MARKOS 8 - KA BAIBL

Kaba bsa ïa ki saw hajar

¹ Ha kita ki sngi, mynba la don pat u paidbah babun eh, bad ba kim don ei ei ruh ban bam, U Jisu u la khot ha u ïa ki synran jong u, bad u ong ha ki,

² “Nga sngewsynei ïa u paidbah; naba mynta la lai sngi ki la ïashong bad nga, bad kim don shuh ei ei ruh ban bam:

³ lada ngan phah noh jingit ïa ki sha la ïing, kin ïap tyrsaw noh ha lynti; naba na ki don kiba la wan na sha jngai.”

⁴ Ki synran jong u te ki la ïathuh ha u, “Nangno yn lah ban pynkdang ïa kine da u kpu hangne ha ka jaka kynjah?”

⁵ Te u la kylli ïa ki, “Phi don katno ki kpu?” Bad ki la ong, “Hynñiew tylli.”

⁶ U la hukum te ïa uta u paidbah ban shong ha khyndew: te haba u la shim ïa kita ki hynñiew tylli ki kpu, bad ba u la lah nguh, u la kdiah, bad u la ai ha ki synran jong u, ban buh ha khmat jong ki; ki ruh ki la buh ha khmat uta u paidbah.

⁷ Ki la don ruh khyndiat ki dohkha rit: te haba u la lah kyrkhu, u la ong ban buh ïa kita ruh ha khmat jong ki.

⁸ Kumta, ki la ïabam, bad ki la kdang: bad ki la ïakhar hynñiew tukri na kiba lwet kiba la sah tam.

⁹ Kita kiba la ïabam te ki don kumba saw hajar: bad u la phah noh ïa ki.

¹⁰ Te kumne kumne ruh, haba u la leit ha ka lieng lem bad ki synran jong u, u la wan sha ki phang ka Dalmanutha.

Ki Pharisi ki ïawad ïa ka dak

¹¹ Te ki Pharisi ki la mih noh, bad ki la sdang ban ïakylli nia ïa u, ba ki ïawad na u ka dak na bneng, ki da ïatynjuh ïa u.

¹² Haba u la ud jylliew te ha la ka mynsiem, u la ong, “Balei ba kane ka pateng bynriew ka wad ïa ka dak? Shisha nga ong ha phi, yn ym ai ka dak ha kane ka pateng bynriew.”

¹³ Te haba u la iehnoh ïa ki, u la kiew pat ha kata ka lieng, bad u la leit noh sha shiliang.

U thiat ki Pharisi bad u jong u Herod

¹⁴ Te ki la klet ban wallam kpu, lymne kim shym don lem bad ki nalor uwei u kpu ha kata ka lieng.

¹⁵ Te u la hukum ïa ki, u da ong, “To sumar, to kiar na u thiat ki Pharisi, bad na u thiat u Herod.”

¹⁶ Ki te ki la ïakren hi paralok, ki da ong, “Ba ngim don kpu.”

¹⁷ Haba U Jisu te u la tip, u ong ha ki, “Balei phi ïakren naba phim don kpu? phim pat puson, lymne sngewthuh? phi dang don ka dohnud jong phi kaba eh?

¹⁸ haba phi don ki khmat, phim ïohi? haba phi don ki shkor ruh, phim ïohsngew? phim kynmaw ruh?

¹⁹ Mynba nga la kdiah ïa ki san tylli ki kpu ha kita san hajar, dap katno tukri na kiba lwet phi la ïakhar?” Ki ong ha u, “Khat-ar.”

²⁰ “Bad mynba ïa kita hynñiew tylli ha kita saw hajar, dap katno tukri na kiba lwet phi la ïakhar?” Ki la ong ruh, “Hynñiew.”

²¹ U la ong te ha ki, “Kumno ba phim pat sngewthuh?”

Kaba pynkhiah ïa u briew u bamatlah ha Bethsaida

²² Ki wan ruh sha Bethsaida; te ki wallam ha U ïa u bamatlah, bad ki ïakyrpad ïa U ban ktah ïa u.

²³ Te haba U la bat ïa uta u bamatlah na ka kti, U la ïalam noh ïa u shabar kata ka shnong; bad haba U la biah ha ki khmat jong u, bad ba U la buh ïa ki kti ha u, U la kylli ïa u, “Me ïohi ei ei?”

²⁴ Haba u la khmied te, u la ong, “Nga ïohi ki briew kum ki dieng ba ki ïaid.”

²⁵ Hadien kata, U la buh pat ïa la ki kti ha ki khmat jong u; bad U la pynkhmied ïa u; te la pynbha pat ïa u, bad u la ïohi shynna ïa kiei kiei baroh.

²⁶ Bad U la phah ïa u sha la ïing, U da ong, “Wat rung satia sha kato ka shnong.”

Ka jingphla u Petros shaphang U Jisu

²⁷ Te U Jisu u la leit noh bad ki synran jong u, sha ki nongrit jong ka Kaisaria Philippi: bad ha lynti u la kylli ïa ki synran jong u, u da ong ha ki, “Ïa nga, ki briew ki ong ba nga long uei?”

²⁸ Ki la ïathuh te, “U Ïoannis u Nongpynbaptis: kiwei, U Elias; kiwei pat de, Uwei na ki nongïathuhlypa.”

²⁹ Te u kylli ïa ki, “Hynrei, phi, phi ong ba nga long uei?” U Petros u ïathuh, u ong ha U, “Me long uta U Khrist.”

³⁰ U la hukum skhem te ïa ki, ba kin ym ïathuh hano hano ruh shaphang jong u.

U Jisu u ïathuhlypa shaphang ka jingïap bad ka jingmihpat jong u

³¹ Te u la sdang ban hikai ïa ki, ba ka dei ïa U Khun u briew ban shah shibun kiei kiei ruh, bad ba yn kyntait da ki tymmen basan, bad ki rangbah lyngdoh, bad ki nongthoh, bad ba yn pynïap ruh; bad hadien lai sngi un mihpat.

³² Ha kaba paw shynna ruh u la kren ïa kata ka jingong. Haba u Petros te u la shim kyrpang ïa U, u la sdang ban sneng ïa U.

³³ Hynrei, haba U la phai, bad ba U da khmih ha ki synran jong U, U la sneng ïa u Petros, U da ong, “Khie leit shadien jong nga, me u Soitan: naba mem ñiew ïa kiei kiei ruh ki jong U Blei, hynrei, tang ïa kiei kiei ruh ki jong ki briew.”

³⁴ Te haba U la khot ha U ïa u paidbah lem bad ki synran jong u, u la ong ha ki, “Jar uba mon ban wan bud nadien jong nga, ai ba un len ïa lade, bad un bah ïa la ka diengphna, bad un bud ïa nga:

³⁵ naba uno uno ruh u ban mon ban pynim ïa la ka mynsiem, un duh noh ïa ka; uno uno ruh u ban duh noh te ïa la ka mynsiem, na ka bynta jong nga bad ka jong ka gospel ruh, uta keiñ, un shem ïa ka.

³⁶ Naba u briew un myntoi aïu, lada un ïoh ïa ka pyrthei baroh, bad un duh noh ïa la ka mynsiem?

³⁷ naba u briew un ai aïu ban ïapeiñ ïa la ka mynsiem?

³⁸ naba uno uno ruh u ban sngewlehrain ïa nga bad ïa ki ktien jong nga, ha kane ka pateng bynriew baklim bad bapop, U Khun u briew ruh un lehrain ïa uta, haba u wan ha ka burom U Kpa jong u, lem bad ki angel bakhuid.”