MARKOS 9 - KA BAIBL

¹ Te u la ong ha ki, “Shisha nga ong ha phi, ba don kiba na kine kiba ïeng hangne, ki ban ym mad ïa ka jingïap, tad ynda ki la ïohi ïa ka hima U Blei ba ka la wan da ka bor.”

Ka jingkylladur

² Ynda la hynriew sngi te U Jisu u shim lem ïa u Petros, bad ïa u Jakob, bad ïa u Ïoannis, bad u leit lam ïa ki sha u lum bajrong kyrpang hi; bad la pynkylla dur ïa u ha khmat jong ki,

³ ki jaiñ jong u te ki la long kiba tyngshaiñ, kiba lieh eh, kat kata ruh ym don u nongpynkhuid jaiñ ha ka pyrthei uba lah ban pynlieh.

⁴ La paw ruh ha ki u Elias lem bad u Moses, bad ki da ïakren bad U Jisu.

⁵ Haba u Petros u ïathuh te u ong ha U Jisu, “Ko Kynrad, ka bha ïa ngi ban don hangne; ai ngin ïathaw te lai tylli ki ïing dara, kawei ïa me, kawei ruh ïa u Moses, bad kawei ruh ïa u Elias.”

⁶ Naba um tip ïa-ei ba un kren, naba ki la sheptieng eh.

⁷ Te la wan u lyoh uba kah ïa ki, bad ka ktien ka la wan na uta u lyoh, ka da ong, “Une u long U Khun jong nga uba ieit, to phin sngew ïa u.”

⁸ Te kyndit kyndit haba ki la khmih kylleng sawdong, kim ïohi shuh ïano ïano ruh, hynrei, tang ïa U Jisu hi lem bad ki hi.

⁹ Te haba ki dang hiar na uta u lum, u la hukum skhem ïa ki, ba kin ym ïathuh hano hano ruh ïa kiei kiei ruh ïa kiba ki la ïohi, tad ynda U Khun u briew u la mihpat na ki baïap.

¹⁰ Ki la ïabat skhem te ïa kata ka ktien, ba ki da ïakylli paralok hi, “Ka long aïu kata, ‘ban mihpat na ki baïap.’ ”

¹¹ Te ki la kylli ïa u, ki da ong, “Balei ba ki ong ki nongthoh ba ka dei ïa u Elias ban wan shuwa?”

¹² U te u da ïathuh, u la ong ha ki, “U Elias shisha u wan shuwa, bad u pynbha ïa kiei kiei baroh ruh; bad kumno la thoh shaphang U Khun u briew? ba un shah bun kiei kiei ruh, bad ba yn ñiewbeiñ ïa u.

¹³ Hynrei, nga ong ha phi, ba u Elias u la wan, bad ki la leh ïa u katba ki la imon, kumba la thoh shaphang jong u.”

U Jisu u pynkhiah ïa u khynnah u bapang bhur

¹⁴ Haba ki la wan te sha ki synran, ki la ïohi ïa u paidbah babun tawiar ïa ki, bad ïa ki nongthoh ruh ba ki ïasaid bad ki.

¹⁵ Te kumne kumne ruh, uta u paidbah baroh, haba ki la ïohi ïa u, ki la sngewkyndit eh, bad haba ki la phet sha u, ki la nguh ïa u.

¹⁶ U la kylli te ïa ki, “Ïa-ei ba phi ïasaid bad ki?”

¹⁷ Uwei te na uta u paidbah u la ïathuh, u la ong ruh, “Ko Nonghikai, nga la wallam ha me ïa u khun jong nga, uba don u mynsiem bymnangkren;

¹⁸ shaei shaei ruh ba u lap ïa u, u lympat ïa u, te u sei tyrtho, bad u kyr-iat ïa la ki bniat, bad u nangswai ruh: nga la ong te ha ki synran jong me ba kin beh noh ïa u, te kim lah satia.”

¹⁹ Te U ïathuh bad U ong ha ki, “A phi ka pateng bynriew bymngeit, sa katno ngan long bad phi? Sa katno ngan shah ïa phi? To wallam ïa u ha nga.”

²⁰ Ki la wallam te ïa u ha U, bad haba u la ïohi ïa U, kumne kumne ruh, uta u mynsiem u la ring kyrthat ïa u; bad haba u la kyllon ha ka khyndew, u la ksaid, u da sei tyrtho ruh.

²¹ U la kylli te ïa u kpa jong u, “Ka la slem katno naduh ba la jia kane ha u?” U la ïathuh te, “Naduh ba dang khynnah;

²² u ju pynnoh jyndei ruh ïa u ha ka ding bad ha ki um, ban pynjot ïa u: hynrei, lada me lah ei ei ruh, to isynei ïa ngi, bad to ïarap ïa ngi.”

²³ U Jisu u la ong ha u te, “Lada me lah ban ngeit! Kiei kiei baroh ki long kiba lah ïa uta uba ngeit.”

²⁴ Te kumne kumne ruh, haba u kpa uta u khynnah u la ïam jam, u la ong bad ki jingjaw ummat ruh, “Nga ngeit, A Trai; to ïarap ïa ka jingbymngeit jong nga.”

²⁵ Te haba U Jisu u la ïohi ba u paidbah u ïaphet lang sha U, U la sneng ïa uta u mynsiem bymkhuid, U da ong ha u, “Ko mynsiem bymnangkren bad bakyllut, nga hukum ïa me, ‘To mih noh na u, wat leit bsut shuh ruh ha u.’ ”

²⁶ Haba u la lynñiar te, bad u la ring kyrthat ïa u shikatdei, u la mih noh bad uta u khynnah u la long kum uba la ïap, katba shibun ki ong, “Ba u la ïap.”

²⁷ Hynrei, U Jisu haba u la bat ïa u na ka kti, U la khyllie ïa u, u de u la ïeng joit.

²⁸ Haba U la leit te hapoh ïing, ki synran jong U ki la kylli ïa U jar jar, “Balei ba ngi ngim lah ban beh noh ïa u?”

²⁹ U la ong te ha ki, “Ïa u kynja une ym lah ban pynmih noh da ei da ei ruh em, hynrei, tang da ka jingduwai bad ka jingit.”

U Jisu u ïathuhlypa pat ïa ka jingïap bad ka jingmihpat jong u

³⁰ Haba ki la ïaleit noh nangta ruh, ki la ïa-ïaid lyngba ïa ka Galilaïa; um mon te ïano ïano ruh ban tip.

³¹ Naba u la hikai ïa ki synran jong u, bad u la ong ha ki, “Yn sa aiti noh ïa U Khun u briew ha ki kti ki briew, bad kin pynïap ïa u, te haba la pynïap, un sa mihpat ha ka balai sngi.”

³² Hynrei, kim shemphang ïa kata ka jingong, bad ki la sheptieng ban kylli ïa u.

Uei uba kham khraw?

³³ U la poi ruh ha Kapernam: te haba u dang don ha ïing, u la kylli ïa ki, “Kaei ba phi la ïasaid paralok ha lynti?”

³⁴ Hynrei, ki la shu sngap, naba ki la lah ïasaid hi paralok ha lynti, uei u ban kham khraw.

³⁵ Haba u la shong te u la khot ïa ki khat-ar ngut, bad u la ong ha ki, “Lada uno uno ruh u kwah ban long shuwa, un long u bakhatduh na ki baroh, bad u shakri jong ki baroh.”

³⁶ Haba U la shim te ïa u khynnah, U la pynïeng ïa u hapdeng jong ki; bad haba U la shim kynthup ïa u, U la ong ha ki,

³⁷ “Uno uno ruh u ban pdiang ïa uwei na kum kine ki khynnah ha ka kyrteng jong nga, u pdiang ïa nga: bad uno uno ruh uba pdiang ïa nga, um pdiang ïa nga hi, hynrei, ïa uta keiñ uba la phah ïa nga.”

U bym ïaleh bad ngi, u long ha ka liang jong ngi

³⁸ U Ïoannis u la ong ha u, “Ko Nonghikai, ngi la ïohi ïa uwei uba beh noh ïa ki ksuid ha ka kyrteng jong me; te ngi la adong ïa u, namar um ïabud lok bad ngi.”

³⁹ Hynrei, U Jisu u la ong, “Wat adong shuh ïa u; naba ym don uba leh ïa ka kambah ha ka kyrteng jong nga, uba lah shen ruh ban kren sniew ïa nga:

⁴⁰ naba jar u bym ïaleh ïa ngi, u long ha ka liang jong ngi.

⁴¹ Naba uno uno ruh u ban ai ha phi ban dih shi khuri ka um ha ka kyrteng jong nga, namar ba phi long ki jong U Khrist, shisha nga ong ha phi, un ym duh da lei lei ïa la ka nong.

Shaphang ki jingjynthut

⁴² “Jar u ban pynthut te ïa uwei na kine ki barit kiba ngeit ha nga, ka la kham bha ïa u lada la teh da u mawtylliat bakhraw ha ka ryndang jong u, bad la bred ruh ïa u ha duriaw.

⁴³ Lada ka kti jong me te ka pynthut ïa me, to ot noh ïa ka: ka bha ïa me ban leit bsut dkoh sha ka jingim, ban ïa kaba me don ar tylli ki kti ban leit sha dujok, sha ka ding bymjulip,

⁴⁴ sha kaba u ksaiñ jong ki um ïap, bad ka ding kam ju lip.

⁴⁵ Lada ka kjat jong me ruh ka pynthut ïa me, to ot noh ïa ka: ka bha ïa me ban leit bsut dkoh sha ka jingim, ban ïa kaba me don ar tylli ki kjat ban bred ïa me ha dujok, sha ka ding bymjulip,

⁴⁶ sha kaba u ksaiñ jong ki, um ïap, bad ka ding, kam ju lip.

⁴⁷ Lada ka khmat jong me ruh ka pynthut ïa me, to khlaw noh ïa ka: ka bha ïa me ban leit bsut sha ka hima U Blei tang da kawei ka khmat, ban ïa kaba me don ar tylli ki khmat ba'n bred ïa me ha dujok ding,

⁴⁸ sha kaba u ksaiñ jong ki, um ïap, bad ka ding, kam ju lip.

⁴⁹ Naba ïa u briew baroh yn kyllan mluh da ka ding, kumba kyllan mluh da ka mluh ïa ka jingkñia baroh.

⁵⁰ Ka mluh ka bha: hynrei, lada kata ka mluh ka la kylla blad, te da ei phin pynthiang pat ïa ka? To phin ïadon mluh ha lade lade, to phin ïasuk ruh paralok hi.”