MARKOS 5 - KA BAIBL

U Jisu u pynkhiah ïa uba shong ksuid

¹ Ki la poi ruh sha shiliang ka duriaw sha ka ri ki nong Gadara.

² Haba U la mih noh te na kata ka lieng, kumne kumne ruh, la wan tan ïa U na ki maw jingtep u briew bashong mynsiem bymkhuid,

³ uba ju don ka jaka shong sah hapdeng kita ki maw jingtep; te ym don mano mano ruh ba lah ban khum ïa u, em, wat da ki kynjri;

⁴ naba la ju khum jyndei ïa u da ki narkjat, bad da ki kynjri; hynrei, ïa ki kynjri u la ju bthat, bad ïa ki narkjat u la ju pynbthat lyngkhot lyngkhot: bad ym ju don mano mano ruh ba lah ban pynjuh ïa u.

⁵ Te khlem da pud, mynmiet bad mynsngi, u ju don ha kita ki maw jingtep bad ha ki lum ruh, u da lynñiar, bad u da ot ïa lade da ki maw.

⁶ Haba u la ïohi te ïa U Jisu na jngai, u la phet bad u la mane dem ïa U,

⁷ bad u la lynñiar da ka ktien bajam bad u la ong, “Me donkam aïu bad nga, ko Jisu, U Khun U Blei U Bahakhlieh Tam Eh? Nga pynsmai ïa me da U Blei, ba men ym pynshitom ïa nga.”

⁸ (Naba U la lah ong ha u, “Me mynsiem bymkhuid, to mih noh na une u briew.”)

⁹ Te U la kylli ïa u, “Kaei ka kyrteng jong me?” U te u la ïathuh, u da ong, “Ka kyrteng jong nga long ‘U Paidbah’: naba ngi long shibun.”

¹⁰ U la kyrpad ruh ïa U shikatdei, ba un ym phah noh ïa ki na kata ka ri.

¹¹ Te la don hangta ha syndah u lum, shi kynhun bah ki sniang kiba bam phlang.

¹² Kita ki ksuid baroh te ki la ïakyrpad ïa U, ki da ong, “To phah ïa ngi ha kito ki sniang, ba ngin rung hapoh jong ki.”

¹³ Bad U Jisu u la shah ïa ki. Haba la mih noh te kita ki mynsiem bymkhuid, ki la leit hapoh kita ki sniang: baroh shi kynhun, te ki la phet ïap arsut ïa ka riat sha ka duriaw (ki la don ruh kumba ar hajar), bad ki la ïap jyllop ha kata ka duriaw.

¹⁴ Kita kiba ïa-ap ïa ki sniang, te ki la phet noh, bad ki la ïathuh ha kata ka shnong bad ha kita ki ri bri: ki, te ki la ïamih ban khmih kaei kata ba la leh.

¹⁵ Bad ki wan ha U Jisu, bad ki ïohi ïa uta uba ju shong ksuid ba u shong, bad ba u la kup jaiñ, bad ba u la tipbriew, ïa uta keiñ uba la ju don “u Paidbah”: bad ki la sheptieng.

¹⁶ Kita kiba la lah ïohi, te ki la ïathuh ha ki kumno ka la long ïa uta uba ju shong ksuid, bad shaphang kita ki sniang ruh.

¹⁷ Bad ki la sdang ban ïakyrpad ïa U ban leit noh na ki phang jong ki.

¹⁸ Haba U dang leit te ha kata ka lieng, uta uba la ju shong ksuid u la duwai ïa U ba un ïoh long lem bad U.

¹⁹ Te um shah ïa u, hynrei, U ong ha u, “Khie leit sha la ïing sha la ki jong ruh, bad to ïathuh ha ki, ïa kaba katno ba U Trai u la leh ïa me, bad kumno u la isynei ïa me.”

²⁰ Kumta, u la leit noh, bad u la sdang ban pynbna ha Dekapolis ïa kiba katno kiei kiei ruh ba U Jisu u la leh ha u; te baroh ki la kyndit.

Ka khun u Jairos bad ka kynthei ka bapang mihsnam

²¹ Haba U Jisu te u la leit pat da ka lieng sha shiliang, u paidbah byllien u la ïalum lang ha U: U te U don harud ka duriaw.

²² Te uwei na ki rangbah synagog u wan, uba kyrteng “u Jairos”; bad haba u ïohi ïa U, u la dem ha ki kjat jong U;

²³ bad u la duwai shikatdei ïa U, u da ong, “Ka khun rit jong nga ka ha tmier ka jingïap: to wan buh ïa la ki kti ha ka, ban ïoh pynkhiah ïa ka, ba kan im.”

²⁴ Kumta, U la leit lem bad u: te la bud ïa U, u paidbah byllien, bad ki la ïakyntur ïa U.

²⁵ Ka kynthei ruh kawei kaba don ka jingpang mihsnam la khat-ar snem,

²⁶ bad kaba la lah shah shitom bun kiei kiei ruh na ki bun ki nongpynkhiah, bad kaba la lah pynlut baroh katba don ki jong ka, te khyndiat ruh em kam shym koit, hynrei, ka la nang pang pynban;

²⁷ haba ka la ïohsngew shaphang U Jisu, ka la wan hapdeng uta u paidbah na shadien, bad ka la ktah ïa ka jaiñkup jong U.

²⁸ Naba ka la ong, “Lada ngan shu ïoh ktah tang ïa ki jaiñkup jong U, ngan sa khiah.”

²⁹ Te kumne kumne ruh, kata ka jingkyrsoi ka snam jong ka, ka la rngad noh; bad ka la sngewthuh ha la ka met ba ka la ïoh khiah na kata ka jingpang shitom.

³⁰ U Jisu kumne kumne ruh, ba U tip ha lade ba kata ka bor ka la lah mih noh na U, haba U la phai hapdeng uta u paidbah, U la ong, “Ei ba ktah ïa ki jaiñ jong nga?”

³¹ Ki synran jong U te ki la ong ha U, “Me ïohi ïa u paidbah uba kyntur ïa me, me ong ruh, ‘Ktah mano ïa nga?’ ”

³² Te U la khmih baroh sawdong ban ïohi ïa kata kaba la lah leh ïa kane.

³³ Hynrei, kata ka briew, da kaba sheptieng bad ba khynñiuh, ba ka da sngewthuh ïa kaei ba la leh ha ka, ka la wan bad ka la dem ngon ha khmat jong U, bad ka la ïathuh ha U ïa kaba shisha baroh.

³⁴ U la ong te ha ka, “Ko khun, ka jingngeit jong pha ka la pynkhiah ïa pha; to khie leit ha kaba suk, bad to long kaba la khiah bha na ka jingpang shitom jong pha.”

³⁵ Haba U dang kren, la wan kiba na ka ïing uta u rangbah synagog, ki da ong, “Ka khun jong me ka la ïap; balei men pynshitom shuh ïa U Nonghikai?”

³⁶ Te haba U Jisu u la ïohsngew ïa kata ka ktien ba la kren, U ong ha uta u rangbah synagog, “Wat sheptieng, tang shu ngeit.”

³⁷ Um shah te ïano ïano ruh ban bud lem ïa U, hynrei, tang ïa u Petros, bad ïa u Jakob, bad ïa u Ïoannis u para u Jakob.

³⁸ Kumta, U poi sha ka ïing uta u rangbah synagog, bad U ïohi ïa ka jingkhihwin, bad ïa kiba ïambriew bad ïa kiba lynñiar shikatdei eh.

³⁹ Haba U la leit hapoh te, U ong ha ki, “Balei phi ïawin, bad phi ïaïambriew kumne? ka khynnah kam shym la ïap, hynrei, ka shu thiah.”

⁴⁰ Ki te ki la rkhiebeiñ ïa U. Hynrei, haba U la pynmih noh ïa ki baroh, U shim lem ïa u kpa bad ïa ka kmie jong kata ka khynnah, bad ïa kita kiba don lem bad U, bad U la leit hapoh, sha kaba don kata ka khynnah.

⁴¹ Te haba U la bat na ka kti ïa kata ka khynnah, U ong ha ka, “Talitha kumi;” kaba, haba la batai, ka long, “Ko khynnah, nga ong ha pha, to ïeng”.

⁴² Kumne kumne ruh, kata ka khynnah ka la ïeng joit, bad ka la ïaid (naba ka la khat-ar snem ka rta); te ki la kyndit da ka jingkyndit bakhraw.

⁴³ Te U la hukum skhem ïa ki, ba uno uno ruh un ym tip ïa kane: U la hukum ruh ban ai ei ei ïa ka, ban bam.