LEBITIKOS 18 - KA BAIBL

Kaba adong ïa ki jingleh awria

¹ Te U Trai u la kren ha u Moses, u da ong,

² “To kren ha ki khun Israel, bad to ong ha ki, ‘Nga long U Trai U Blei jong phi.

³ Wat leh katba kum ki jingleh ka ri Ijipt, ha kaba phi la ju shong: lymne wat leh katba kum ki jingleh ka ri Kanaan, sha kaba nga ïalam ïa phi: lymne wat ïaid katba kum ki niam ki rukom jong ki.

⁴ Hynrei, ïa ki jingbishar jong nga phin leh, bad ïa ki hukum jong nga phin rakhe, ïa ka ban ïaid ha ki: Nga long U Trai U Blei jong phi.

⁵ Namar kata, to sumar ïa ki hukum jong nga, bad ïa ki jingbishar jong nga: bad u briew uba rakhe ïa ki, un ïoh im da ki: Nga long U Trai.

⁶ “ ‘Wat ai ba uno uno ruh un leit hajan ïa kata kaba ïadei kur jan bad u, ïa ka ban pynpaw ïa ka jinglyngkhuit jong ki: Nga long U Trai.

⁷ Ïa ka jinglyngkhuit u kpa jong me, lane ïa ka jinglyngkhuit ka kmie jong me, wat pynpaw: ka long ka kmie jong me; wat pynpaw ïa ka jinglyngkhuit jong ka.

⁸ Wat pynpaw ïa ka jinglyngkhuit ka tnga u kpa jong me: kata ka long ka jinglyngkhuit u kpa jong me.

⁹ Ïa ka jinglyngkhuit ka para, ka khun u kpa jong me, lane ka khun ka kmie jong me, ïa kaba la kha ha ïing, lane ha nongwei, wat pynpaw ïa ka jinglyngkhuit jong ki.

¹⁰ Ka jinglyngkhuit ka khun u khun jong me, lane ka jong ka khun ka khun jong me, wat pynpaw ïa ka jinglyngkhuit jong ki: naba ka long ka jinglyngkhuit jong me hi.

¹¹ Ka jinglyngkhuit ka khun ka tnga u kpa jong me, ka khun u kpa jong me, ka jong ka parakha jong me, wat pynpaw ïa ka jinglyngkhuit jong ka.

¹² Wat pynpaw ïa ka jinglyngkhuit ka syngken kha jong me: naba ka long ka kur bajan u kpa jong me.

¹³ Wat pynpaw ïa ka jinglyngkhuit ka kmienah lane kmiesan jong me: naba ka long ka kur bajan ka kmie jong me.

¹⁴ Wat pynpaw ïa ka jinglyngkhuit u kpanah, lane u kpasan jong me, kata ka long, wat leit hajan ïa ka tnga jong u: naba ka long ka syngken jong me.

¹⁵ Wat pynpaw ïa ka jinglyngkhuit ka pyrsa kurim jong me: naba ka long ka tnga u khun jong me; wat pynpaw ïa ka jinglyngkhuit jong ka.

¹⁶ Wat pynpaw ïa ka jinglyngkhuit ka para kynsi jong me: naba ka long ka jinglyngkhuit u para jong me.

¹⁷ Wat pynpaw ïa ka jinglyngkhuit ka briew bad ka khun jong ka; wat shim ïa ka khun jong u khun jong ka, lymne ïa ka khun ka jong ka khun jong ka, ïa ka ban pynpaw ïa ka jinglyngkhuit jong ka; kine ki long ki kur bajan jong ka hi: ka long ka jingbymman eh.

¹⁸ Wat shim ruh ïa ka briew lem bad kawei pat ka briew, ïa ka ban pynsngewsih ïa ka, da kaba pynpaw ïa ka jinglyngkhuit jong kata, lem bad kata kawei pat katba ka dang im.

¹⁹ “ ‘Bad wat leit hajan ïa ka briew ïa ka ban pynpaw ïa ka jinglyngkhuit jong ka, katba ka dang sah ha ka jingshong kyrpang ka jingbymkhuid jong ka.

²⁰ Bad wat thiah ryngkat bad ka tnga u paramarjan jong me, ïa ka ban pyntngit sang ïa lade namar jong ka.

²¹ Bad wat ai na ki khun jong me ban pynleit ïa ki da ka ding ha u Molek, lymne wat pyntngit sang ïa ka kyrteng U Blei jong me: Nga long U Trai.

²² Bad wat thiah ryngkat bad u shynrang, kumba thiah lem bad ka kynthei: ka long kaba jakhlia sang.

²³ Bad wat thiah ryngkat bad kano kano ka mrad ïa ka ban pyntngit sang ïa lade namar jong ka: bad wat ai ïa kano kano ka briew ban ïeng ha khmat uno uno u mrad ïa ka ban thiah hapoh jong u: ka long ka jingijli.

²⁴ “ ‘Bad wat pyntngit sang ïa lade ha kine kiei kiei ruh: naba da kine kiei kiei ruh baroh la pyntngit sang ïa ki jaid bynriew ba nga beh noh ïa ki ha khmat jong phi:

²⁵ Bad ïa ka ri ruh la pyntngit sang: namar kata, nga wan khmih pynshitom ïa kata ka jingbymman halor jong ka, bad kata ka ri hi ruh kan prie noh ïa kiba shongneh ha ka.

²⁶ Hynrei, phin sumar ïa ki hukum jong nga bad ïa ki jingbishar jong nga, bad phin ym leh ïa kine kiei kiei ba-ijli; lymne u trai-shnong, lymne u nongwei uba wanhap hapdeng jong phi.

²⁷ (Naba ïa kine kiei kiei ba-ijli baroh ki briew jong kata ka ri ki la leh, kiba ju shong hangta mynshuwa ïa phi, bad kata ka ri ka long ïa kaba la pyntngit sang;)

²⁸ ba kata ka ri kan ym prie noh ïa phi ruh, haba phi pyntngit sang ïa ka, kumba ka la prie noh ïa kita ki jaid bynriew kiba ju shong hangta mynshuwa ïa phi.

²⁹ Naba uno uno ruh uba leh ïa kaei kaei na kine kiba ijli, yn sa ot noh ïa kita ki mynsiem kiba leh ïa ki napdeng ki paidlang jong ki.

³⁰ Namar kata, to sumar ïa ka hukum jong nga, ba phin ym leh ïa kawei na kine ki rukom ba-ijli, ba ki la ju leh mynshuwa ïa phi, bad ba phin ym pyntngit sang ïa lade ha ki: Nga long U Trai U Blei jong phi.’ ”