MALAKHI 4 - KA BAIBL

Ka jingwan ka sngi U Trai

¹ “Naba, ha khmih, kata ka sngi ka wan, ka ing kum ka lawar ding; te kiba sarong baroh, bad baroh kiba leh bymman, kin long u skum: bad kata ka sngi kaba wan kan pyningkhong ïa ki,” ong U Trai ki paid, “kat ban ym pynsah ïa ki lymne u thied lymne ka tnat.

² Hynrei, ha phi kiba sheptieng ïa ka kyrteng jong nga kan mih ka sngi ka hok bad ka jingpynkhiah ha ki thapniang jong ka; bad phin ïoh mih shabar, bad phin rynsied kum ki khun masi ba bsa ha ïing.

³ Bad phin ïuh roit ïa ki bymman; naba kin long ka dpei hapoh ki sla'jat jong phi ha kata ka sngi ba nga leh ïa kane,” ong U Trai ki paid.

⁴ “To kynmaw ïa ka hukum u Moses u shakri jong nga, kaba nga la hukum ha u ha Horeb ïa ki Israel baroh, kita ki aiñ bad ki jingbishar keiñ.”

⁵ “Ha khmih, ngan phah ha phi ïa u Elias u nongïathuhlypa shuwa ban sa poi kata ka sngi ka bakhraw bad kaba itieng U Trai.

⁶ Bad un pynphai ïa ka dohnud ki kpa sha ki khun, bad ka dohnud ki khun sha ki kpa jong ki; ïoh ba nga wan shoh ïa ka khyndew da ka jingtim.”