LOUKAS 1 - KA BAIBL

Ka Jinglamphrang

¹ Namar ba don shisha shibun kiba la shimti ban thoh lang ter ter ïa ka jingïathuhkhana shaphang kiei kiei ruh ba la pyndep hapdeng jong ngi,

² kat kumba ki la ai pateng ha ngi, kiba long hi ki nongïohi naduh kaba mynnyngkong bad ki nongïalap jong kata ka ktien:

³ ka la ibit ha nga ruh haba nga la ïai-ïit biang biang ïa kiei kiei baroh naduh kaba mynnyngkong, ban thoh ryntih ter ter ha me, A Theophilos u babha tam eh,

⁴ ba men ïoh tip skhem ïa ka jingshisha shaphang kita kiei kiei ruh, ha kiba me la ïoh hikai.

Ka jingïathuhlypa shaphang ka jingkha ïa u Ïoannis Nongpynbaptis

⁵ Ha ki sngi u Herod, u syiem ka Judia, la don uwei u lyngdoh uba kyrteng “u Sakharaïa”, na ka jingkylliang sngi u Abia: bad ka tnga jong u na ki khun kynthei u Aaron, kaba kyrteng “ka Elisabet”.

⁶ Baroh ar ngut ruh ki la long ki bahok ha khmat U Blei, ba ki da ïaid ha ki hukum bad ki niam jong U Trai baroh khlem jingrem.

⁷ Te kim don khun, naba ka Elisabet ka la long ka balyngki, bad ki sngi ka rta jong ki baroh ar ngut ki la noh arsut.

⁸ Ka la jia te, haba u dang leh ïa ka kam lyngdoh ha khmat U Blei, ha kaba ter ter ka jingkylliang sngi jong u,

⁹ katba kum ka rukom ka kam lyngdoh, ka la dei ïa u ban thang ka jingainguh thang baiwbih, haba u la leit ha kata ka jaka kyntang ka jong U Trai.

¹⁰ Bad uta u paidbah baroh u dang ïaduwai habar ha kata ka por ka jingainguh thang baiwbih.

¹¹ Te la mihpaw ha u, u angel U Trai, u da ïeng sha kamon ka duwan ka jingainguh thang baiwbih.

¹² Bad u Sakharaïa haba u la ïohi, u la sngewkhuslai eh, bad ka jingsheptieng ka la kem ïa u.

¹³ Hynrei, uta u angel u la ong ha u, “Wat sheptieng, ko Sakharaïa: naba la shahshkor ïa ka jingduwai jong me; te ka tnga jong me ka Elisabet kan kha khun shynrang ïa me, bad men khot ïa ka kyrteng jong u, ‘u Ïoannis’:

¹⁴ te men ïoh ka jingsngewbha bad ka jingkmen; shibun ruh kin ïashadkmen namar ka jingkha jong u;

¹⁵ naba un long uba khraw ha khmat U Trai, bad un ym dih ïa ka Waiñ lane ka kyiad; bad yn pyndap ïa u da U Mynsiem Bakhuid, wat naduh ka kpoh ka kmie jong u:

¹⁶ shibun te na ki khun Israel un pynphai sha U Trai uba U Blei jong ki.

¹⁷ U te un leit ha shuwa ka khmat jong U, ha ka mynsiem bad ka bor u Elias, ban pynphai ïa ki dohnud ki kpa sha ki khun, bad ïa ki bymkohnguh sha ka jingstad ki bahok; ban pynkhreh ïa U Trai, u paidlang ba la pynbit.”

¹⁸ U Sakharaïa te u la ong ha uta u angel, “Da kumno ngan ïoh tip ïa kane? naba nga long u tymmen, bad ki sngi ka rta ka tnga jong nga ki la noh arsut.”

¹⁹ Uta u angel u da ïathuh u la ong te ha u, “Nga long u Gabriel, uba ïeng ha khmat U Blei; te la phah ïa nga ban kren ha me, bad ban wallam ruh ha me ïa kine ki khubor babha.

²⁰ Te ha khmih, men sngap jar, bad men ym lah ban kren, tad ynda kata ka sngi ba yn pynlong ïa kine kiei kiei ruh; namar ba mem shym la ngeit ïa ki ktien jong nga, ïa kiba yn pyndep ha ka Ïa jong ki.”

²¹ Uta u paidlang te u dang ïa-ap ïa u Sakharaïa, bad ki la sngewlyngngoh naba u slem katta katta ha kata ka jaka kyntang.

²² Bad haba u la mih noh, um lah shuh ban kren ha ki; ki la shemphang te ba u la ïohi ïa ka jingithuhpaw ha kata ka jaka kyntang: u te u shu ïaipynpaw da ki dak ha ki, u la sah ruh u bymnangkren.

²³ Ka la jia ruh, ynda la dep kita ki sngi ka jingkam lyngdoh jong u, u la leit noh sha la ïing.

²⁴ Hadien kita ki sngi te, ka Elisabet ka tnga jong u ka la punkhun, bad ka la buhrieh ïa lade san bnai, ka da ong,

²⁵ “Kumne U Trai u la leh ha nga ha ki sngi ha kiba u la khmih ïa nga, ban weng noh ïa ka jinglongbeiñ jong nga hapdeng ki briew.”

Ka jingïathuhlypa shaphang ka jingkha ïa U Jisu

²⁶ Te ha u bnai u bahynriew la phah ïa uta u angel Gabriel na U Blei sha ka shnong ha Galilaïa, kaba kyrteng “ka Nasaret”,

²⁷ sha ka theisotti kaba la ïatehktien bad u briew, uba kyrteng “u Joseph”, na ka ïing u Dabid; ka kyrteng kata ka theisotti te ka long “ka Mari”.

²⁸ Uta u angel te haba u la leit hapoh sha ka, u la ong, “Khublei, pha kaba la ïoh ka jingaiei bakhraw! U Trai u don lem bad pha; la kyrkhu ïa pha hapdeng ki kynthei.”

²⁹ Ka te ka la sngewkhuslai eh na ka jingong jong u, bad ka la puson ha lade hato kaba kumno ka lah ban long kane ka jingkhublei.

³⁰ Uta u angel u la ong te ha ka, “To wat sheptieng, ko Mari; naba pha la shem ka jingaiei bad U Blei:

³¹ te ha khmih, phan sa punkhun ha la ka kpoh, bad phan kha ïa u khun, bad phan khot ïa ka kyrteng jong u, ‘U Jisu’:

³² une un long U Bakhraw, bad yn khot ïa u, ‘U Khun U Bahakhlieh Tam Eh’: bad U Trai uba U Blei un ai ha u ïa ka khet u Dabid u kpa jong u;

³³ bad un synshar halor ka ïing u Jakob ha la ka rta; bad ka hima jong u ruh ka ban ym kut shuh.”

³⁴ Te ka Mari ka la ong ha uta u angel, “Kumno kane kan long, haba ngam pat ithuh ïa u briew?”

³⁵ Uta u angel te u da ïathuh u la ong ha ka, “U Mynsiem Bakhuid un wan ha pha, bad ka bor U Bahakhlieh Tam Eh kan kah halor jong pha; namar kata ruh, ïa ita i bakhuid ïa iba yn kha, yn khot ‘U Khun U Blei’;

³⁶ ha khmih ruh, ka Elisabet ka kur jong pha, ka ruh ka la punkhun shynrang ha ka jinglong tymmen jong ka; bad une u long u bnai u bahynriew ïa ka, ïa kaba la ju khot ‘ka balyngki’.

³⁷ Naba kawei ruh ka ktien na U Blei kan ym long khlem ka bor.”

³⁸ Ka Mari te ka la ong, “Ha khmih ka shakri jong U Trai, to kan long ha nga katba kum ka ktien jong me.” Te uta u angel u la leit noh na ka.

Ka Mari ka leit jngoh ïa ka Elisabet

³⁹ Ka Mari te ka la ïeng ha kita ki sngi, bad ka la leit kyrkieh sha ka ri lum, sha kawei ka shnong kaba ha Juda;

⁴⁰ bad ka la leit rung ha ka ïing u Sakharaïa bad ka la khublei ïa ka Elisabet.

⁴¹ Ka la jia ruh, katba ka Elisabet ka la ïohsngew ïa ka jingkhublei jong ka Mari, la khih i khun ha ka kpoh jong ka; bad la pyndap ïa ka Elisabet da U Mynsiem Bakhuid.

⁴² Ka la pyrta te da ka ktien bajam, bad ka la ong, “La kyrkhu ïa pha hapdeng ki kynthei, bad la kyrkhu ruh ïa u soh ka kpoh jong pha!

⁴³ Nangno ruh, la jia kane ïa nga, ba ka kmie U Trai jong nga ka la wan ha nga?

⁴⁴ naba, ha khmih, katba ka ktien ka jingkhublei jong pha ka sawa ha ki shkor jong nga, la khih i khun na kaba shadkmen ha ka kpoh jong nga:

⁴⁵ suk ruh kata kaba la ngeit; naba ka jingpyndep kan long ïa kita kiei kiei ruh, ïa kiba la kren ha ka da U Trai.”

Ka jingrwai ïaroh ka Mari

⁴⁶ Ka Mari ruh ka la ong, “Ka dohnud jong nga ka pynkhraw ïa U Trai,

⁴⁷ bad ka mynsiem jong nga ka shadkmen ha U Blei U Nongpynim jong nga;

⁴⁸ naba U la khmih ha ka jinglong rangli ka shakri jong U: naba, ha khmih, naduh mynta ki pateng bynriew baroh kin khot ‘kaba suk’ ïa nga.

⁴⁹ Namar uta U Badonbor U la leh ki jingphylla ïa nga; bad ka bakhuid ka kyrteng jong U,

⁵⁰ bad ka jingisynei jong U pateng la pateng bynriew ha kita kiba sheptieng ïa U;

⁵¹ U pyni ïa ka borbah da ka ksangkti jong U; U pynsakma ïa kiba sarong ha ka jingmut ka dohnud jong ki:

⁵² U pynhiar ïa kiba khraw bor na ki khet, bad U kyntiew ïa ki barangli;

⁵³ ïa ki bathngan U pyndap da kiei kiei ki babha; ïa ki bariewspah te U phah noh suda.

⁵⁴ U shan bor ïa u Israel u shakri jong U, ba Un ïoh kynmaw ïa ka jingisynei

⁵⁵ (kumba U la ïathuh ha ki kpa jong ngi) ïa u Abraham, bad ïa u symbai jong u ha la ka rta.”

⁵⁶ Ka Mari te ka la sah kumba lai bnai bad ka, bad ka la leit phai noh sha la ïing.

Ka jingkha ïa u Ïoannis Nongpynbaptis

⁵⁷ Ka por ka Elisabet te ka la dap ïa ka ban kha; te ka la kha khun shynrang.

⁵⁸ Te ki paramarjan bad ki kur jong ka ki la ïohsngew ba U Trai u la pynkhraw ïa la ka jingisynei ïa ka, bad ki la ïakmen lem bad ka.

⁵⁹ Ka la jia ruh ba ha ka baphra sngi ki la ïawan ban otsher ïa uta u khunlung; bad kin sa kyrteng ïa u ha ka kyrteng u kpa jong u, u Sakharaïa.

⁶⁰ Te ka kmie jong u ka la ïathuh bad ka la ong, “Ym kumta, hynrei, yn khot ‘u Ïoannis’ ïa u.”

⁶¹ Ki te ki la ong ha ka, “Ym don uwei ruh na ki kur jong pha, ïa uba la khot da kane ka kyrteng.”

⁶² Te ki la kylli da ki dak ïa u kpa jong u, kumno u, u mon ban khot ïa u.

⁶³ U la pan te ïa i dieng lyngkniap, bad u la thoh, u da ong, “ ‘U Ïoannis’ long ka kyrteng jong u.” Baroh te ki la sngewkyndit.

⁶⁴ La plie te ïa ka shyntur jong u kumne kumne ruh, bad ïa u thylliej jong u la pyllait, bad u la kren, u da ïaroh ïa U Blei.

⁶⁵ Te ka jingsheptieng ka la ngat ha baroh kiba shong sawdong ïa ki: bad ïa kine kiei kiei baroh la pynbna kylleng ka ri lum jong ka Judia baroh.

⁶⁶ Baroh ruh kiba la ïohsngew ki la buh khop ïa ki ha ki dohnud jong ki, ki da ong, “Une u khunlung shisha u ban long kumno?” Te ka kti U Trai ka la don lem bad u.

Ka jingïathuhlypa u Sakharaïa

⁶⁷ La pyndap ruh ïa u Sakharaïa u kpa jong u da U Mynsiem Bakhuid, bad u la ïathuhlypa, u da ong,

⁶⁸ “Long ba la kyrkhu ïa U Trai uba U Blei jong u Israel; naba U la wan khmih, bad U la pynlong ka jingsiewspah ïa la ki briew;

⁶⁹ bad U la pynmih ïa ka reng ka jingpynim ïa ngi, ha ka ïing u Dabid u shakri jong U;

⁷⁰ kumba U la kren da ka shyntur ki nongïathuhlypa bakhuid jong U, kiba na mynbarim,

⁷¹ ka jingpynim na kiba shun ïa ngi, bad na ka kti kita baroh kiba isih ïa ngi;

⁷² ban pyni ka jingisynei ïa ki kpa jong ngi, bad ban kynmaw ïa ka jutang bakhuid jong U;

⁷³ ïa ka jingsmai ïa kaba U la smai ha u Abraham u kpa jong ngi,

⁷⁴ ïa ka ban ai ha ngi, ïa kiba la knieh kynthet na ka kti kiba shun ïa ngi, ba ngin shakri ïa U khlem da sheptieng,

⁷⁵ ha ka jingkhuid bad ha ka hok ha khmat jong U, baroh ki sngi ka rta jong ngi.

⁷⁶ Me ruh, ko khun, yn khot ‘u nongïathuhlypa jong U Bahakhlieh Tam Eh’; naba men leit ha shuwa ka khmat U Trai, ban pynkhreh ïa ki lynti bah jong U;

⁷⁷ ïa ka ban ai ka jingtip ïa ka jingpynim ha ki briew jong U, ha kaba map ïa ki pop jong ki,

⁷⁸ da ka jingisynei bajem eh U Blei jong ngi, da kaba ka jingmih ka sngi na jrong kan wan khmih ïa ngi,

⁷⁹ ban pynshai ïa kita kiba shong ha ka ba-dum bad ha ka syrngiew ka jingïap, ïa ka ban ïalam beit ïa ki kjat jong ngi sha ka lynti ka jingsuk.”

⁸⁰ Uta u khynnah te u la nang san, u la nang khraw bor ruh ha ka mynsiem, bad u la don ha ki ri khlaw haduh kata ka sngi ba u la pynpaw ïa lade ha u Israel.