MARKOS 1 - KA BAIBL

Ka jingïalap u Ïoannis Nongpynbaptis

¹ Kaba sdang ka gospel U Jisu Khrist, U Khun U Blei.

² Kat kumba la thoh ha ki nongïathuhlypa, “Ha khmih, nga phah ïa u nongbuhai jong nga ha shuwa ka khmat jong me, u ban khreh ïa ka lynti jong me.

³ Ka ktien jong uba pyrta ha ka ri khlaw, ‘Phin pynkhreh ïa ka lynti bah U Trai, phin pynbeit ruh ïa ki lynti jong u.’ ”

⁴ U Ïoannis u la pynbaptis ha ka ri khlaw, bad u la ïalap ïa ka jingbaptis ka jingkylla-ka-bamut ïa ka ban map ki pop.

⁵ Hangta te kiba na ka ri Judia, bad ki Jerusalem baroh ki la leit ha u, bad la pynbaptis ïa ki da u ha ka wah Jordan, ki da ïaphla noh ïa ki pop jong ki.

⁶ Te u Ïoannis u la kup da ka jaiñ shñiuh ut, bad ka jingpanpoh snieh ha ka syngkai jong u, bad u la bam da ki puit bad ka ngap khlaw.

⁷ U la ïalap ruh, u da ong, “Don uba wan nadien jong nga uba kham khraw bor ïa nga, kam dei ïa nga ban dem ïa ka ban loit wat tang ïa ki jingteh ki juti jong u:

⁸ nga shisha nga la pynbaptis ïa phi da ka um; hynrei, uta un pynbaptis ïa phi da U Mynsiem Bakhuid.”

Ka jingpynbaptis ïa U Jisu

⁹ Ka la jia ruh ha kita ki sngi, ba U Jisu u la wan na Nasaret kaba ha Galilaïa, bad la pynbaptis ïa u da u Ïoannis ha ka Jordan.

¹⁰ Te kumne kumne ruh haba u dang kiew noh na ka um, u la ïohi ba la plie ïa ki bneng, bad U Mynsiem u hiar ha u kum ka paro.

¹¹ Ka ktien te ka la wan na bneng, ka da ong, “Me long U Khun jong nga uba ieit, ha me nga sngewbha eh.”

Ka jingpynshoi ïa U Jisu

¹² Te kumne kumne ruh, U Mynsiem u la ïalam noh kyrkieh ïa u sha ka ri khlaw.

¹³ U la don te ha kata ka ri khlaw sawphew sngi, ba la pynshoi ïa u da u Soitan; bad u la don ryngkat bad ki mrad khlaw, bad ki angel ki la ïashakri ïa u.

U Jisu u sdang ïa ka jingïalap ha Galilaïa

¹⁴ Te hadien ba la byndi ïa u Ïoannis, U Jisu u la wan sha Galilaïa, u da ïalap ïa ka gospel U Blei,

¹⁵ u da ong ruh, “La pyndep ïa ka Ïa, bad ka hima U Blei ka la jan: to phin kylla-ka-bamut, bad to ngeit ruh ïa ka gospel.”

U Jisu u khot ïa ki saw ngut ki nongtong dohkha

¹⁶ Te haba u dang ïaid harud ka duriaw Galilaïa, u la ïohi ïa u Simon bad ïa u Andriw u para jong u, ba ki dang ïabred ïa ka jar ha duriaw; naba ki long ki nongtong dohkha.

¹⁷ U Jisu te u la ong ha ki, “To wan bud nadien jong nga, te ngan pynlong ïa phi ki nongtong briew.”

¹⁸ Te kumta, ki la iehnoh dak ïa ki jar jong ki, bad ki la ïabud ïa u.

¹⁹ Haba u la nang leit nangta ruh kham jngai khyndiat, u la ïohi ïa u Jakob u khun u Sebedi, bad u Ïoannis u para jong u, kiba don de ha ka lieng ba ki dang shna ïa ki jar.

²⁰ Kumne kumne ruh, u la khot ïa ki; ki ruh, haba ki la iehnoh ïa u Sebedi u kpa jong ki ha kata la lieng lem bad ki nongbylla, ki la ïabud ïa u.

U briew uba don u mynsiem bymkhuid

²¹ Ki la rung ruh sha Kapernam: te kumne kumne ruh, ha ka sngi Sabbaton u la rung sha ka synagog, bad u la hikai.

²² Ki la sngewkyndit te ïa ka jinghikai jong u, naba u la hikai ïa ki kum uba don bor, ym kum ki nongthoh keiñ.

²³ Te la don ha ka synagog jong ki, u briew uba don u mynsiem bymkhuid: bad u la pyrta,

²⁴ u da ong, “Iehnoh ïa ngi; me donkam aïu bad ngi, me U Jisu uba na Nasaret? me la wan khnang ban pynjot ïa ngi? nga ithuh ïa me uei me long, U Bakhuid u jong U Blei.”

²⁵ U Jisu te u la dumok ïa u, U da ong, “Wat jam me, to mih noh ruh na u.”

²⁶ Uta u mynsiem bymkhuid te, da kaba ring kyrthat ïa u bad da kaba pyrta da ka ktien bajam, u la mih noh na u.

²⁷ Baroh te ki la sngewkyndit, kat ban ïakylli hi paralok, ki da ong, “Kaei kane? ka jinghikai bathymmai! da ka bor U hukum wat kat ïa ki mynsiem bymkhuid, ki ruh ki kohnguh ïa U!”

²⁸ Te shen shen ruh, ka jingbna shaphang jong U ka la phriang kylleng sawdong kata ka ri Galilaïa baroh.

U Jisu u pynkhiah shibun ki bapang

²⁹ Te kumne kumne ruh, haba ki la mih noh na kata ka synagog, ki la rung sha ka ïing u Simon bad u Andriw, lem bad u Jakob bad u Ïoannis ruh.

³⁰ Hynrei, ka syngken kurim u Simon ka thiah ba ka khieshoh; te kumta kumta ki ïathuh ha U shaphang jong ka.

³¹ Te U la wan bad U la bat ïa ka na ka kti, bad U la khyllie ïa ka; te kata ka khieshoh ka la iehnoh ïa ka, bad ka la shakri ïa ki.

³² Ynda la janmiet te, haba la sep ka sngi, ki la wallam ha u ïa ki bapang baroh, bad ïa kita kiba shong ksuid ruh.

³³ Te baroh shi shnong ki la ïawan lang ha ka jingkhang.

³⁴ Bad u la pynkhiah shibun kiba la pang na ki jingpang babun jaid, bad u la beh noh shibun ki ksuid; bad um shah ïa kita ki ksuid ban kren, namar ba ki ithuh ïa u.

U Jisu u leit ban ïalap

³⁵ Ha kaba lashai mynstep, dang slem eh ban mih ka sngi, haba u la khie u la mih noh, bad u la leit noh sha ka jaka kynjah, bad hangta u la duwai.

³⁶ Te u Simon bad kita kiba don lem bad u, ki la ïabud ïa u.

³⁷ Bad haba ki la shem ïa U, ki la ong ha U, “Baroh ki ïawad ïa me.”

³⁸ U la ong te ha ki, “Ïa ngin ïaleit shawei pat sha ki shnong kiba marjan, ba ngan ïoh ïalap hangta ruh; naba ïa kata keiñ, nga la mih noh.”

³⁹ U la ïalap te ha ki synagog jong ki kylleng sawdong ka Galilaïa baroh, u la beh noh de ïa ki ksuid.

U Jisu u pynkhuid ïa u bapang 'ñiangthohlieh

⁴⁰ Te u bapang 'ñiangthohlieh u la wan ha U, u da kyrpad ïa U, bad u da dem khohsiew ha U, bad u da ong ha U, “Lada me mon, me lah ban pynkhuid ïa nga.”

⁴¹ Te U Jisu haba U la sngewsynei, U la kner ïa la ka kti bad U la ktah ïa u, bad U ong ha u, “Nga mon; to men long khuid.”

⁴² Te U tang shu la kren, uta u 'ñiangthohlieh u la iehnoh ïa u, bad la pynkhuid ïa u.

⁴³ Te haba U la hukum skhem ïa u, U la phah noh kumne kumne ruh;

⁴⁴ bad U la ong ha u, “Sumar men ym ïathuh ei ei hano hano; hynrei, khie leit noh, pyni ïa lade ha u lyngdoh, bad to ainguh na ka bynta ka jingkhuid jong me ïa kiei kiei ruh kiba u Moses u la hukum, ïa ka ban long ka jingphla ïa ki.”

⁴⁵ Hynrei, haba u la mih noh, u la sdang ban pynbna haw, bad ban pynphriang kylleng ïa kata ka ktien, katba U Jisu um lah leit shuh shapoh kata ka shnong ha kaba paw; hynrei, U la shong shabar ha ki jaka kynjah, bad ki la wan ha U na baroh sawdong.