MARKOS 14 - KA BAIBL

Ka jingïasylla pyrshah ïa U Jisu

¹ Ynda la ar sngi te la long Ka Niam Ka Jinglait, bad Ki Kpu Khlem Thiat; ki rangbah lyngdoh bad ki nongthoh te ki la wad dong kumno kin ïoh kem tuh ïa u, ba kin pynïap ruh.

² Hynrei, ki la ong, “Ym ha Ka Niam Ka Jinglait, ïoh ba ka jingkhihwin ki briew kan long.”

Kaba pynsleh ïa U Jisu ha Bethania

³ Haba U dang don te ha Bethania, ha ïing u Simon u bapang 'ñiangthohlieh, katba U shong bam, ka kynthei ka la wan kaba don ka dabi alabaster kaba dap da ka jingsleh basngur, ka bakordor eh; te haba ka la plie ïa kata ka dabi alabaster, ka la theh ruh ha ka khlieh jong U.

⁴ Hynrei, don kiba la sngewbitar ha lade, ki da ong, “Ïa ka ban lei la pynlehnohei ïa kata ka jingsleh?

⁵ naba ïa kane ka jingsleh lah ban die laispah suka tam, bad ban ai ha ki baduk.” Ki la ïakhñium ruh ïa ka.

⁶ Hynrei, U Jisu u la ong, “To iehnoh ïa ka; balei phi pynkhuslai ïa ka? ka la leh ka kam babha ïa nga.

⁷ Namar phi don ki baduk lem bad phi ha la ka sngi, bad ynda phi mon phi lah ban leh bha ïa ki; hynrei, ïa nga phim ïoh keiñ ha la ka sngi.

⁸ Kane katba ka lah ka la leh, ka la thew lypa ban pynsleh ïa ka met jong nga ïa ka ban tep.

⁹ Shisha nga ong ha phi, ba shano shano ruh sha kaba yn ïalap ïa kane ka gospel ha ka pyrthei baroh satlak, yn ïathuh ruh ïa kaba kane ka la leh, ïa ka ban kynmaw ïa ka.”

U Judas u wad dong ban die noh ïa U Jisu

¹⁰ U Judas Iskariot te, uwei na ki khat-ar ngut, u la leit noh ha ki rangbah lyngdoh, ba un ïoh aiti noh ïa U ha ki.

¹¹ Te haba ki la ïohsngew, ki la ïakmen, bad ki la ïakular ban ai tyngka ha u; u te u la wad kumno un ïoh lad kaba bit ban ai noh ïa U.

U Jisu u bam ïa Ka Niam Ka Jinglait bad ki synran jong u

¹² Te ha ka sngi nyngkong Ki Kpu Khlem Thiat, ha kaba ki ju kñia ïa Ka Niam Ka Jinglait, ki synran jong u ki ong ha u, “Hangno me mon ba ngin leit khreh, ba men ïoh bam ïa Ka Niam Ka Jinglait?”

¹³ Te u la phah ar ngut na ki synran jong u, bad u ong ha ki, “Khie leit shapoh kato ka shnong, te u briew uba bah shi kum ka um, un ïakynduh bad phi; to bud ïa u,

¹⁴ te shaei shaei ba un leit rung, ong ha u trai ïing, ‘U Nonghikai u ong, “Hangno kata ka kamra jong nga, ha kaba ngan ïoh bam ïa Ka Niam Ka Jinglait lem bad ki synran jong nga?” ’

¹⁵ Te u hi un pyni ha phi ïa ka kamra haneng kaba khraw, ïa kaba la siang jingbuh lypa; hangta phin ïakhreh ïa ngi.”

¹⁶ Kumta, ki synran jong u ki la leit noh, bad ki la wan shapoh kata ka shnong, bad ki la shem kumba u la ong ha ki; bad ki la ïakhreh ïa kata Ka Niam Ka Jinglait.

¹⁷ Haba la janmiet te, u wan bad kita ki khat-ar ngut.

¹⁸ Haba ki dang ïashong bam, bad ba ki ïabam ruh, U Jisu u la ong, “Shisha nga ong ha phi, ba uwei na phi uba bam lem bad nga, un die noh ïa nga.”

¹⁹ Ki la sdang te ban sngewsih, bad ban ïa-ong ïa u, uwei pa uwei, “Dei ma nga?”

²⁰ Te u la ong ha ki, “U dei uwei na ki khat-ar, uta keiñ, uba ïawieh lem bad nga ha ka pliang.

²¹ U Khun u briew shisha un sa leit, kumba la thoh shaphang jong u, hynrei, kordit ïa uta u briew da uba yn die noh ïa U Khun u briew! Ka la bha ïa uta u briew lada ym shym la kha satia ïa u!”

Ka Jingkhawai U Trai

²² Haba ki dang ïabam ruh, U Jisu u la shim ïa u kpu, bad haba u la lah nguh u la kdiah, bad u la ai ha ki, bad u la ong, “To shim, to bam, une u long ka met jong nga.”

²³ Haba u la shim ïa ka khuri ruh, bad haba u la lah nguh, u la ai ha ki; ki ruh ki la dih baroh na ka.

²⁴ U la ong ruh ha ki, “Kane ka long ka snam jong nga ka jong ka jutang ka bathymmai, ïa ka ban sa pynmih noh na ka bynta kiba bun;

²⁵ shisha nga ong ha phi, ba ngan ym dih shuh na une u soh u dieng Waiñ, tad ynda kata ka sngi haba nga dih thymmai ïa ka ha ka hima U Blei.”

²⁶ Te haba ki la ïarwai, ki la leit noh sha u lum ki Olib.

U Jisu u ïathuhlypa ba u Petros un len noh ïa u

²⁷ Bad U Jisu u ong ha ki, “Phi baroh phin thut namar jong nga, naba la thoh: ‘Ngan shoh ïa u nongsharai, bad yn pynsaphred ïa ki langbrot.’

²⁸ Hynrei, ynda la pynmih pat ïa nga, ngan leit sha shuwa jong phi sha Galilaïa.”

²⁹ Hynrei, u Petros u la ong ha U, “Lada baroh ruh kin thut, hynrei, nga, em.”

³⁰ U Jisu u ong te ha u, “Shisha nga ong ha me, ba wat ma me ha kane ka sngi, ha kane hi ka miet keiñ, haba um pat riew u syiar ar sien, men len ïa nga lai sien.”

³¹ Hynrei, u la kren kynsan kham tam, “Lada ka dei ïa nga ban ïap lem bad me, ngan ym len satia ïa me.” Kumjuh ruh de ki la ong baroh.

U Jisu u duwai ha ka kper Gethsemane

³² Ki la wan ruh sha ka jaka kaba kyrteng “Gethsemane”; u ong te ha ki synran jong u, “To ïashong hangne, katba nga nang duwai.”

³³ Te u la shim lem bad u ïa u Petros bad ïa u Jakob bad ïa u Ïoannis; bad u la sdang ban sngewshyrkhei eh, bad ban sngewkordit eh ruh.

³⁴ U la ong te ha ki, “Ka mynsiem jong nga ka pisa eh, kum ban sa ïap; to ïaishong hangne, to ïa-ap ruh.”

³⁵ Te haba u la leit sha shuwa khyndiat, u la dem ha khyndew, bad u la duwai, ba lada don lad, ba kata ka por kan leit noh na u.

³⁶ U la ong ruh, “Abba, ko Kpa, kiei kiei baroh ki long kiba lah ha me; to pynphai noh ïa kane ka khuri na nga; pynban, ym ïa kaba nga mon, hynrei, ïa kaba me mon.”

³⁷ U wan te bad u shem ïa ki ba ki da ïohthiah; bad u ong ha u Petros. “Ko Simon, me ïohthiah? mem lah ban ap shi por?

³⁸ To ïasharai, to ïaduwai ruh, ïoh ba phin leit bsut hapoh ka jingpynshoi; ka mynsiem shisha ka kloi, hynrei, ka doh ka tlot.”

³⁹ Haba u la leit noh pat te, u la duwai u da ong ïa kijuh ki ktien.

⁴⁰ Haba u la wan phai pat ruh, u la shem ïa ki, ba ki da ïohthiah pat, naba ki khmat jong ki, ki la khia; te kim tip kaei ba kin ïathuh ha u.

⁴¹ U la wan ruh ka balai sien, bad u ong ha ki, “Phi nang thiah mynta? phi nang jahthait ruh? keiñ noh! la jia ka por, ha khmih, la die noh ïa U Khun u briew ha ki kti ki nongpop.

⁴² To ïeng, ngin ïaleit noh, ha khmih, uta uba die noh ïa nga u la jan.”

Kaba kem ïa U Jisu

⁴³ Te kumne kumne ruh, katba U dang kren, u Judas u wan, uba long uwei na ki khat-ar ngut, lem bad u ruh don u paidbah babun bad ki waitlam bad ki diengduh, na ki rangbah lyngdoh bad na ki nongthoh bad na ki tymmen basan de.

⁴⁴ Te uta uba la die noh ïa U, u la lah ai ka dak ïakut bad ki, u da ong, “Ïa uba ngan doh, U dei uta; to phin kem ïa U, bad ïalam noh skhem.”

⁴⁵ Te ynda u la wan, kumne kumne ruh, u la leit ha U, u ong, “Ko Kynrad, Kynrad”; u la doh ruh ïa U.

⁴⁶ Ki te ki la buh ïa la ki kti ha U, bad ki la kem ïa U.

⁴⁷ Uwei te na kita kiba ïeng hajan, haba u la sei la ka waitlam, u la pom ïa u shakri u rangbah lyngdoh, bad u la mait noh ïa ka shkor jong u.

⁴⁸ U Jisu u da ïathuh, u la ong te ha ki, “Kumba ha u nongtuh, phi la mih noh, bad ki waitlam bad ki diengduh ruh, ban ïakem ïa nga?

⁴⁹ Nga la ju don ha la ka sngi bad phi ha ka templ, nga da hikai, te phim shym la kem ïa nga. Hynrei, ïa Ki Jingthoh, donkam ba yn pyndep.”

⁵⁰ Te baroh ki la iehnoh ïa u bad ki la phet ïap noh.

U samla uba phet ïap noh

⁵¹ Hynrei, don uwei u samla uba la bud ïa U, uba kup ïa ka jaiñ linen bani halor ka met lyngkhuit jong u bad ki la kem ïa u ruh;

⁵² te u la iehnoh ïa kata ka jaiñkup bani, bad u la phet ïap noh lyngkhuit na ki.

U Jisu ha khmat ka dorbar

⁵³ Te ki la ïalam noh ïa U Jisu ha uta u rangbah lyngdoh, bad kita ki rangbah lyngdoh baroh, bad kita ki tymmen basan bad kita ki nongthoh de ki la ïawan lang lem bad u.

⁵⁴ U Petros te u la bud ïa U na sha jngai haduh hapoh phyllaw jong uta u rangbah lyngdoh bad u la shong lem bad kita ki shakri, u da syaid ding ruh.

⁵⁵ Te kita ki rangbah lyngdoh bad kata ka dorbar baroh ki la ïawad ka sakhi pyrshah ïa U Jisu, ïa ka ban pynïap ïa U; te kim shem,

⁵⁶ naba bun ki la ïasakhi lamler ïa U, hynrei, kita ki jingsakhi kim ïadei satia.

⁵⁷ Te don kiba la ïeng joit bad ki la sakhi lamler pyrshah ïa U, ki da ong,

⁵⁸ “Ngi la ïohsngew ïa u ba u da ong, ‘Ngan pynjot ïa kane ka templ ba la thaw da ki kti, bad ngan tei lai sngi ïa kawei pat ka bym da ki kti.’ ”

⁵⁹ La kumta ruh, ka jingsakhi jong ki kam ïabeit satia.

⁶⁰ Uta u rangbah lyngdoh te haba u la ïeng joit hapdeng, u la kylli ïa U Jisu, u da ong, “Mem ïathuh ei ei ruh? Ka long aïu ba kine ki ïasakhi pyrshah ïa me?”

⁶¹ U te U la shu sngap, bad um ïathuh ei ei ruh em. Uta u rangbah lyngdoh u la kylli pat ïa U, bad u ong ha U, “Me long uta U Khrist, U Khun jong Uba la kyrkhu?”

⁶² U Jisu te u la ong, “Nga long. Bad phin ïohi ïa U Khun u briew ba u da shong sha ka kti kamon jong ka Bor, bad ba u da wan ha ki lyoh bneng.”

⁶³ Te u rangbah lyngdoh u la kad ïa la ki jaiñ, bad u ong, “Ngi dang donkam aïu pat ïa ki sakhi?

⁶⁴ Phi la ïohsngew ïa kata ka jingkrenbeiñ blei; phi mut kumno?” Ki baroh te ki la pynrem ïa U, ba U dei ban ïap;

⁶⁵ don kiba la sdang te ban bynthiew ïa U, bad ban tap matlah ïa ki khmat jong U, bad ban shoh ïa U, bad ban ong ruh ha U, “To ïathuh antad”: kita ki shakri ruh ki la thab ïa U da ki slakti.

U Petros u len noh ïa U Jisu

⁶⁶ Te haba u Petros u dang don harum ha kata ka phyllaw, kawei na kita ki shakri jong u rangbah lyngdoh ka la wan;

⁶⁷ haba ka la ïohi te ïa u Petros ba u da syaid ding, ka la khmih ïa u, bad ka ong, “Me ruh me la long lem bad U Jisu u nong Nasaret.”

⁶⁸ Hynrei u la len, u da ong, “Ngam tip, lymne ngam shemphang kaei ba pha ong.” Bad u la mih noh shabar sha ka baranda; te u syiar u la riew.

⁶⁹ Haba kata ka shakri te ka la ïohi ïa u pat, ka la sdang ban ong ha kita kiba ïeng hajan, “Uto u long uwei na ki.”

⁷⁰ Hynrei, u la len pat. Ynda la shibit te kita kiba ïeng hajan ki la ong pat ha u Petros, “Shisha me long uwei na ki; naba me long u nong Galilaïa.”

⁷¹ Hynrei, u la sdang ban tim ban smai ruh, “Ngam ithuh ïa une u briew uba phi kren shaphang jong u.”

⁷² Te kumne kumne ruh, uta u syiar u la riew ar wat. Te u Petros u la kynmaw ïa kata ka ktien kaba U Jisu u la ong ha u, “Mynshuwa ba un riew u syiar ar sien, men len ïa nga lai sien.” Haba u la puson ruh ïa kata, u la lynñiar.