MARKOS 4 - KA BAIBL

Ka pharshi u Nongbet

¹ U la sdang ruh ban hikai pat harud ka duriaw: te u paidbah byllien u la wan lang ha U, katba U la kiew ha ka lieng ban ïoh shong halor ka duriaw; uta u paidbah baroh te u la don harud kata ka duriaw ha ryngkew.

² Te U la hikai ïa ki, bun kiei kiei ruh ha ki pharshi, bad U la ong ha ki ha ka jinghikai jong U,

³ “To sngew: Ha khmih, u nongbet u la leit noh ban bet:

⁴ te ka la jia haba u dang bet, ba don uba la hap harud lynti, bad ki sim bneng ki la wan bad ki la bam ïa u:

⁵ te uwei pat u la hap halor ka jaka maw, ha ka bymdon bun khyndew; te kumne kumne ruh, u la mih, naba kam long jylliew ka khyndew:

⁶ haba ka la ïeng ka sngi, te u la shit tyrkhong eh; bad naba um don thied, u la ïap ryngkhiang:

⁷ uwei pat te u la hap hapdeng ki dieng shiah; te kita ki dieng shiah ki la ïamih, bad ki la ïakjap ïa u; te um shym la sei soh:

⁸ uwei pat te u la hap ha ka khyndew ka babha, bad u la sei soh ba mih bad ba man bun de; te u la sei uba laiphew shah, bad uba hynriewphew shah, bad uba shispah shah.”

⁹ Te u la ong ha ki, “Uba don ki shkor ban sngew, to un sngew.”

Ka jingthmu jong ki pharshi

¹⁰ Haba u la long te kyrpang weibriew, kita kiba hajan jong u lem bad kita ki khat-ar ngut, ki la kylli ïa u shaphang kata ka pharshi.

¹¹ U la ong te ha ki, “Ha phi keiñ, la ai ban tip ïa ka maïan ka hima U Blei: hynrei, ha kita kiba shabar, ïa kiei kiei baroh yn leh keiñ, ha ki pharshi:

¹² “ ‘Ba ïa kaba ki ïohi kin ïohi, te kin ym ishemphang shuh; bad ïa kaba ki ïohsngew kin ïohsngew, te kin ym sngewthuh shuh; ba ïoh kumta kin kylla, bad yn map ïa ki.’ ”

U Jisu u batai ïa ka pharshi u Nongbet

¹³ U la ong ruh ha ki, “Phim tip ïa kane ka pharshi? kumno te phin tip ïa ki pharshi baroh?

¹⁴ Uta u nongbet u bet ïa ka ktien:

¹⁵ Kine te long kita kiba harud lynti, ha kaba la bet ïa ka ktien; hynrei, haba ki la ïohsngew, kumne kumne ruh u Soitan u wan, bad u rong noh ïa kata ka ktien ba la bet ha ki dohnud jong ki:

¹⁶ kumjuh ruh kine ki long kita kiba la bet halor ka jaka maw, kiba, haba ki la ïohsngew ïa kata ka ktien, kumne kumne ruh ki pdiang ïa ka da kaba kmen;

¹⁷ hynrei, ba kim don thied ha lade, ki long tang shibit; hadien te, haba ka jia kaba jynjar ne kaba lehbeiñ na ka bynta kata ka ktien, kumne kumne ruh, ki la thut:

¹⁸ kine ruh ki long kita kiba la bet hapdeng ki dieng shiah; kiba ju sngew ïa ka ktien,

¹⁹ te ki jingkhuslai kane ka pyrthei, bad ka jingshukor ka spah, bad ki jingikwah eh shaphang kiwei kiwei de, haba ki ïaleit hapoh, ki ïakjap ïa kata ka ktien, te kam sei soh shuh.

²⁰ Kine te ki long kita kiba la bet ha ka khyndew ka babha; kiba ïohsngew ïa kata ka ktien, bad kiba pdiang ïa ka, bad kiba sei soh, uba laiphew shah, bad uba hynriewphew shah, bad uba shispah shah de.”

Ka sharak hapoh ka shang

²¹ U la ong ruh ha ki, “Ki ju wallam ïa ka sharak, ba yn buh hapoh ka shang, lane hapoh ka jingthiah? bad ban ym buh ha ka dieng pynïeng sharak?

²² naba ym don kaei kaei ruh ba la tap, ïa kaba yn ym pynpaw; lymne ym ju don kaei kaei ruh ba la buhrieh, hynrei, khnang ba kan wan paw:

²³ lada uno uno ruh u don ki shkor ban sngew, to un sngew.”

²⁴ U la ong ruh ha ki, “To sumar kumno ba phi sngew: da ka jingthew ba phi thew, yn thew ïa phi; ha phi kiba sngew, yn ai kham bun ruh;

²⁵ naba jar uba don, ha uta yn ai: bad jar u bymdon, wat ïa kata kaba u don yn shim noh na u.”

Ka pharshi u symbai uba san ha kaba rieh

²⁶ U la ong ruh, “Kumta long ka hima U Blei, kumba u briew un bet ïa u symbai ha ka khyndew,

²⁷ bad ba un ïohthiah, bad ba un khie ruh mynmiet bad mynsngi, bad uta u symbai un mih, bad un nang san, kumno, u um tip shuh:

²⁸ naba ka khyndew na lade hi ka sei soh; ka banyngkong u speh, hadien ka kop, hadien kata pat, u soh Kew ba la met ha ka kop:

²⁹ hynrei, haba la ih uta u soh, kumne kumne ruh u sei ïa ka rashi, naba ka aïom ot ka la poi.”

Ka pharshi u symbai tyrso

³⁰ U la ong ruh, “Kum kaei ngin ïatharai ïa ka hima U Blei? ne da kano ka pharshi ngin ïatharai ïa ka?

³¹ Ka long kum u symbai tyrso, ïa uba, haba la bet ha ka khyndew, la u long kham rit ïa ki symbai baroh kiba don ha ka khyndew;

³² hynrei, haba la bet, u mih u san, bad u long kham khraw ïa ki jhur baroh, bad u sei ïa ki tnat bakhraw, katba ki sim bneng ki lah ban shongtngen hapoh ka syrngiew jong u.”

U Jisu u kren da ki pharshi

³³ Da ki bun ki pharshi ruh kum kine u la kren ïa ka ktien ha ki, katba ki lah ban sngew-shemphang ïa ka.

³⁴ Bad khlem ka pharshi, um shym la kren ha ki: te haba kyrpang hi u la ju pynpaw ïa kiei kiei baroh ha ki synran jong u.

U Jisu u pynjai jai ïa ka 'erïong

³⁵ U la ong ruh ha ki ha kata ka sngi, haba la janmiet, “Ïa ngin ïaleit sha shiliang.”

³⁶ Haba ki la iehnoh te ïa u paidbah, ki la leit lam ïa U kumba U long, ha ka lieng; hynrei, don kiwei pat ruh ki lieng lem bad U.

³⁷ Te la khih ka 'erïong ka bakhraw, bad ki jingat phyllung ki la phaloh sha ka lieng, kat ban sa pyndap ïa ka.

³⁸ U te u la don ha ka tdong ka lieng, ba u ïohthiah ha ka syngkhlieh; ki te ki kyrsiew ïa u, bad ki ong ha u, “Ko Kynrad, mem suidñiew satia ba ngin sa ïap?”

³⁹ Haba u la khie te, u la sneng ïa ka lyer, bad u la ong ha ka duriaw, “Long jai jai, wat khih shuh.” Kumta, kata ka lyer ka la jem jai, bad ka la long kaba jai jai eh.

⁴⁰ U la ong te ha ki, “Balei phi long kiba sheptieng katta katta? kumno ba phim pat don ka jingngeit?”

⁴¹ Hynrei, ki la sheptieng shikatdei eh, bad ki la ïakren paralok hi, “Une u long uei shisha, ba ka lyer ruh bad ka duriaw de ki ïakohnguh ïa u?”