JOSHUA 8 - KA BAIBL

Ka buit da kaba la jop ïa ka Ai

¹ Bad U Trai u la ong ha u Joshua, “Wat sheptieng, lymne wat kyiuh: to shim ïa ki paidïapom baroh bad me, to ïeng ruh, khie leit kiew sha Ai: ha khmih, nga la ai ïa u syiem Ai ha ka kti jong me, bad u paid jong u, ka shnong jong u ruh, bad ka ri jong u ruh de:

² men leh ruh ïa ka Ai bad ïa u syiem jong ka kumba me la leh ïa ka Jerikho bad u syiem jong ka: tang ïa ka jinglute jong ka, bad ki jingri jong ka ruh, phin shim ban long ka jinglute ha lade: buh ka jingap thap ïa ka shnong na shadien jong ka.”

³ Kumta, u Joshua u la ïeng, bad ki paidïapom baroh, ban leit kiew sha Ai: bad u Joshua u la jied laiphew hajar ngut, ki rangbah bashait bad bashlur, bad u la phah noh ïa ki mynmiet.

⁴ Bad u la hukum ïa ki, u da ong, “Ha khmih phin thap ïa ka shnong, na shadien ka shnong keiñ: wat leit jngai eh na ka shnong, hynrei, phin long baroh kiba la khreh:

⁵ ma nga ruh, bad u paidbah baroh uba bad nga, ngin wan hajan ka shnong: te haba kin mih noh ïaleh ïa ngi, kumba mynnyngkong, ngin phet na khmat jong ki;

⁶ ki ruh kin wan beh ïa ngi, ha ban da ngi la ring ïa ki na ka shnong; namar kin ong, ‘Ki phet na khmat jong ngi, kumba mynnyngkong;’ kumta ngin phet na khmat jong ki:

⁷ ynda kumta, phin mih na kaba thap, bad phin jop ïa ka shnong; naba U Trai U Blei jong phi un aiti ïa ka ha ka kti jong phi.

⁸ Kan sa long ruh, ynda phi la jop ïa ka shnong, ba phin thang ïa ka shnong da ka ding; katba kum ka hukum U Trai phin leh: to khmih, nga la hukum ïa phi.”

⁹ Kumta, u Joshua u la phah noh ïa ki; ki ruh ki la leit ap thap, bad ki la shong hapdeng ka Bethel bad ka Ai, shaphang sepngi na Ai: hynrei, u Joshua u la sah ha kata ka miet hapdeng u paidbah.

¹⁰ Te u Joshua u la khie dang step, bad u la ñiew ïa ki briew, bad u la leit kiew ruh, ma u, bad ki tymmen basan ki Israel, ha shuwa u paidbah sha Ai.

¹¹ Te kita ki paidïapom baroh kiba bad u, ki la leit kiew, bad ki la leit hajan, bad ki la wan ruh ha khmat ka shnong bad ki la shong dara shaphang shatei jong ka Ai: bad la don ka them hapdeng jong ki bad ka Ai.

¹² Te u la shim kumba san hajar ngut ki briew, bad u la buh ïa ki ban ap thap hapdeng ka Bethel bad ka Ai, shaphang sepngi jong ka shnong.

¹³ Kumta, ki la buh ïa kita ki paid, u paid baroh keiñ uba shaphang shatei jong ka shnong, bad ki nongsyntiat jong ki shaphang sepngi jong ka shnong; bad u Joshua u la leit ha kata ka miet shapdeng kata ka them.

¹⁴ Te haba u syiem ka Ai u la ïohi ïa kata, ki la kyrkieh bad ki la khie dang step, bad ki briew kata ka shnong ki la mih pyrshah ïa ki Israel, ban ïapom, ma u bad ki briew jong u baroh, ha ka por ba la buh, ha shuwa ka madan; hynrei, um tip ba don kiba ap thap ïa u nadien ka shnong.

¹⁵ Te u Joshua bad ki Israel baroh ki la leh kumba ki la shah jop ha khmat jong ki, bad ki la phet na ka lynti ka ri khlaw.

¹⁶ Te la ïalum lang ïa ki briew baroh kiba la don ha shnong ban beh nadien jong ki: te ki la beh ïa u Joshua, bad la ring ïa ki na ka shnong.

¹⁷ Bad ym shym la sah shuh uwei u briew ha Ai lane ha Bethel, u bym shym la mih noh ban beh ïa ki Israel: ki la iehnoh rynghang ïa ka shnong, bad ki la beh ïa ki Israel.

¹⁸ Bad U Trai u la ong ha u Joshua, “Rah ïa uta u sum uba ha ka kti jong me shaphang Ai; namar ngan ai ïa ka ha ka kti jong me.” Te u Joshua u la rah joit ïa uta u sum ba u la don ha la ka kti shaphang kata ka shnong.

¹⁹ Te kita ki nongap thap ki la khie buk na la ka jaka, bad u tang shu rah ïa la ka kti ki la mareh shisyndon, ki la rung ruh ha kata ka shnong, bad ki la jop ïa ka; ki la pynkloi ruh, bad ki la thang ïa kata ka shnong da ka ding.

²⁰ Te haba kita ki nong Ai ki la kyrtiang, ki la ïohi, te ha khmih, ka tdem kata ka shnong ka la kiew sha bneng, te kim don bor shuh ban phet shane ne shawei: bad kita kiba la phet sha ri khlaw ki la phai kylla ïaleh ïa kita ki nongbeh.

²¹ Te haba u Joshua bad ki Israel baroh ki la ïohi ba kita kiba ap thap ki la jop ïa kata ka shnong, bad ba ka tdem kata ka shnong ka la kiew, ynda kumta, ki la phai pat, bad ki la pynïap ïa ki nong Ai.

²² Te kita kiwei ruh ki la mih noh na shnong pyrshah ïa ki, kumta, ki la don hapdeng ki Israel, kiwei ha kane ka liang, bad kiwei pat ha kata kawei ka liang: bad ki la jop ïa ki, ha ban da ym shym la iehnoh ïa uwei na ki ban sah ne ban lait.

²³ Ïa u syiem ka Ai ruh la kem im, bad ki la wallam ïa u ha u Joshua.

²⁴ Te ynda ki Israel ki la wai ban pynïap ïa ki nong Ai baroh ha madan, ha ka ri khlaw sha kaba ki la beh ïa ki, bad haba ki la kyllon baroh da ka syrti waitlam, ha ban da ki la duh noh khoit, ki Israel baroh ki la leit phai sha Ai, bad ki la pynduh ïa ka da ka syrti waitlam.

²⁵ Te baroh kiba la kyllon ha kata ka sngi, shynrang bad kynthei, ki la long khat-ar hajar, ki nong Ai baroh keiñ.

²⁶ Naba u Joshua um shym kynran noh ïa la ka kti, da kaba u la rah ïa uta u sum, ha ban da u la pynduh noh khoit ïa ki nong Ai baroh.

²⁷ Tang ki jingri bad ki jinglute jong kata ka shnong ki Israel ki la shim ban long ka jinglute ïa lade, katba kum ka ktien U Trai kaba u la hukum ïa u Joshua.

²⁸ Kumta, u Joshua u la thang ïa ka Ai, bad u la pynlong lymbher taid ïa ka junom, ka jaka kynjah keiñ, haduh mynta.

²⁹ Bad ïa u syiem ka Ai u la phasi halor u dieng haduh ban da la janmiet: te ynda la sep ka sngi, u Joshua u la hukum ba kin pynhiar ïa ka metïap jong u na uta u dieng, bad ban bred ïa ka ha khmat ka khyrdop jong kata ka shnong, bad ban kynton ka kynton maw ka bakhraw halor jong ka, haduh kane ka sngi.

La thoh ïa ka hukum halor ki maw ha u lum Ebal

³⁰ Ynda kumta, u Joshua la tei ka duwan ha U Trai, U Blei ki Israel, ha u lum Ebal,

³¹ kumba u Moses u shakri U Trai u la hukum ïa ki khun Israel, kumba la thoh ha Ka Kitab Ka Hukum u Moses, “ka duwan maw tylli, halor jong ki ym shym pyndei nar mano mano ruh:” bad ki la ainguh halor jong ka da ki jingainguh thang ha U Trai, ki la kñia ruh ki jingainguh pynïasuk.

³² U la thoh ruh hangta ha kita ki maw, ka jingkyllum ka hukum u Moses, ïa kaba u la thoh ha khmat ki khun Israel.

³³ Ki Israel baroh, bad ki tymmen basan jong ki, ki rangbah synshar jong ki bad ki nongbishar jong ki ruh, ki la ïeng baroh ar liang ïa ka synduk ha khmat ki lyngdoh ki Lebi, kiba bah ïa kata ka synduk ka jutang U Trai, u nongwei ruh kumjuh kum u trai-shnong; shiteng na ki, ki ha ka liang u lum Gerisim, bad shiteng ha ka liang u lum Ebal; kumba u Moses u shakri U Trai u la hukum, ba kin kyrkhu shuwa eh ïa u paidbah Israel.

³⁴ Hadien kata, u la pule ïa ki ktien ka hukum baroh, ïa ki jingkyrkhu bad ïa ki jingtim, katba kum ïa kaba la thoh baroh ha Ka Kitab Ka Hukum.

³⁵ Ym shym don kawei ka ktien na kaba u Moses u la hukum baroh, ïa kaba u Joshua um shym la pule ha u paidbah ki Israel, lem bad ki kynthei, bad ki khynnah, bad u nongwei uba ïaid hapdeng jong ki.