JOSHUA 7 - KA BAIBL

Ka pop u Akhan

¹ Hynrei, ki khun Israel ki la leh palat ha kata ka basang: namar u Akhan, u khun u Karmi, u khun u Sabdi, u khun u Serah, na ka jaid Judah, u la shim na kata ka basang: bad ka jingbitar U Trai ïa ki khun Israel ka la meh.

² Bad u Joshua u la phah briew na Jerikho sha Ai, kaba hajan Beth-aben, shaphang mihngi na Bethel, bad u la kren ha ki, u da ong, “To leit kiew bad jngoh ïa ka ri.” Te kita ki briew ki la leit kiew bad ki la jngoh ïa ka Ai.

³ Bad ki la wan phai sha u Joshua, ki la ong ruh ha u, “Wat ai ba ki briew baroh kin leit kiew; tang kumba ar hajar ne lai hajar briew kin leit kiew bad kin jop ïa ka Ai; wat pynshitom ïa ki briew baroh shata, naba ki long khyndiat.”

⁴ Kumta, ki la leit kiew shata na u paidbah kumba lai hajar briew: bad ki la phet ïap na khmat ki briew jong ka Ai.

⁵ Te kita ki briew jong ka Ai ki la pynïap na ki kumba laiphew hynriew ngut ki briew; bad ki la beh ïa ki na khmat ka khyrdop haduh Shebarim, bad ki la pynïap ïa ki ha ka riat: te ki dohnud uta u paidbah ki la um, bad ki la long kum ka um.

⁶ Te u Joshua u la kad ïa la ki jaiñ, bad u la hap dem la ka khmat ha ka khyndew ha khmat ka synduk U Trai haduh janmiet, ma u bad ki tymmen basan ki Israel; bad ki la tep khyndew halor la ki khlieh.

⁷ Bad u Joshua u la ong, “Waw! A Trai U Blei, balei ba me la shu wallam ïa une u paidbah sha shiliang Jordan, ban ai noh ïa ngi ha ka kti ki Amor, ban pynjot ïa ngi? A ban da ngi la shu hun, ba ngin da shong ruh sha shiliang ka Jordan!

⁸ A Trai, ngan ong aïu, haba ki Israel ki phai dien na khmat ki nongshun!

⁹ Namar ki Kanaan bad ki trai-shnong kiba ha ka ri kin ïohsngew ïa kane, bad kin ker sawdong ïa ngi, kin ot noh ruh ïa ka kyrteng jong ngi na ka khyndew: te men leh kumno ïa la ka kyrteng bakhraw?”

¹⁰ Te U Trai u la ong ha u Joshua, “To ïeng joit; balei me hap dem la ka khmat kumne?

¹¹ U Israel u la leh pop; bad ki la ryngkang ruh ïa ka jutang jong nga ïa kaba nga la hukum ïa ki: namar ki la shim ïa kata ka basang; bad ki la tuh ruh, bad ki la shukor ruh de, ki la buh ïa ka ruh hapdeng ki jingbuh jong ki.

¹² Namar kata, ki khun Israel kim lah ïeng ha khmat ki nongshun jong ki, ki phai la ka lyngthohdoh na khmat kita ki nongshun jong ki, naba, ki long kiba la tim: nga ruh ngan ym don ryngkat bad phi shuh, lymda phin pynduh ïa kata ka basang napdeng jong phi.

¹³ To ïeng noh, pynkhuid ïa u paidbah, to ong ruh, ‘To pynkhuid ïa lade hamar kaba lashai: naba kumne ong U Trai, U Blei ki Israel, “Don kata ka basang hapdeng jong me, ko Israel: mem lah ban ïeng ha khmat ki nongshun jong me, ha ban da phin pynmih noh ïa kata ka basang napdeng jong phi.”

¹⁴ Namar kata, mynstep phin wan hajan katba kum ki jaid jong phi: kan sa long ruh, ba ïa kata ka jaid ïa kaba U Trai un kem, kan wan hajan katba kum ki kur; bad ïa kata ka kur ïa kaba U Trai un kem, kan wan hajan katba kum ki ïing: bad ïa kata ka ïing kaba U Trai un kem, kan wan hajan ha la u briew u briew.

¹⁵ Kan sa long ruh, ba uta ïa uba yn kem ba don kata ka basang bad u, yn thang ïa u da ka ding, ïa u bad baroh katba u don: namar u la ryngkang ïa ka jutang U Trai, bad namar u la leh ïa ka jingbieit ha Israel.’ ”

¹⁶ Kumta, u Joshua u la khie dang step, bad u la wallam ïa ki Israel katba kum ki jaid jong ki; te la kem ïa ka jaid Judah:

¹⁷ bad u la wallam ïa ki kur u Judah; te u la kem ïa ka kur ki Serah: bad u la wallam ïa ka kur ki Serah ha la u briew u briew; bad la kem ïa u Sabdi:

¹⁸ bad u la wallam ïa ka ïing jong u ha la u briew u briew; te la kem ïa u Akhan, u khun u Karmi, u khun u Sabdi, u khun u Serah, na ka jaid Judah.

¹⁹ Te u Joshua u la ong ha u Akhan, “Ko khun, to ai burom, nga kyrpad ïa me, ha U Trai, U Blei ki Israel, bad to phla ha u; bad ïathuh ha nga mynta ïa kaei me la leh; wat buhrieh na nga.”

²⁰ Te u Akhan u la ïathuh ha u Joshua, bad u la ong, “Shisha nga la leh pop ïa U Trai, U Blei ki Israel, bad kumne bad kumtai nga la leh:

²¹ haba nga la ïohi hapdeng ki jinglute, ka barandi Babilon ba-itynnad, bad arspah shekel ka rupa, bad shi lyngkhot ka ksiar kaba sanphew shekel da ka jingthew, ynda kumta, nga la ikwah ïa ki, bad nga la shim ïa ki; ha khmih ruh, la buhrieh ïa ki hapoh khyndew hapdeng ka ïingjaiñ jong nga, bad ka rupa hapoh jong ka.”

²² Kumta, u Joshua u la phah ki briew, bad ki la ïaphet sha kata ka ïingjaiñ; ha khmih ruh, la buhrieh ïa ka ha kata ka ïingjaiñ jong u, bad kata ka rupa hapoh jong ka.

²³ Te ki la shim ïa kita napdeng kata ka ïingjaiñ, bad ki la wallam ïa ki ha u Joshua, bad ha ki khun Israel baroh; ki la buh ïa ki ruh ha khmat U Trai.

²⁴ Te u Joshua, bad ki Israel baroh lem bad u, ki la shim ïa u Akhan u khun u Serah, bad kata ka rupa, bad kata ka barandi, bad kata ka shi lyngkhot ka ksiar, ïa ki khun shynrang jong u ruh, bad ki khun kynthei, ïa ki masi dab jong u ruh, bad ki kadda jong u, bad ki langbrot jong u, bad ka ïingjaiñ jong u ruh de, bad ïa baroh katba u don: bad ki la wallam ïa ki sha ka them Akhor.

²⁵ Bad u Joshua u la ong, “Balei me la pynjynjar ïa ngi? U Trai un pynjynjar ïa me ha kane ka sngi.” Te ki Israel baroh ki la lynthem ïa u da ki maw; bad ki la thang ïa ki da ka ding, ynda ki la lynthem ïa ki da ki maw.

²⁶ Ki la kynton ruh halor jong u ka kynton maw ka bakhraw, haduh kane ka sngi; kumta U Trai u la phai noh na kaba shit lep ka jingbitar jong u. Namar kata, la kyrteng ïa kata ka jaka, “ka Them Akhor,” haduh kane ka sngi.