ïa ka.

²⁰ Hynrei, haba u dang puson ïa kine kiei kiei ruh, ha khmih, u angel U Trai u la paw ha u ha ka jingphohsniew, u da ong, “Ko Joseph, u khun u Dabid, wat sheptieng ban shim ha me ïa ka Mari ka tnga jong me: naba ita iba la pun ha ka, i long na U Mynsiem Bakhuid:

²¹ kan kha ruh ïa u khun; men khot ruh ïa ka kyrteng jong u, ‘U Jisu’: naba un pynim ïa la ki briew na ki pop jong ki.”

²² La leh ïa kane baroh te, ba kumta yn pyndep ïa kata ba la ong U Trai da u nongïathuhlypa, u da ong,

²³ “Ha khmih, kata ka theisotti kan punkhun, kan kha ruh ïa u khun, bad kin ïakhot ïa ka kyrteng jong u, ‘U Emmanuel,’ ” kaba long, haba la batai, “U Blei lem bad ngi”.

²⁴ Te haba u Joseph u la khie na kaba thiah, u la leh kumba la hukum u angel U Trai ïa u, bad u la shim ha u ïa ka tnga jong u:

²⁵ hynrei, um pat shym la ithuh ïa ka, tad ynda ka la kha ïa u khun nyngkong jong ka: u la khot ruh ïa ka kyrteng jong u, “U Jisu”.