MARKOS 11 - KA BAIBL

U Jisu u leit rung sha Jerusalem kum U Syiem

¹ Te ynda ki la poi hajan Jerusalem, sha Bethphage bad Bethania, haduh u lum ki Olib, u phah ar ngut na ki synran jong u,

² bad u ong ha ki, “Khie leit sha ka shnong kaba ha marpyrshah jong phi: te phi tang shu poi ha ka, phin shem ïa u khun kadda ba la teh, u bym pat ju don u briew ba la shong; to pyllait ïa u, bad to wallam noh ïa u.

³ Te lada uno uno ruh un ong ha phi, ‘Balei phi leh kumne?’ phin ong ‘ba U Trai u donkam ïa u, te kumne kumne ruh, un phah noh ïa u hangne.’ ”

⁴ Te ki la leit noh, bad ki la shem ïa uta u khun kadda ba la teh ha ka jingkhang habar, ha lynti shnong; te ki pyllait ïa u.

⁵ Kiba na kita te kiba ïeng hangta, ki la ong ha ki, “Phi leh aïu, ba phi pyllait ïa uta u khun kadda?”

⁶ Ki la ong te ha ki kumba U Jisu u la lah hukum, te ki la shah ïa ki.

⁷ Ki la wallam te ïa uta u khun kadda ha U Jisu, bad ki la siang halor jong u ïa ki jaiñkup jong ki; bad U la shong halor jong u.

⁸ Bun ruh ki la siang ïa ki jaiñkup jong ki ha ka lynti; kiwei te ki la khyllad ïa ki tnat dieng, bad ki la siang ha kata ka lynti.

⁹ Te kita kiba ïaid sha shuwa, bad kita kiba bud nadien de, ki la ïapyrta, “Hosanna! Long ba la kyrkhu uta uba wan ha ka kyrteng U Trai.

¹⁰ Long kaba la kyrkhu kata ka hima kaba wan, ka hima ka jong u Dabid u kpa jong ngi keiñ. Hosanna ha kiba jrong tam eh.”

¹¹ U Jisu u la leit ruh shapoh Jerusalem, shapoh ka templ; te haba u la khmih baroh sawdong ïa kiei kiei baroh, ba ka long lypa ruh janmiet, u la leit noh sha Bethania lem bad ki khat-ar ngut.

U Jisu u tim ïa u dieng Dumbur

¹² Ha kaba lashai te, haba ki la mih noh na Bethania, U la sngewthngan.

¹³ Haba U la ïohi te ïa u dieng Dumbur na jngai, ba u don ki sla, U la leit ban khmih la un shem ei ei ha u; haba U la poi te ha u, um shym la shem ei ei ruh, hynrei, tang ki sla, naba kam pat long ka aïom soh Dumbur.

¹⁴ Te U Jisu u la ïathuh bad U la ong ha u, “Ym don u ban bam soh shuh na me lano lano ruh!” Ki synran jong U ki la ïohsngew.

Ka jingpynkhuid ïa ka templ

¹⁵ Bad ki la poi ha Jerusalem. Te haba u la leit shapoh ka templ, u la sdang ban beh noh ïa kita kiba ïadie ïathied ha ka templ; bad u la pynkyllon ïa ki miej jong ki nongïapeiñ sbai, bad ïa ki jingshong jong kita kiba ïadie paro,

¹⁶ bad um shah ïano ïano ruh ban rah jingdiang ei ei lyngba ïa ka templ.

¹⁷ U la hikai ruh, u da ong ha ki, “Ym shym la thoh: ‘Ïa ka ïing jong nga yn khot ka ïing jingduwai ïa ki briew baroh’? Hynrei, phi, ka krem nongtuh phi la pynlong ïa ka.”

¹⁸ Ki nongthoh bad ki rangbah lyngdoh te ki la ïohsngew ïa kata, bad ki la ïawad dong kumno ba kin pynïap noh ïa U, namar ki la sheptieng ïa U. Hynrei, u paidbah baroh u la kyndit thred na ka jinghikai jong U.

¹⁹ Te janmiet janmiet u la leit noh shabar ka shnong.

Ka jinghikai na u dieng Dumbur

²⁰ Haba ki la ïaid lait mynstep ruh, ki la ïohi ïa uta u dieng Dumbur ba la ïap tyrkhong naduh ki thied.

²¹ U Petros te haba u da kynmaw pat u ong ha U, “Ko Kynrad, ha khmih, uta u dieng Dumbur ïa uba me la tim, u la ïap tyrkhong noh!”

²² U Jisu u da ïathuh u ong te ha ki, “To ïoh ma phi ka jingngeit ha U Blei.

²³ Shisha nga ong ha phi, ba uno uno ruh u ban ong ha une u lum, ‘To long ba la rat noh, to noh ruh sha duriaw’, bad un ym sngew-artatien ha la ka dohnud, hynrei, un ngeit ba yn sa long kiei kiei ruh ïa kiba u la ong, kan long ïa u kaei kaei ruh ïa kaba un ong.

²⁴ Namar kata, nga ong ha phi, ba kiei kiei baroh kat kiba phi pan, haba phi kyrpad, to ngeit ba phi pdiang ïa kita, te phin sa ïoh.

²⁵ Haba phi da ïeng kyrpad ruh, to map, lada phi bat sngewsih ïano ïano ruh, ba U Kpa jong phi ruh uba ha bneng un map ïa phi ïa ki ryngkang jong phi:

²⁶ hynrei, lada phi phim ïamap, te U Kpa jong phi uba ha bneng un ym map ïa ki ryngkang jong phi.”

Kaba kem ktien shaphang ka iktiar U Jisu

²⁷ Bad ki wan pat sha Jerusalem: te katba u dang ïaid ha ka templ, ki rangbah lyngdoh, bad ki nongthoh, bad ki tymmen basan ruh ki wan ha u,

²⁸ bad ki ong ha u, “Da ka bor aïu me leh ïa kine kiei kiei ruh? bad la ai mano ha me ïa kane ka bor ban leh ïa kine kiei kiei ruh?”

²⁹ U Jisu u da ïathuh u la ong te ha ki, “Nga ruh ngan kylli ïa phi kawei ka jingkylli, to ïathuh te ha nga, te ngan sa ong ha phi da ka bor aïu ba nga leh ïa kine kiei kiei ruh:

³⁰ Ka jingbaptis u Ïoannis, ka long na bneng, lane na ki briew? to ïathuh ha nga.”

³¹ Hynrei, ki la ïasaid hi paralok, ki da ong, “Lada ngin ong, ‘Na bneng’, un ong, ‘Hato balei te ba phim shym la ngeit ha u?’

³² Hynrei, lada ngin ong, ‘Na ki briew’,” — ki la sheptieng ïa u paidbah; naba baroh ki ñiew ïa u Ïoannis kum u nongïathuhlypa uba da shisha.

³³ Ki da ïathuh te, ki ong ha U Jisu, “Ngim tip.” Te U Jisu u da ïathuh, u ong ha ki, “Nga ruh ngam ong ha phi da ka bor aïu ba nga leh ïa kine kiei kiei ruh.”