MARKOS 6 - KA BAIBL

La ñiewbeiñ ïa U Jisu ha Nasaret

¹ U la leit noh nangta bad u la wan poi sha la ka ri: bad ki synran jong u ki bud ïa u.

² Te haba la poi ka Sabbaton, u la sdang ban hikai ha ka synagog: te bun haba ki ïohsngew ki la sngewkyndit, ki da ong, “Nangno une u la ïoh ïa kine kiei kiei ruh?” bad “Kaba kumno kane ka jingstad kaba la ai ha une u briew, bad ki kambah kat kine ba la leh da ki kti jong u?

³ une um long uto u misteri, u khun ka Mari, uba dei para bad u Jakob, bad u Josis, bad u Juda, bad u Simon de? bad ki para kynthei jong u kim don hangne bad ngi?” Kumta, ki la thut ha u.

⁴ Hynrei, U Jisu u la ong ha ki, “U nongïathuhlypa um long u bym donburom, hynrei, tang ha la ka ri, bad ha la ki kur, bad ha la ïing ruh.”

⁵ Hangta te um lah ban leh ïa ki kambah, hynrei, u shu buh ïa la ki kti ha khyndiat ki bapang, bad u la pynkhiah ïa ki.

⁶ U la sngewkyndit te namar ka jingbymngeit jong ki. Bad u la ïaid kylleng sawdong ïa ki nongrit, u da hikai.

Ka jingphah ïa ki khat-ar ngut

⁷ U la khot ruh ha u ïa ki khat-ar ngut, bad u la sdang ban phah ïa ki ar ar; bad u la ai bor ha ki halor ki mynsiem bymkhuid;

⁸ bad u la hukum ïa ki, ba kin ym rah ei ei ruh ïa la ka jingleit, hynrei, tang ïa u diengduh hi; lymne ki ïarong, lymne kpu, lymne pisa ha ka 'saipan jong ki,

⁹ hynrei, ban ïuh ïa ki khulom, bad ban ym phong ar tylli ki sopti.

¹⁰ U la ong ruh ha ki, “Ha-ei ha-ei ruh haba phin rung hapoh ka ïing, to shong hangta tad ynda phi mih noh nangta;

¹¹ te ha kano kano ruh ka jaka ka ban ym pdiang ïa phi, bad kim sngew ïa phi, haba phi mih noh nangta, to kynther noh ïa ka 'dewmet na ki poh'jat jong phi, ïa ka ban long ka jingphla ïa ki. Shisha nga ong ha phi, ba kan long kham jem ïa ka Sodom bad ïa ka Gomorra ha ka sngi bishar, ban ïa kaba ïa kata ka shnong.”

¹² Te haba ki la leit noh, ki la ïalap ba kin kylla-ka-bamut.

¹³ Ki la beh noh ruh shibun ki ksuid, bad ki la pynsleh da ka umphniang shibun ki bapang, bad ki la pynkhiah ïa ki.

Ka jingïap u Ïoannis Nongpynbaptis

¹⁴ U Herod syiem te u la ïohsngew shaphang jong U, naba la bna ka nam jong U, bad u la ong, “U Ïoannis uba ju pynbaptis, u la mihpat na ki baïap, te namar kata keiñ, kine ki borbah ki ïatrei ha u.”

¹⁵ Kiwei te ki la ong, “U long u Elias”, kiwei pat te ki la ong, “U long u nongïathuhlypa”, ne kum uwei na ki nongïathuhlypa.

¹⁶ Hynrei, haba u Herod u la ïohsngew, u la ong, “U Ïoannis, ïa uba nga la khrai khlieh, u la mihpat.”

¹⁷ Naba u Herod hi u la lah phah kem ïa u Ïoannis, bad u la lah khum ïa u ha ka byndi na ka bynta ka Herodias, ka tnga u Philip u para jong u; naba u la shongkurim ïa ka.

¹⁸ Naba u Ïoannis u la ong ha u Herod, “Bymbit ïa me ban ïoh ïa ka tnga u para jong me.”

¹⁹ Namar kata, ka Herodias ka la buhnud ïa u, bad ka la kwah ban pynïap ïa u, hynrei, kam lah.

²⁰ Naba u Herod u la ju sheptieng ïa u Ïoannis, ba u da tip ba u long u briew bahok bad bakhuid, u la ju da te ïa u; bad haba u la ïohsngew ïa u, u la ju leh shibun kiei kiei ruh, bad u la ju shahshkor sngewbha ïa u.

²¹ Hynrei, haba la poi ka sngi ba dei, mynba u Herod ha ka sngi kha jong u, u la thaw ka jingkhawai ïa ki rangbah jong u, bad ïa ki rangbah shihajar, bad ïa kiba kham donnam ha Galilaïa;

²² bad haba ka khun kata ka Herodias ka la wan hapoh, ka la shad, bad ka la pynsngewbha ruh ïa u Herod, bad ïa kita kiba ïashong bam lem bad u; bad uta u syiem u la ong ha kata ka khynnah, “Pan na nga kat kaba pha mon, te ngan ai ïa pha.”

²³ U la smai ruh ha ka, “Kaei kaei ruh ba phan pan na nga, ngan ai ïa pha, haduh shiteng ka hima jong nga.”

²⁴ Te haba ka la mih noh, ka la ong ha ka kmie jong ka, “Kaei ngan pan?” Ka te ka la ong, “Ka khlieh u Ïoannis u Nongpynbaptis.”

²⁵ Te kloi lan ka la wan hapoh sha uta u syiem, bad ka la pan, ka da ong, “Nga mon ba men ai ha nga kumne kumne ïa ka khlieh u Ïoannis u Nongpynbaptis ha ka pliang.”

²⁶ Uta u syiem te u la sngewsih eh, hynrei, na ka bynta kita ki jingsmai, bad na ka bynta kita kiba ïashong bam lem bad u, um mon ban kyrngah ïa ka.

²⁷ Te kumne kumne ruh uta u syiem u la phah ïa u nongkhrai khlieh, bad u la hukum ban wallam ïa ka khlieh jong u.

²⁸ Te haba u la leit, u la khrai khlieh ïa u ha ka byndi, bad u la wallam ïa ka khlieh jong u ha ka pliang, bad u la ai ïa ka ha kata ka khynnah: bad kata ka khynnah ka la ai ïa ka ha ka kmie jong ka.

²⁹ Te haba ki synran jong u ki la ïohsngew, ki la wan bad ki la rah noh ïa ka met jong u, bad ki la tep ïa ka ha ka jingtep.

Kaba bsa ïa ki san hajar

³⁰ Te ki apostol ki la ïalum lang ha U Jisu, bad ki la ïathuh ïa kiei kiei baroh ha u, kat kiba ki la lah leh, bad kat kiba ki la lah hikai.

³¹ U la ong te ha ki, “To ale ma phi hi kyrpang sha ri khlaw, bad shongthait khyndiat”: naba don shibun kiba ïawan ïaleit ruh, katba kim kloi shuh wat ban bam ruh.

³² Kumta, ki la leit noh da ka lieng sha ka jaka kynjah kyrpang hi.

³³ Hynrei, ki paidbah ki la ïohi ïa ki ba ki dang leit, shibun ruh ki la ithuh ïa ki; te ki la phet lang hangta na sha ryngkew na ki shnong baroh, bad ki la shuwa ïa ki, bad ki la ïawan lang sha u.

³⁴ Haba U Jisu te u la mih noh, u la ïohi ïa u paidbah babun, bad u la sngewsynei ïa ki, naba ki long kum ki langbrot khlem u nongsharai; te u la sdang ban hikai bun kiei kiei ruh ïa ki.

³⁵ Haba ka la noh eh ïan ka sngi, te ki synran jong u ki la wan ha u, bad ki ong, “Kane ka long ka jaka kynjah, bad ka sngi ka la noh eh ïan ruh;

³⁶ to pyllait noh ïa ki, ba kin ïoh leit kylleng sawdong sha ki ri bri bad sha ki shnong rit ban thied jingbam ïa lade, naba kim don ei ei ruh ban bam.”

³⁷ U te u la ïathuh bad u la ong ha ki, “To ai ma phi ba kin bam.” Ki te ki ong ha u, “Hato ngin leit ïathied arspah suka u kpu, bad ai ruh ha ki ban bam?”

³⁸ U ong te ha ki, “Katno tylli ki kpu phi don? Khie leit khmih.” Haba ki la tip, ki ong, “San, bad ar tylli ki dohkha.”

³⁹ U la hukum te ïa ki, ba baroh kin shong shaniah lynnong lynnong halor u phlang bajyrngam.

⁴⁰ Te ki la shong shaniah ter ter, shispah shispah, bad sanphew sanphew ruh.

⁴¹ Haba u la shim te ïa kita san tylli ki kpu bad ïa kita ar tylli ki dohkha ruh, haba u la khmied sha bneng, u la nguh, bad u la kdiah ruh ïa ki kpu, bad u la ai ha ki synran jong u, ba kin buh ha khmat jong ki; bad ïa kita ki dohkha u la ïasam ha ki baroh.

⁴² Baroh ki la ïabam, bad ki la ïakdang ruh.

⁴³ Bad ki la ïakhar ruh dap khat-ar tukri, na kiba lwet bad na ki dohkha ruh.

⁴⁴ Kita te kiba la ïabam ïa kita ki kpu, ki long jin san hajar ki rangbah.

U Jisu u ïaid halor ka duriaw

⁴⁵ Te kumne kumne ruh, u la phah ïa ki synran jong u ba kin kiew halor ka lieng, bad ban nang leit shuwa sha shiliang sha Bethsaida, katba u hi u nang pyllait ïa u paidbah.

⁴⁶ Ynda u la bidai noh te ïa ki, u la leit sha u lum ban duwai.

⁴⁷ Haba la janmiet, kata ka lieng ka la don hapdeng ka duriaw, u te tang weibriew hi ha ryngkew.

⁴⁸ U la ïohi te ïa ki, ba ki shitom da kaba ki ïaking, naba ka lyer ka la beh pyrshah ïa ki: te hamar ka jingap miet ka basaw, u wan ha ki, u da ïaid halor duriaw; bad u la leh kum ban sa ïaid kiar ïa ki.

⁴⁹ Hynrei, ki, haba ki la ïohi ïa u ba u ïaid halor duriaw, ki la ïamut ba ka la long rngai, bad ki la ïalynñiar jam ruh,

⁵⁰ naba baroh ki la ïohi ïa u, bad ki ïasngewkyiuh eh. Hynrei, kumne kumne ruh, u la kren ha ki, bad u ong ha ki, “To long shlur, dei ma nga, to wat sheptieng.”

⁵¹ Bad u la kiew sha ki halor kata ka lieng; te kata ka lyer ka la jem jai: hangta ki la sngewkyndit noh shikatdei eh ha lade, bad ki la sngewphylla.

⁵² Naba kim shym sngewthuh shaphang kita ki kpu; hynrei, ka dohnud jong ki ka la long kaba eh.

U Jisu u pynkhiah ïa ki bapang ha ka ri Gennesaret

⁵³ Haba ki la poi te sha shiliang, ki la wan ha ka ri Gennesaret, te hangta ki la kiew sha ryngkew.

⁵⁴ Haba ki la mih noh te na kata ka lieng, ki la ithuh ïa u kumne kumne ruh,

⁵⁵ bad haba ki la ïaphet kylleng sawdong kata ka ri baroh, ki la sdang ban ïabah na kylleng ha ki jingthiah ïa kiba la pang, kat shaba ki la sngew ba u don.

⁵⁶ Shano shano ba u leit bsut ruh sha ki nongrit, lane sha ki nongbah, lane sha ki ri bri, ki la buh ïa ki bapang ha ki jaka ïew, bad ki la kyrpad ïa u, ba kin shu ïoh ktah ïa ka rmiang ka jaiñ jong u: te kat kiba la ïoh ktah ïa u, la pynkhiah ïa ki phar.