MARKOS 3 - KA BAIBL

U briew uba don ka kti ka baïap

¹ Te U la leit pat hapoh ka synagog; bad la don hangta u briew uba la ïap ka kti.

² Te ki la ïa-ap thap ïa U, lada un pynkhiah ïa u ha ka sngi Sabbaton; ba kin ïoh kem daw ïa U.

³ U ong te ha uta u briew uba la ïap ka kti, “To ïeng hapdeng.”

⁴ Te U ong ha ki, “Ka bit ïa ka ban leh bha ha ka sngi Sabbaton, lane ban leh sniew? ïa ka ban pynim ïa ka jingim, lane ban pynïap?” Hynrei, ki la sngap jar.

⁵ Te ynda U la khmih sawdong ha ki da ka jingbitar, ba U da sngewsih namar kaba eh ka dohnud jong ki, U ong ha uta u briew, “To kner noh ïa la ka kti.” Te u la kner noh, bad la pynkhiah bha ïa kata ka kti jong u.

⁶ Haba ki Pharisi te ki la leit noh, kumne kumne ruh, ki la ïasylla bad ki nongbud u Herod pyrshah ïa U, kumno ba kin ïoh pynïap noh ïa U.

U paidbah byllien harud duriaw

⁷ Hynrei U Jisu u la kynriah noh lem bad la ki synran sha ka duriaw, te ki paidbah byllien ki la ïabud ïa u na Galilaïa, bad na Judia,

⁸ bad na Jerusalem, bad na Idumia, bad na sha shiliang ka Jordan ruh; bad kiba na shaphang Tyros bad Sidon, u paidbah byllien kiba haba ki la ïohsngew ïa kaba katno u la leh, ki la ïawan ha u.

⁹ U la ong te ha ki synran jong u, ba ka lieng rit kan ap hajan jong u, namar uta u paidbah, ïoh ba kin kyntur ïa u.

¹⁰ Namar u la lah pynkhiah shibun, katba kita baroh kiba la ngat ki jingpang kordit ki la wan kyrthep ha u ba kin ïoh ktah ïa u.

¹¹ Ki mynsiem bymkhuid ruh, haba ki la ïohi ïa u, ki la dem khrup ha khmat jong u, bad ki la ïapyrta, ki da ong, “Me long U Khun U Blei!”

¹² U te u la hukum skhem ïa ki, ba kin ym pynbna ïa u.

U Jisu u jied ïa ki khat-ar ngut

¹³ Ynda kumta, u kiew sha u lum, bad u khot ha u ïa kiba u mon hi, te ki la wan ha u.

¹⁴ Bad u la thung ïa ki khat-ar ngut, ba kin ïoh long lem bad u, bad ba un ïoh phah ïa ki ban ïalap,

¹⁵ bad ba kin ïoh bor ban pynkhiah ïa ki jingpang bad ban beh noh ïa ki ksuid,

¹⁶ bad ïa u Simon u la sin “Petros”;

¹⁷ bad u Jakob u khun u Sebedi, bad u Ïoannis u para u Jakob (te ïa kita u la sin “Boanerjes”, kata ka long, “Ki khun u pyrthat”);

¹⁸ bad u Andriw, bad u Philip, bad u Bartholomai, bad u Mathaïos, bad u Thomas, bad u Jakob u khun u Alphaïos, bad u Thaddaïos, bad u Simon u Bashitrhem,

¹⁹ bad u Judas Iskariot, uba la die noh ruh ïa U.

U Jisu bad u Belsebul

²⁰ Te ki la wan sha ïing. U paidbah te u la wan lang pat, katba kim ïoh shuh wat ïa ka ban bam jingbam.

²¹ Te haba ki kur jong u ki la bna, ki la leit noh ban bat ïa u, naba ki la ong, “Um tipbriew shuh.”

²² Bad ki nongthoh kiba la wan hiar na Jerusalem ki la ong, “U don u Belsebul, bad da u rangbah ki ksuid U beh noh ïa ki ksuid.”

²³ Te haba u la khot ïa ki ha u, u la kren ïa ki ha ki pharshi. “Kumno u Soitan u lah ban shop noh ïa u Soitan?

²⁴ bad lada ka hima ka la ïaleh makynti paralok, kata ka hima kam lah neh shuh:

²⁵ bad lada ka ïing de ka la ïaleh makynti paralok, kata ka ïing kam lah neh shuh:

²⁶ bad lada u Soitan de u ïeng ban ïaleh hi ïa lade, bad u la ïapait, um lah neh shuh, hynrei, don keiñ ka bakut ïa u:

²⁷ ym don uno uno ruh uba leit hapoh ka ïing u bakhlaiñ, uba lah ban kurup ïa kiei kiei ruh ki jong u, lymda u khum shuwa ïa uta u bakhlaiñ; ynda kumta te, un sa kurup ïa ka ïing jong u:

²⁸ “Shisha nga ong ha phi, ba yn map ïa ki khun bynriew ïa ki pop baroh, bad ïa ki jingkrenbeiñ blei katba kin krenbeiñ blei,

²⁹ hynrei, uno uno ruh u ban krenbeiñ ïa U Mynsiem Bakhuid, ha la ka rta un ym ïoh ka jingmap, hynrei, u ban rem na ka pop bymjukut.”

³⁰ Naba ki la ong, “U don mynsiem bymkhuid.”

U Jisu bad ki ba-ha-ïing ha-sem jong u

³¹ Haba kumta te, ki hynmen hynbew jong u bad ka kmie jong u ruh ki la wan; bad haba ki la ïeng shabar, ki la phah ha u, ba ki da khot noh ïa u.

³² Te u paidbah u la shong tawiar ïa u, bad ki la ong ha u, “Ha khmih ka kmie jong me bad ki hynmen hynbew jong me habar ki ïawad ïa me.”

³³ U la ïathuh te ha ki, u da ong, “Kano ka kmie jong nga, lane ki hynmen hynbew jong nga?”

³⁴ Te haba u la khmih baroh sawdong ïa kiba shong tawiar ïa u, u ong, “Ha khmih ka kmie jong nga, bad ki hynmen hynbew jong nga!

³⁵ naba uno uno ruh u ban leh ïa ka mon U Blei, uta keiñ, u long u para jong nga bad ka para jong nga, bad ka kmie de.”