MARKOS 2 - KA BAIBL

U Jisu u pynkhiah ïa u bapang ïapshiliang

¹ Te ynda U la leit pat shapoh Kapernam hadien khyndiat sngi, la pynbna ba U don ha ïing.

² Te bun ki la ïalang, katba ym ngiam jaka shuh, em, wat haduh ka jingkhang: bad u la ïalap ïa ka ktien ha ki.

³ Ki wan ruh ha U kiba wallam ïa uwei u bapang ïapshiliang, ïa uba ki bah saw ngut.

⁴ Te ynda kim lah wan hajan jong U namar uta u paidbah, ki la ïalied noh ïa ka jingsop na ka jaka ha kaba U la don, bad haba ki la pynpei, ki la ïa-pynhiar noh ïa ka jingthiah ha kaba u la thiah uta u bapang ïapshiliang.

⁵ Bad haba U Jisu u la ïohi ïa ka jingngeit jong ki, U la ong ha uta u bapang ïapshiliang, “Ko khun, la map noh ïa me ïa ki pop jong me.”

⁶ Hynrei, don kiba na ki nongthoh kiba shong hangta, bad kiba ïapyrkhat ha la ki dohnud,

⁷ “Balei ba une u kren kaba beiñ blei kumne? uei uba lah ban map ïa ki pop, hynrei, tang U Blei hi?”

⁸ Te kumne kumne ruh, haba U Jisu u la tip ha la ka mynsiem, ba ki la ïapyrkhat kumta ha lade, U la ong ha ki, “Balei ba phi ïapuson ïa kine kiei kiei ruh ha la ki dohnud?

⁹ kano kaba kham jem, ban ong ha uta u bapang ïapshiliang, ‘La map ïa ki pop jong me’; ne ban ong, ‘To ïeng, to rah noh ïa la ka jingthiah, to ïaid ruh?’

¹⁰ hynrei, ba phin ïoh tip ba U Khun u briew u don bor ha ka khyndew ban map ïa ki pop”, (U ong ha uta u bapang ïapshiliang),

¹¹ “Ha me nga ong, To ïeng joit, rah noh ïa la ka jingthiah, bad leit noh sha la ïing.”

¹² Te kumne kumne ruh, u la ïeng, bad u la rah noh ïa kata ka jingthiah, u la mih noh de ha khmat jong ki baroh; katba ki la kyndit noh baroh, bad ki la ïaroh ïa U Blei, ki da ong, “Mynno mynno ruh ngim ju ïohi kat kane!”

Ka jingkhot ïa u Lebi

¹³ U la leit noh pat ruh harud ka duriaw: te u paidbah baroh u la wan ha U, bad U la hikai ïa ki.

¹⁴ Te katba U nang ïaid noh nangta, U la ïohi ïa u Lebi u khun u Alphaïos ba u shong ha ïing khrong, U la ong te ha u, “To bud ïa nga.” Te u la ïeng bad u la bud ïa U.

¹⁵ Ka la jia ruh, haba U la shong bam ha ïing jong u, ba shibun ki nongkhrong bad ki bapop ki la shong lem bad U Jisu bad ki synran jong U: naba ki la long shibun, bad ki la ïabud ïa U.

¹⁶ Te haba ki nongthoh bad ki Pharisi ki la ïohi ïa U ba U ïabam lem bad kita ki nongkhrong bad ki bapop, ki la ong ha ki synran jong U, “U ïabam U ïadih ruh pleng bad ki nongkhrong bad ki bapop ruh.”

¹⁷ Te haba U Jisu u la ïohsngew, U la ong ha ki, “Ki bakhiah kim donkam ïa u nongpynkhiah, hynrei, ki bapang keiñ: ngam shym la wan ban khot ïa ki bahok, hynrei, ïa ki bapop ïa ka ban kylla-ka-bamut.”

Ka jingkylli shaphang kaba shah jingit

¹⁸ Te ki synran u Ïoannis bad ki jong ki Pharisi ki ïashah jingit: ki la wan te, bad ki la ong ha U, “Balei ba ki synran u Ïoannis bad ki jong ki Pharisi ki shah jingit, hynrei, ki synran jong me kim ïashah jingit?”

¹⁹ U Jisu te u la ong ha ki, “Ki nong-on kurim ki lah ban shah jingit, haba u nongleit-kurim u dang sah lem bad ki? katba ki dang don uta u nongleit-kurim lem bad ki, kim lah ban shah jingit:

²⁰ hynrei, ki sngi kin poi, haba la shim noh ïa u nongleit-kurim na ki, ynda kumta te, ha kita ki sngi keiñ, kin sa ïashah jingit.

²¹ Ym ju don ruh uba suh syrdep ïa ka jaiñkup barim da ka jaiñ thymmai: lada kumta, kata ka jaiñsyrdep bathymmai jong ka kan pynkad ïa ka barim, bad ka pynlong ka jingkad kaba kham khraw.

²² Ym ju don ruh uba buh ïa ka Waiñ thymmai ha ki lywa snieh barim: lada kumta, kata ka Waiñ bathymmai kan pynpdang ïa ki lywa snieh, bad kata ka Waiñ ka jaw noh bad kita ki lywa snieh ki jot noh: hynrei ïa ka Waiñ thymmai ju buh ha ki lywa snieh thymmai.”

Ka jingkylli shaphang ka Sabbaton

²³ Te ka la jia ba U la ïaid lyngba ïa ki lyngkha Kew ha ka sngi Sabbaton; bad ki synran jong U, katba ki ïaid, ki la sdang kheit soh Kew.

²⁴ Ki Pharisi te ki la ong ha u, “Ha khmih, balei ba ki leh ïa ka bymdei ha ka sngi Sabbaton?”

²⁵ U te u la ong ha ki, “Mynno mynno ruh phim pat ju pule ïa kaei ba u Dabid u la leh, mynba u la shipa, bad ba u la thngan, ma u, bad kita kiba bad u ruh?

²⁶ Kumno ba u la leit hapoh ka ïing U Blei ha ki sngi u Abiathar u rangbah lyngdoh, bad ba u la bam ïa ki 'pu pyni, ïa ki bymbit ban bam, hynrei, tang ïa ki lyngdoh hi, bad ba u la ai ruh de ha kita kiba don lem bad u?”

²⁷ Te u la ong ruh ha ki, “La thaw ïa ka Sabbaton na ka bynta u briew, ym ïa u briew na ka bynta ka Sabbaton:

²⁸ ba kumta te U Khun u briew u long U Trai ka Sabbaton ruh.”