LEBITIKOS 6 - KA BAIBL

¹ Bad U Trai u la kren ha u Moses, u da ong,

² “Lada uno uno ruh u leh pop, da kaba leh palat pyrshah ïa U Trai, bad u lamler ha la u paramarjan shaphang kaei kaei ba la ai sumar ha u, lane haba ïaleh lem kaei kaei, lane shaphang kaei kaei ruh ba u la knieh da ka bor, lane haba u la shukor ïa la u paramarjan;

³ lane haba u la ïoh ei ïa kaei kaei ruh ïa kaba la kum pynjah u briew, bad u kren lamler shaphang kata, bad ba u smai lamler; ha kaei kaei ruh na kita ba u ju leh, ha kiba u leh pop:

⁴ namar kata, lada jia ba u la leh pop, bad ba u la rem, ka dei ïa u ban ai noh pat ïa kata kaei kaei ïa kaba u la knieh da ka bor, lane ïa kata ïa kaba u la ïoh da ka jingshukor, lane ïa kata ba la ai sumar ha u, lane ïa kata ïa kaba u la ïoh ei na kaba u la kum pynjah noh u briew,

⁵ lane ïa kaei kaei ruh ba u briew u la smai lamler shaphang jong ka; ïa kata hi keiñ, un ai pynburia noh baroh pat, bad nalor kata ruh, ka dei ba un nang ai shuh ïa ka basan bynta: bad ha kata ka sngi ba un sa kñia na ka bynta ka jingpalat, un ai noh pat ïa kata kaei kaei ruh ha u trai jong ka hi.

⁶ Bad un wallam ha u lyngdoh ïa la ka jingkñia namar ka jingpalat ha U Trai, da u langbrot bajanai bha na ki kynhun, lem bad ka jingkheiñ dor jong me, ïa ka ban long ka jingkñia namar ka jingpalat:

⁷ bad uta u lyngdoh un pynlong ka jingpynïasuk na ka bynta jong u ha khmat U Trai, ynda kumta, yn map noh ïa u; shaphang kaei kaei baroh ba u la leh bad ba u la rem namar jong ka.”

Kiwei pat ki jingkñia ainguh thang

⁸ Bad U Trai u la kren ha u Moses, u da ong,

⁹ “To hukum ïa u Aaron bad ïa ki khun shynrang jong u, da ong, ‘Kane ka long ka niam ka rukom ka jingkñia ainguh thang: ka jingkñia ainguh thang kan long halor ki diengïap halor ka duwan baroh shi miet haduh ban da shai; bad ka ding jong kata ka duwan kan ïai-meh ha ka.

¹⁰ Uta u lyngdoh ruh un kup ïa la ka jaiñkup linen, bad un phong da ka sop lyeit linen halor ka doh jong u; ynda kumta, un khat noh ïa ka dpei kaba ka ding ka la ing lut noh ïa ka jingkñia ainguh thang halor ka duwan, bad un theh noh ïa ka te hajan ka duwan.

¹¹ Hadien kata, un law noh ïa la ki jaiñkup jaiñsem, bad un kup da kiwei pat ki jaiñ, bad un rah noh ïa kata ka dpei shabar ka jaka shong dara sha ka jaka bakhuid.

¹² Te ïa ka ding kaba halor ka duwan yn sa nang pynmeh halor jong ka, yn ym pynlip satia ïa ka; hynrei, uta u lyngdoh un nang thang dieng ha ka man ka step: bad un buh biang biang ruh ïa ka jingkñia ainguh thang halor jong ka, bad ïa ka khleiñ ki jingkñia ka jingïasuk un thang noh halor jong ka.

¹³ Ka ding kan ïai-meh halor kata ka duwan; bad yn ym pynlip satia ïa ka.

¹⁴ “ ‘Bad kane pat ka long ka niam ka rukom ka jingkñia ainguh bam: ki khun shynrang u Aaron kin wallam ïa ka ha khmat U Trai, ha khmat ka duwan.

¹⁵ Bad un shim na kata kat shi kham jong u, na u 'purew jong ka jingkñia ainguh bam, bad na ka umphniang jong ka, bad ïa ka jingiwbih baroh kaba halor kata ka jingkñia ainguh bam, ynda kumta, un thang ïa ka jingpynkynmaw jong ka halor kata ka duwan, ïa ka ban long ka jingiw baiwbih ha U Trai.

¹⁶ Bad ïa kaba dang sah na ka kin ïabam u Aaron bad ki khun shynrang jong u: bad u kpu bakhlem thiat ka dei ban bam ïa ka ha ka jaka kyntang; ha phyllaw Ka Tabernakl ka jingïaseng kin ïabam ïa ka.

¹⁷ Wat shet ïa ka bad u thiat. Nga la ai ïa kane ha ki, kum ka bynta jong ki na ki jingkñia da ka ding jong nga; kane ka long ka bakyntang tam, kumjuh kumba long ka jingkñia namar ka pop, bad ka jingkñia namar ka jingpalat.

¹⁸ Ki shynrang baroh na ki khun u Aaron kin ïabam ïa kine, kan long ka hukum ba-neh junom ha ki ïing jong phi pateng la pateng, shaphang ki jingkñia da ka ding ïa U Trai: jar uba ktah ïa ki, un long u bakyntang.’ ”

¹⁹ Bad U Trai u la kren ha u Moses, u da ong,

²⁰ “Kane ka long ka jingkñia jong u Aaron bad ki khun shynrang jong u, ïa kaba kin ïakñia ha U Trai ha kata ka sngi ba yn pynsleh ïa u; kumba ar ser shiteng u 'purew bani ïa ka ban long ka jingkñia ainguh bam kaba ha la ka sngi, marshiteng mynstep, bad marshiteng la janmiet.

²¹ Ka dei ban sdieh ïa u bad ka umphniang ha ka karai; ynda kumta, men wallam ïa ka shapoh ba la wieh: bad to ainguh ïa ki dkhot ka jingkñia ainguh bam ynda la lah sdieh ïa ki, ïa ka ban long ka jingiw baiwbih ha U Trai.

²² Bad uta u lyngdoh na ki khun shynrang jong u, ïa u ban sa thung ha ka jaka jong u un leh ïa kane: ka long ka rukom ba-neh junom ha U Trai; to thang lut baroh.

²³ Bad ïa ka jingainguh bam baroh na ka bynta uta u lyngdoh yn thang lut noh baroh: wat bam ïa ka.”

²⁴ Bad U Trai u la kren ha u Moses, u da ong,

²⁵ “To kren ha u Aaron bad ha ki khun shynrang jong u, da ong, ‘Kane ka long ka niam ka rukom jong ka jingkñia namar ka pop: ha kata ka jaka ba ki ju pynïap ïa ka jingkñia ainguh thang yn pynïap ïa ka jingkñia namar ka pop ruh ha khmat U Trai: ka long kaba la kyntang tam.

²⁶ Uta u lyngdoh uba kñia ïa ka namar ka pop uta hi un bam ïa ka: ha ka jaka kyntang yn bam ïa ka, hapoh ka phyllaw Ka Tabernakl ka jingïaseng.

²⁷ Kaei kaei ruh kaba ktah ïa ka doh jong ka kan long kaba la kyntang khuid: bad haba ka jia ba pashait na ka snam jong ka ha ka jaiñ, to sait ïa kata ha kaba la pashait snam ha ka jaka kyntang.

²⁸ Bad ïa u khiew khyndew ha uba la shet ïa ka, dei ban pynpait noh: te lada yn shet ïa ka ha u khiew rnong, dei ban khlieng, bad ban sait ïa u ha ka um.

²⁹ Ki shynrang baroh hapdeng ki lyngdoh kin bam ïa ka keiñ: ka long ka bakyntang tam eh.

³⁰ Hynrei, ïa ka jingkñia namar ka pop, ym dei ban bam da lei lei, kaba ka snam jong ka yn wallam sha Ka Tabernakl ka jingïaseng ïa ka ban pynlong ka jingpynïasuk ha ka jaka bakyntang: ka dei ban thang noh ïa ka ha ka ding.