LEBITIKOS 16 - KA BAIBL

Ka sngi ka jingpynïasuk

¹ U Trai u la kren ruh ha u Moses, ynda la ïap kita ki ar ngut ki khun shynrang u Aaron, mynba ki ïakñia ainguh ha khmat U Trai, bad ki la ïap;

² bad U Trai u la ong ha u Moses, “To kren ha u Aaron u hynmen jong me, ba un ym wan ha la ka sngi ha ka jaka kyntang shapoh ka jingkah, ha khmat ka jingtap-isynei kaba halor ka synduk; ba un ym ïap noh: naba ngan mihpaw ma nga halor ka jingtap-isynei ha u lyoh.

³ Kumne un wan bsut u Aaron shapoh ka jaka kyntang: bad u masi lyngraw keiñ na ka bynta ka pop, bad u langbrot kum ka jingkñia ainguh thang.

⁴ Un phong ïa kata ka sopti linen bakyntang, bad un ïoh da ki pajama jaiñ linen ha ka met jong u, bad un panpoh da ka jingpanpoh linen, lem bad ka meitr linen ruh ba un phong: kine ki long ki jaiñ bakyntang keiñ; u ruh un sait ïa la ka met ha um, haba un sa kup ïa ki.

⁵ Bad un shim na u paidlang ki khun Israel ar tylli ki khun blang shynrang ïa ka ban long ka jingkñia namar ka pop, bad uwei u langbrot ïa ka ban long ka jingkñia ainguh thang.

⁶ “Bad u Aaron un kñia ïa u masi lyngraw jong u namar ka pop, uba na ka bynta ïa lade, bad un pynlong ka jingpynïasuk na ka bynta ïa lade, bad na ka bynta ka ïing jong u.

⁷ Bad un shim ïa kita ki 'lang sohmoh baroh ar, bad un buh ïa ki ha khmat U Trai hajan ka jingkhang Ka Tabernakl ka jingïaseng.

⁸ Bad u Aaron un khalai ïa kita ki 'lang sohmoh baroh ar; kawei ka jingkhalai na ka bynta U Trai, bad kawei pat ka jingkhalai na ka bynta u 'lang-pyllait.

⁹ Bad u Aaron un wallam ïa uta u 'lang sohmoh ba la hap ka jingkhalai U Trai ha u, bad un kñia ïa u kum ka jingkñia namar ka pop.

¹⁰ Te ïa uta u 'lang sohmoh ba la hap ka jingkhalai ha u, ïa ka ban long u 'lang-pyllait, yn pynïeng im ha khmat U Trai, ïa ka ban pynlong da uta ïa ka jingpynïasuk, bad ïa ka ban pyllait ïa u sha ri khlaw kum u 'lang-pyllait noh.

¹¹ “Bad u Aaron un wallam ïa uta u masi lyngraw ka jingkñia namar ka pop, uba na ka bynta jong u hi, bad un pynlong ka jingpynïasuk na ka bynta ïa lade, bad na ka bynta ka ïing jong u, bad un pynïap ïa uta u masi lyngraw jong ka jingkñia namar ka pop uba na ka bynta jong u hi.

¹² Ynda kumta, un shim ïa u khiew thang iwbih ba-dap da u rnga ding na kata ka duwan kaba ha khmat U Trai, bad ki kti jong uba dap da ka jingiwbih thang baiwbih ba la pynlwet jin, bad un wallam ïa ka hapoh kata ka jingkah:

¹³ bad un buh ïa ka jingiwbih thang halor ka ding ha khmat U Trai, ba ka tdem kata ka jingiwbih thang kan tap lup ïa kata ka jingtap-isynei kaba halor ka jingphla, ba un ym ïap noh;

¹⁴ un shim ruh na ka snam uta u masi lyngraw bad un synreit da la ka shynriah'ti halor kata ka jingtap-isynei shaphang mihngi: bad ha khmat ka jingtap-isynei un synreit ïa ka snam hynñiew sien da la ka shynriah'ti.

¹⁵ “Ynda kumta, un pynïap ïa u 'lang sohmoh jong ka jingkñia namar ka pop, uba na ka bynta u paidlang, bad un wallam ïa ka snam jong u hapoh ka jingkah, bad un leh bad kata ka snam kumba u la leh bad ka snam uta u masi lyngraw, bad un synreit ïa ka halor kata ka jingtap-isynei, bad ha khmat ka jingtap-isynei ruh.

¹⁶ Bad un pynlong ka jingpynïasuk na ka bynta ka jaka kyntang, namar ka jingbymkhuid jong ki khun Israel, bad namar ki jingpalat jong ki ha ki jingleh pop jong ki baroh: bad kumta un leh ïa Ka Tabernakl ka jingïaseng, kaba shong lem bad ki hapdeng ki jingbymkhuid jong ki.

¹⁷ Bad wat ai ban don mano mano ruh ha Ka Tabernakl ka jingïaseng haba u leit bsut hapoh ïa ka ban pynlong ka jingpynïasuk ha ka jaka kyntang, tad ynda u la mih noh pat, bad ba u la pynlong ka jingpynïasuk na ka bynta ïa lade, bad na ka bynta ka ïing jong u, bad na ka bynta u paidlang Israel baroh ruh de.

¹⁸ Bad un mih noh na ka, sha ka duwan kaba ha khmat U Trai, bad un pynlong ka jingpynïasuk na ka bynta jong ka; bad un shim na ka snam uta u masi lyngraw, bad na ka snam uta u 'lang sohmoh, bad un thoh halor ki reng jong kata ka duwan baroh sawdong.

¹⁹ Bad un synreit na kata ka snam halor jong ka da la ka shynriah'ti, hynñiew sien, bad un pynkhuid ïa ka, bad un pynkyntang ruh ïa ka na ki jingbymkhuid ki khun Israel.

²⁰ “Te haba u la pyndep kut ïa ka ban pynkhuid ïa ka jaka kyntang, bad ïa Ka Tabernakl ka jingïaseng, bad ïa ka duwan, un wallam noh ïa u 'lang sohmoh ba-im;

²¹ bad u Aaron un buh ïa la ki kti baroh ar ha ka khlieh jong u blang ba-im, bad un phla ïa ki jingleh bymman ki khun Israel baroh, bad ïa ki jingryngkang jong ki baroh ha ki pop jong ki baroh, da kaba buh ïa ki halor ka khlieh jong u blang, ynda kumta, un phah pyllait noh ïa u sha ri khlaw da ka kti u briew uba bit.

²² Bad uta u blang un bah halor lade ïa ki pop jong ki baroh sha ka ri bakynjah: bad un pyllait ïa u blang sha ri khlaw.

²³ “Ynda kumta, u Aaron un wan pat sha Ka Tabernakl ka jingïaseng, bad un law noh ïa kita ki jaiñ linen, ïa kiba u la kup mynba u la leit bsut shapoh kata ka jaka kyntang, bad un iehnoh ïa ki hangta;

²⁴ bad un sait ïa la ka met da ka um ha ka jaka kyntang, bad un kup biang ïa la ki jaiñ, bad ynda u la mih noh, un kñia ïa ka jingkñia ainguh thang jong u hi bad ïa ka jingkñia ainguh thang jong u paidlang, bad un pynlong ka jingpynïasuk na ka bynta ïa lade bad na ka bynta u paidlang.

²⁵ Ïa ka khleiñ jong ka jingkñia namar ka pop ruh un thang halor ka duwan.

²⁶ Bad uta uba la pyllait ïa u blang ïa ka ban long u 'lang-pyllait un sait ïa la ki jaiñ, bad un sum ïa la ka met ha ka um, bad hadien kata, un wan bsut shapoh ka jaka shong dara.

²⁷ Hynrei, ïa uta u masi lyngraw ïa ka jingkñia namar ka pop, bad ïa uta u blang ïa ka jingkñia namar ka pop, kiba ïa ka snam jong ki la wallam shapoh ïa ka ban pynlong ka jingpynïasuk ha ka jaka kyntang, yn bah noh ïa ki shabar kata ka jaka shong dara; bad kin thang ha ka ding ïa ki snieh jong ki, bad ïa ka doh jong ki, bad ïa ka eit jong ki ruh de.

²⁸ Bad uta uba thang ïa ki un sait ïa la ki jaiñ, bad un sum ïa la ka met ha ka um, bad hadien kata, un ïoh wan bsut shapoh ka jaka shong dara.

²⁹ “Bad kane kan long ka hukum junom ïa phi pateng la pateng: ba ha u bnai u bahynñiew, ha ka sngi ka bashiphew jong uta u bnai, phin leh sngewsih ïa la ki mynsiem, bad phin ym kam ïa kano kano ruh ka jingkam da lei lei ruh, la u long u parakher paramer, lane u nongwei uba wanhap hapdeng jong phi:

³⁰ naba ha kata ka sngi yn pynlong ka jingpynïasuk na ka bynta jong phi, ïa ka ban pynkhuid ïa phi; khnang ba phin long kiba la khuid na ki pop jong phi baroh ha khmat U Trai.

³¹ Ka long ka Sabbaton ka jingshongthait ïa phi, bad phin pynkhuslai ïa la ki mynsiem; da ka hukum ba-neh junom.

³² Bad uta u lyngdoh, ïa uba yn pynsleh bad ïa uba yn pynkyntang, ïa ka ban kam ïa ka jingkam lyngdoh ha ka jaka u kpa jong u, un pynlong ïa ka jingpynïasuk, bad un kup ïa ki jaiñ linen, ki jaiñ kyntang keiñ:

³³ bad un pynlong ka jingpynïasuk na ka bynta ka jaka kyntang, bad un pynlong ka jingpynïasuk na ka bynta Ka Tabernakl ka jingïaseng ruh bad na ka bynta ka duwan; bad un pynlong ka jingpynïasuk na ka bynta ki lyngdoh bad na ka bynta u paidlang baroh jong kata ka jingïaseng.

³⁴ Kane ruh kan long ka hukum ba-neh junom ïa phi, ïa ka ban pynlong ka jingpynïasuk na ka bynta ki khun Israel namar ki pop jong ki baroh shi sien shi snem.” Bad u la leh kumba U Trai u la hukum ïa u Moses.