LEBITIKOS 9 - KA BAIBL

Ka jingkñia ainguh u Aaron

¹ Ka la jia ruh ha ka sngi ka baphra, ba u Moses u la khot ïa u Aaron bad ïa ki khun shynrang jong u, bad ïa ki tymmen ki san jong ki Israel;

² te u la ong ha u Aaron, “To shim ha me da u khun masi, ïa ka ban long ka jingkñia namar ka pop, bad ïa u langbrot, ïa ka ban long ka jingkñia ainguh thang ka ba-tlem bha baroh ar, bad to wallam ïa ki ha khmat U Trai.

³ Te men kren ha ki khun Israel, da ong, ‘To shim da i khun blang ïa ka ban long ka jingkñia namar ka pop; bad ïa u khun masi bad ïa u khun langbrot, kiba shi snem baroh ar bad ki ba-tlem bha, ïa ka ban long ka jingkñia ainguh thang;

⁴ bad da u masi lyngraw, bad u langbrot ïa ka ban long ki jingkñia bapynïasuk, ban kñia ainguh ha khmat U Trai; bad ïa ka jingkñia ainguh bam ba la khleh umphniang: namar ha kane ka sngi, U Trai un mihpaw ha phi.’ ”

⁵ Kumta, ki la ïawallam ïa kita kiba u la hukum u Moses ha khmat Ka Tabernakl ka jingïaseng: bad ka jingïalang u paidbah baroh ka la ïawan hajan, bad ka la ïaïeng ha khmat U Trai.

⁶ Bad u Moses u la ong, “Kane ka long kata ïa kaba u la hukum U Trai ïa phi ban leh: bad ka burom U Trai kan sa mihpaw ha phi.”

⁷ Bad u Moses u la ong ruh ha u Aaron, “To khie leit sha kata ka duwan, bad to kñia ïa la ka jingkñia namar ka pop, bad ïa la ka jingkñia ainguh thang, bad to pynlong ïa ka jingpynïasuk na ka bynta ïa lade, bad na ka bynta u paidlang ruh: bad to kñia ainguh ïa ka jingkñia ka jong uta u paidlang, bad to pynlong ka jingpynïasuk na ka bynta jong ki; kumba u la hukum U Trai.”

⁸ Ynda kumta, u Aaron u la wan hajan ka duwan, bad u la pynïap ïa uta u khun masi jong ka jingkñia namar ka pop, kaba na ka bynta jong u hi.

⁹ Bad ki khun shynrang u Aaron ki la ïawallam ïa ka snam ha u: bad u la wieh ïa la ka shynriah'ti ha kata ka snam, bad u la thoh ïa ka halor ki reng jong kata ka duwan, bad u la theh ïa ka snam basah ha trai ka duwan:

¹⁰ hynrei, u la thang halor kata ka duwan ïa ka khleiñ, bad ïa ki khyllai, bad ïa ka sbiar kaba halor u dohnud kiba na ka jingkñia namar ka pop; kumba u la lah hukum U Trai ïa u Moses.

¹¹ Bad ïa ka doh bad ïa ka snieh u la thang ha ding shabar ka jaka shong dara.

¹² Bad u la pynïap ïa ka jingkñia ainguh thang; bad ki khun shynrang u Aaron ki la ïawallam ïa ka snam ha u, bad u la synreit ïa ka halor ka duwan baroh sawdong.

¹³ Bad ki la ïawallam ïa kata ka jingkñia ainguh thang ha u, lem bad ki dkhot jong ka, bad ka khlieh de: bad u la thang ïa ki halor kata ka duwan.

¹⁴ Bad u la sait ïa ki snier bad ïa ki kjat, ïa kiba u la thang lem bad ka jingkñia ainguh thang halor kata ka duwan.

¹⁵ U la wallam ruh ïa ka jingkñia ainguh ka jong u paidlang, bad u la shim ïa u 'lang sohmoh jong ka jingkñia namar ka pop na ka bynta uta u paidlang, bad u la pynïap ïa u, bad u la kñia ainguh ïa u na ka bynta ka pop, kum kata ka banyngkong.

¹⁶ U la wallam ruh ïa ka jingkñia ainguh thang, bad u la kñia ainguh ïa ka katba kum ka rukom.

¹⁷ Hadien kata, u la wallam ïa ka jingainguh bam, bad u la pyndap ïa la ka kti da ka, bad u la thang ïa kata halor ka duwan, nalor kata ka jingkñia ainguh thang kaba mynstep.

¹⁸ U la pynïap ruh ïa uta u masi lyngraw bad ïa uta u langbrot, ka jingkñia ka jingainguh bapynïasuk, kaba na ka bynta u paidlang: bad ki khun shynrang u Aaron ki la ïawallam ïa ka snam ha u, bad u la synreit ïa ka halor ka duwan baroh sawdong,

¹⁹ bad ïa ka khleiñ jong uta u masi lyngraw; bad na ka jong uta u langbrot, ïa ka dongnai, bad ïa ka khleiñ basop ïa ki snier ruh, bad ïa ki khyllai, bad ïa ka sbiar ba nalor u dohnud ruh de:

²⁰ Hadien kata, ki la ïabuh ïa ka khleiñ halor ki shadem, bad u la thang ïa ka khleiñ halor kata ka duwan,

²¹ ïa ki shadem ruh, bad ïa ka kti kamon u la pynkaweh u Aaron ïa ka ban long ka jingkñia kaweh ha khmat U Trai: kumba u la hukum u Moses.

²² Bad u Aaron u la kner ïa la ka kti shaphang u paidlang, bad u la kyrkhu ïa ki; bad u la hiar na kaba pynlong ïa ka jingkñia namar ka pop, bad ïa ki jingkñia ainguh thang, bad ïa ki jingkñia bapynïasuk ruh de.

²³ Ynda kumta, u Moses bad u Aaron ki la ïarung sha Ka Tabernakl ka jingïaseng, bad hadien ba ki la mih noh, ki la ïakyrkhu ïa u paidlang: bad ka burom U Trai ka la paw ha uta u paidlang baroh.

²⁴ Bad ka ding ka la mih na khmat U Trai, bad ka la thang duh halor ka duwan ïa ka jingkñia ainguh thang bad ïa ka khleiñ: bad u paidlang baroh u la ïohi, bad ki la ïarisa kmen, bad ki la ïadem ngon haduh khyndew.