JOSHUA 9 - KA BAIBL

Ka jingshukor ki Gibeon

¹ Ka la jia ruh, haba ki syiem baroh kiba ha kane ka liang ka Jordan, ha ki lum, ha ki them, bad ha ki rud ka duriaw bah marpyrshah u Lebanon, ki Hit keiñ bad ki Amor, ki Kanaan, ki Peris, ki Hib, bad ki Jebus, ki la bna;

² ynda kumta, ki la lum lang, da kawei ka jingmut, ban ïaleh ïa u Joshua bad ïa ki Israel.

³ Te haba ki nong Gibeon ki la ïohsngew ïa kaba u Joshua u la leh ïa ka Jerikho bad ïa ka Ai,

⁴ ki ruh ki la leh sianti, bad ki la leit bad ki la leh mynleh kum ki nonglam-ktien, ki la buh ruh ïa ki byrni rim halor ki kadda jong ki, bad ki lywa snieh Waiñ ki barim ba la pdang bad ba la teh;

⁵ ki juti rim bad ba la syrdep ruh ha la ki sla'jat, bad ki jaiñ rim halor jong ki; bad u kpu ka jingbam jong ki baroh ruh u la tyrkhong bad u la bthuh.

⁶ Te ki la leit sha u Joshua ha ka dara ha Gilgal, bad ki la ong ha u, bad ha u paidbah Israel, “Ngi la wan na ka ri kaba jngai: mynta te to ïateh jutang bad ngi.”

⁷ Te u paidbah Israel u la ong ha ki Hib, “Lehse phi shong hapdeng jong ngi: namar kata, ngin ïateh jutang kumno bad phi?”

⁸ Te ki la ong ha u Joshua, “Ngi long ki shakri jong me.” Te u Joshua u la ong ha ki, “Phi long kiei? Bad na-ei phi wan?”

⁹ Te ki la ong ha u, “Ki shakri jong me ki la wan na ka ri kaba jngai eh na ka bynta ka kyrteng U Trai uba U Blei jong me: namar ba ngi la ïohsngew ïa ka nam jong u, bad ïa baroh ba u la leh ha Ijipt,

¹⁰ bad baroh ba u la leh ïa ar ngut ki syiem ki Amor, kiba sha shiliang ka Jordan, ïa u Sihon u syiem ka Heshbon, bad ïa u Og u syiem ka Bashan, uba ju don ha Ashtaroth.

¹¹ Namar kata, ki tymmen basan jong ngi bad ki trai-shnong ka ri jong ngi baroh ki la kren ha ngi, ki da ong, ‘To shim ka jingbam ryngkat bad phi ha lynti, to leit ïashem bad ki, ong ruh ha ki, “Ngi long ki shakri jong phi: namar kata, to ïateh jutang bad ngi.” ’

¹² Ïa une u kpu jong ngi, ngi la shim ban long jingbam ïa ngi haba u dang shit na la ki ïing ha kata ka sngi ba ngi la mih ban wan sha phi; hynrei mynta, ha khmih, u la tyrkhong bad u la bthuh.

¹³ Kine ruh ki lywa snieh Waiñ ba ngi la pyndap haba ki dang thymmai; ha khmih ruh, ki la pdang: ki jaiñ jong ngi ruh bad ki juti jong ngi ki la man rim namar ba jngai eh ka lynti.”

¹⁴ Te kita ki rangbah ki la shim na ka jingbam jong ki, bad kim shym la ïakylli na ka shyntur U Trai.

¹⁵ Bad u Joshua u la pynlong ka jingïasuk bad ki, bad u la ïateh jutang bad ki, ban ri im ïa ki: ki rangbah jong u paidbah ruh ki la smai ha ki.

¹⁶ Hynrei, hadien lai sngi ynda ki la ïateh jutang bad ki, ki la ïohsngew ba ki long ki paramarjan jong ki, bad ba ki shong hapdeng jong ki pynban.

¹⁷ Bad ki khun Israel ki la ïaleit, bad ki la poi ha ki shnong jong ki ha ka sngi balai. Te ki shnong jong ki, ki la long ka Gibeon, bad Khephirah, bad ka Beeroth, bad ka Kiriath-jearim.

¹⁸ Te ki khun Israel kim shym pynïap ïa ki, namar ki rangbah jong ki paidbah ki la smai ha ki da U Trai, U Blei ki Israel. Te u paidbah baroh u la khñium ïa kita ki rangbah.

¹⁹ Hynrei, ki rangbah baroh ki la ong ha u paidbah baroh, “Ngi la smai ha ki da U Trai, U Blei ki Israel: namar kata, ngim lah ban ktah ïa ki mynta.

²⁰ Ngin leh kumne ïa ki, bad to ai ba kin im; ïoh ba ka jingbitar kan hap halor jong ngi, namar kata ka jingsmai ba ngi la smai ha ki.”

²¹ Bad ki rangbah ki la ong ha ki, “Ai ba kin im:” kumta, ki long ki nongthoh dieng bad ki nongtong um ïa u paidbah baroh; kumba ki rangbah ki la kren ha ki.

²² Bad u Joshua u la khot ïa ki, bad u la kren ha ki, u da ong, “Balei phi la shukor ïa ngi, phi da ong, ‘Ngi long kiba jngai eh na phi,’ haba phi shong hapdeng jong ngi pynban?

²³ Mynta te phi long kiba la tim, bad uwei na phi un ym lait na ka ban long mraw, ki nongthoh dieng bad ki nongtong um ïa ka ïing U Blei jong ngi.”

²⁴ Te ki la ïathuh ha u Joshua, bad ki la ong, “Namar ba la ïathuh shisha ha ki shakri jong me, kumno ba U Trai U Blei jong me u la hukum ïa u Moses u shakri jong u ban ai ha phi ïa ka ri baroh, bad ban pynduh baroh ïa ki trai-shnong jong kata ka ri na khmat jong phi; namar kata, ngi la sheptieng shibun ïa la ka jingim namar jong phi, bad ngi la leh ïa kane.

²⁵ Mynta te, ha khmih, ngi don ha ka kti jong me: kumba me sngewbha bad sngewdei ban leh ïa ngi, to leh.”

²⁶ Kumta ruh, u la leh ïa ki, bad u la pyllait ïa ki na ka kti ki khun Israel, ba kim shym la pynïap ïa ki,

²⁷ bad u Joshua u la pynlong ïa ki ha kata ka sngi, ki nongthoh dieng bad ki nongtong um ïa u paidbah, bad ïa ka duwan U Trai, haduh kane ka sngi, ha kata ka jaka kaba un jied.