LEBITIKOS 3 - KA BAIBL

Ka jingkñia bapynïasuk

¹ “Bad lada ka jingkñia ainguh jong u kan long ka jingkñia bapynïasuk; te lada un kñia ainguh na ki masi, to un kñia ainguh ïa ka da ka bajanai bha ha khmat U Trai, la ka long da u shynrang lane da ka kynthei.

² Bad un buh ïa la ka kti halor ka khlieh kata ka jingkñia ainguh jong u, bad un pynïap ïa ka hajan ka jingkhang Ka Tabernakl ka jingïaseng: te ki lyngdoh kiba ki khun shynrang u Aaron kin ïasynreit ïa ka snam ha ka duwan baroh sawdong.

³ Bad ïa ka jingkñia bapynïasuk, to ai ba un kñia ainguh ïa ka jingkñia da ka ding ha U Trai; ïa ka 'leiñ ïarong, bad ïa ka khleiñ baroh kaba halor ki snier,

⁴ bad ïa ki khyllai baroh ar, bad ïa ka khleiñ kaba don halor jong ki, haduh ki krung, bad ïa ka kyrdan snam kaba halor u dohnud, lem bad ki khyllai, un shim noh.

⁵ Te ki khun shynrang u Aaron kin thang ïa kita halor ka duwan, bad ïa ka jingkñia ainguh thang kaba halor ki dieng kaba halor ka ding, ïa ka ban long ka jingkñia da ka ding, ka jingiw baiwbih keiñ ha U Trai.

⁶ “Bad lada kata ïa kaba un kñia ainguh kum ka jingkñia bapynïasuk ïa U Trai kan long na ka kynhun; to un kñia ainguh ïa ka da u shynrang lane da ka kynthei bajanai bha.

⁷ Lada un kñia ainguh da i khun langbrot ha ka jingkñia ainguh jong u, ynda kumta, to un wallam ïa ita ha khmat U Trai:

⁸ bad un buh ïa la ka kti halor ka khlieh jong ka jingkñia ainguh jong u, bad un pynïap ïa ka ha khmat Ka Tabernakl ka jingïaseng: bad kin synreit ki khun shynrang u Aaron ïa ka snam jong ka halor kata ka duwan baroh sawdong.

⁹ Bad un ainguh na kata ka jingkñia bapynïasuk ïa ka jingkñia ainguh da ka ding ha U Trai; ïa ka khleiñ jong ka, bad ïa ka dongnai jong ka baroh un ot noh ïa ka na ka shyieng ingdong; lem bad ka 'leiñ ïarong, bad ïa ka khleiñ baroh kaba don halor ki snier,

¹⁰ bad ïa ki khyllai baroh ar, bad ïa ka khleiñ kaba don halor jong ki, haduh ki krung, bad ïa ka kyrdan snam kaba halor u dohnud, lem bad ki khyllai, un shim noh.

¹¹ Bad u lyngdoh un thang ïa kata halor ka duwan: ka long ka jingbam ïa ka jingkñia ainguh kaba da ka ding ha U Trai.

¹² “Te lada ka jingkñia ainguh jong u kan long da ka blang, un wallam ïa ka ha khmat U Trai;

¹³ bad un buh ïa la ka kti halor ka khlieh jong ka, bad un pynïap ïa ka ha khmat Ka Tabernakl ka jingïaseng: bad ki khun shynrang u Aaron kin ïasynreit ïa ka snam jong ka ha ka duwan baroh sawdong.

¹⁴ Bad un kñia ainguh na kata ïa ka jingkñia ainguh jong u, ka jingkñia ainguh kaba da ka ding keiñ ha U Trai; ïa ka 'leiñ ïarong bad ïa ka khleiñ baroh kaba don halor ki snier,

¹⁵ bad ïa ki khyllai baroh ar, bad ïa ka khleiñ kaba don halor jong ki, haduh ki krung, bad ïa ka kyrdan snam kaba halor u dohnud, lem bad ki khyllai, un shim noh.

¹⁶ Bad u lyngdoh un thang noh ïa ki halor ka duwan: ka long ka jingbam ïa ka jingkñia ainguh kaba da ka ding, ka jingiw baiwbih keiñ. Ka khleiñ baroh ka long ka jong U Trai.

¹⁷ Kane ka long ka hukum kaba ha la ka rta ïa phi pateng la pateng ha ki ïing jong phi baroh; lymne ïa ka khleiñ lymne ïa ka snam wat bam satia.”