JOSHUA 6 - KA BAIBL

Ka jingpynkyllon ïa ka Jerikho

¹ (Te ïa ka Jerikho la khang khop namar ki khun Israel: ym don ba mih shabar, lane ba rung shapoh.)

² Bad U Trai u la ong ha u Joshua, “Ha khmih, nga la ai ha ka kti jong me ïa ka Jerikho, bad ïa u syiem jong ka, bad ki rangbah bakhrawbor.

³ Bad ki paidïapom baroh phin tawiar ïa ka shnong, da kaba ïaid sawdong ïa ka shnong shi sien. Kumta men leh hynriew sngi.

⁴ Bad hynñiew ngut ki lyngdoh kin rah ha shuwa ka synduk, hynñiew tylli ki turoi jubili: bad ha ka bahynñiew ka sngi phin ïaid sawdong ïa ka shnong, hynñiew sien, bad kita ki lyngdoh kin put da kita ki turoi.

⁵ Te haba yn put kynsan da kita ki turoi jubili, bad haba phin ïohsngew ka jingsawa kata ka turoi, u paidbah baroh un risa da ka jingrisa bajam; te ka kynroh ka shnong kan kyllon kram, bad uta u paidbah un kiew uwei uwei baroh pyrshah beit ïa u.”

⁶ Te u Joshua u khun u Nun u la khot ïa kita ki lyngdoh, bad u la ong ha ki, “To rah ïa ka synduk ka jutang, to ai ruh ba hynñiew ngut ki lyngdoh kin rah ïa ki hynñiew tylli ki turoi jubili ha shuwa ka synduk U Trai.”

⁷ Bad u la ong ha uta u paidbah, “To khie leit, to ïaid sawdong ruh ïa ka shnong, bad kita kiba kieng atiar kin nang ïaid sha shuwa ka synduk U Trai.”

⁸ Te haba u Joshua u la kren ha uta u paidbah kumta, kita ki hynñiew ngut ki lyngdoh kiba rah ïa kita ki hynñiew tylli ki turoi jubili ha khmat U Trai ki la nang ïaid, bad ki la put da kita ki turoi: bad kata ka synduk ka jutang U Trai ka la bud ïa ki.

⁹ Bad kita kiba kieng atiar ki la nang ïaid sha shuwa kita ki lyngdoh kiba put ïa kita ki turoi, bad uta u paidbah bakhatduh u la ïaid hadien kata ka synduk, kita ki lyngdoh ki da ïaid ïa-put artad ïa kita ki turoi.

¹⁰ Te u Joshua u la hukum ïa uta u paidbah, u da ong, “Phin ym risa, lymne wat ai ba yn ïohsngew ïa ka ktien jong phi, lymne kan ym mih shikyntien na ka shyntur jong phi, haduh kata ka sngi ba ngan hukum ïa phi ban risa; hangta phin sa risa.”

¹¹ Kumta, ïa kata ka synduk U Trai u la pynïaid tawiar ïa ka shnong, da kaba ïaid sawdong ïa ka shi sien; bad ki la wan sha ka dara, ki la shong ruh ha ka dara.

¹² Bad u Joshua u la khie dang step, bad kita ki lyngdoh ki la bah ïa ka synduk U Trai.

¹³ Bad kita ki hynñiew ngut ki lyngdoh kiba rah ïa kita ki hynñiew tylli ki turoi jubili ha shuwa ka synduk U Trai ki la ïai-ïaid, bad ki la put da kita ki turoi: bad kita kiba kieng atiar ki la nang ïaid sha shuwa jong ki; hynrei, uta u paidbah bakhatduh u la bud nadien kata ka synduk U Trai, bad kita ki lyngdoh ki la nang ïaid ïa-put artad da kita ki turoi.

¹⁴ Ha ka sngi ka ba-ar ruh ki la tawiar ïa ka shnong shi sien, bad ki la leit phai sha ka dara: kumta, ki la leh hynriew sngi.

¹⁵ Te ha ka bahynñiew ka sngi, ki la khie dang step haba dang shai byrngut, bad ki la tawiar ïa kata ka shnong kumjuh hynñiew sien: tang ha kata ka sngi ki la tawiar ïa ka shnong, hynñiew sien.

¹⁶ Te ha ka bahynñiew sien, haba kita ki lyngdoh ki la put da kita ki turoi, u Joshua u la ong ha uta u paidbah, “To ïarisa; namar U Trai u la ai ïa kata ka shnong ha phi.

¹⁷ Te kata ka shnong kan long kaba la tim ha U Trai, ma ka bad baroh katba don ha ka: tang ka Rahab ka nuti kan im, ma ka bad baroh kiba bad ka ha ïing, namar ka la buhrieh ïa kita ki nonglam-ktien kiba ngi la phah.

¹⁸ Phi te, la kumno kumno phin kyndiah noh ïa lade na kata kaba la tim, ba ïoh phi hi phin long kiba la tim haba phi shim na kata kaba la tim; kumta phin pynlong ka jingtim ïa ka dara ki Israel, bad phin pynjynjar ïa ka.

¹⁹ Hynrei, ka rupa bad ka ksiar, bad ki khiew ki pliang rnong bad nar baroh, ki long ba la kyntang ha U Trai: kita kin leit sha ka jingkynshew U Trai.”

²⁰ Kumta, uta u paidbah u la risa, bad kita ki lyngdoh ki la put da kita ki turoi: te haba uta u paidbah u la ïohsngew ïa ka jingsawa kata ka turoi, kumta, uta u paidbah u la risa da ka jingrisa bajam, te kata ka kynroh ka la kyllon kram, ba kumta uta u paidbah u la kiew sha shnong, uwei uwei baroh keiñ marpyrshah beit ïa u, bad ki la jop ïa kata ka shnong.

²¹ Bad ki la pynjot thiaw ïa baroh ba la don ha kata ka shnong, shynrang bad kynthei, khynnah bad tymmen, bad masi dab, bad langbrot, bad kadda, da ka syrti waitlam.

²² Hynrei, u Joshua u la ong ha kita ki ar ngut ki briew kiba la leit ban syntiat ïa kata ka ri, “Khie leit ha ka ïing kata ka nuti, bad wallam noh nangta ïa kata ka briew, bad ïa baroh ba ka don, kumba phi la smai ha ka.”

²³ Kumta, kita ki samla kiba la long nongsyntiat ki la rung, bad ki la wallam ruh ïa ka Rahab, bad ïa u kpa jong ka bad ïa ka kmie jong ka, bad ïa ki para jong ka, bad ïa baroh ba ka don, bad ki la wallam ïa ki kur jong ka baroh; bad ki la iehnoh ïa ki habar ka dara ki Israel.

²⁴ Bad ki la thang ïa kata ka shnong da ka ding, bad ïa baroh ba la don ha ka: tang ïa ka rupa bad ïa ka ksiar, bad ïa ki khiew ki pliang rnong bad nar, ki la buh ha ka jingkynshew ka ïing U Trai.

²⁵ Bad u Joshua u la ri pynim ïa ka Rahab ka nuti, bad ïa ka ïing u kpa jong ka, bad ïa baroh ba ka la don; bad ka la shong ha Israel haduh kane ka sngi; namar ba ka la buhrieh ïa kita ki nonglam-ktien, ïa kiba u Joshua u la phah ban syntiat ïa ka Jerikho.

²⁶ Te u Joshua u la pynsmai ïa ki ha kata ka por, u da ong, “Long ba la tim ha khmat U Trai ïa uta u briew uba ïeng bad uba tei ïa kane ka shnong Jerikho: “Da kaba un duh ïa la u khun nyngkong un seng ïa ka nongrim jong ka, bad da kaba un duh ïa la u khun khatduh un pynïeng ïa ki khyrdop jong ka.”

²⁷ Kumta U Trai u la don lem bad u Joshua; bad ka nam jong u, ka la phriang ïa ka ri baroh.