JOSHUA 5 - KA BAIBL

Ka jingotsher bad Ka Niam Ka Jinglait ha Gilgal

¹ Te haba baroh ki syiem ki Amor, kiba sha shiliang ka Jordan shaphang sepngi, bad baroh ki syiem ki Kanaan, kiba hajan ka duriaw, ki la ïohsngew ba U Trai u la pynrngad ïa ki um ka Jordan ha shuwa ki khun Israel, ha ban da ki la ïaleit sha shiliang, kumta ki dohnud jong ki, ki la um noh, ba ym don mynsiem shuh ha ki, namar ki khun Israel.

² Ha kata ka por, U Trai u la ong ha u Joshua, “To thaw ïa me ki tari maw, bad otsher pat ïa ki khun Israel ha ka ba-ar sien.”

³ Te u Joshua u la thaw ha u ki tari maw, bad u la otsher ïa ki khun Israel ha u lum Haaralot.

⁴ Bad kane ka daw balei ba u Joshua u la otsher: ki briew baroh, ki shynrang, ki nongïapom baroh keiñ, kiba la wan mih noh na ri Ijipt, ki la lah ïap ha ri khlaw ha lynti, ynda ki la mih noh na Ijipt.

⁵ Namar ïa ki briew baroh ba la mih noh la otsher: hynrei, ïa ki briew baroh ba la kha ha ka ri khlaw ha lynti ynda ki la mih na Ijipt, ïa kita ym pat shym la otsher.

⁶ Namar ki khun Israel ki la ïaid ha ri khlaw sawphew snem, ha ban da u paidbah baroh, kiba long ki nongïapom kiba la mih na Ijipt, ki la duh noh khoit, namar ba kim shym la kohnguh ïa ka ktien U Trai: ha kiba u la smai ba un ym shah ba kin ïohi ïa kata ka ri kaba U Trai u la smai ha ki kpa jong ki ba un ai ha ngi, ka ri kaba tuid da ka dud bad ka ngap keiñ.

⁷ Te kita ki khun jong ki, kiba u la pynmih ha ka jaka jong ki, ïa kita, u Joshua u la otsher: naba ki long ki bym shym la otsher namar ba ym shym la otsher ïa ki ha lynti.

⁸ Te ynda la lah otsher ïa ki briew baroh, ki la sah ha la ki jaka ha ka dara, ha ban da ki la koit.

⁹ Te U Trai u la ong ha u Joshua, “Ha kane ka sngi nga la pyntyllun noh na phi ïa ka rain ka Ijipt.” Namar kata, u la kyrteng ïa kata ka jaka “ka Gilgal,” haduh mynta.

¹⁰ Bad ki khun Israel ki la shong dara ha Gilgal; bad ki la rakhe ïa Ka Jingkhawai Ka Jinglait ha ka bakhatsaw sngi jong uta u bnai mynmiet ha ki madan Jerikho.

¹¹ Ki la bam ruh da u Kew rim kata ka ri kum lashai hadien Ka Niam Ka Jinglait, ki kpu bakhlem thiat bad u shira, ha kajuh ka sngi.

¹² Te kata ka manna ka la wai noh kum lashai, ynda ki la bam da uta u Kew rim kata ka ri; bad ki khun Israel kim shym ïoh manna shuh; hynrei, ki la bam da u soh ka ri Kanaan ha kata ka snem.

U angel u mihpaw ha u Joshua

¹³ Te haba u Joshua u la hajan ka Jerikho, u la khmied ïa la ki khmat bad u la khmih, te, ha khmih, la ïeng u briew ha marpyrshah jong u la ka talwar ba la sei ha ka kti: te u Joshua u la leit sha u, bad u la ong ha u, “Me ha ka liang jong ngi, ne ha ka liang ki nongïaleh ïa ngi?”

¹⁴ Te u la ong, “Em; hynrei kum u kaptan jong u paidïapom jong U Trai nga la wan mynta.” Bad u Joshua u la dem ngon la ka khmat ha khyndew, bad u la mane, bad u la ong ha u, “U Kynrad jong nga u ong aïu ha la u shakri?”

¹⁵ Te uta u kaptan jong u paidïapom jong U Trai u la ong ha u Joshua, “To loit noh la ki juti na la ki sla'jat; namar kata ka jaka ha kaba me ïeng ka bakhuid.” Te u Joshua u la leh kumta.