JOSHUA 4 - KA BAIBL

Ki khat-ar tylli ki maw ba la shim na ka Jordan

¹ Te ynda u paidbah baroh phar u la ryngkang sha shiliang ka Jordan, U Trai u la kren ha u Joshua, u da ong,

² “Shim phi khat-ar ngut ki briew na u paidbah, uwei uwei u briew na kawei ka jaid keiñ,

³ bad to hukum ïa ki, da ong, ‘To shim phi nangne napdeng ka Jordan, na kata ka jaka ha kaba ki sla'jat ki lyngdoh ki la ïeng skhem, khat-ar tylli ki maw, phin rah ïa ki ruh sha shiliang ryngkat bad phi, to buh ruh ïa ki ha kata ka jaka sah miet, ha kaba phin sah ha kane ka miet keiñ.’ ”

⁴ Ynda kumta, u Joshua u la khot ïa kita ki khat-ar ngut, kiba u la khreh lypa na ki khun Israel, uwei uwei u briew na kawei ka jaid:

⁵ U Joshua u la ong ruh ha ki, “To leit sha shiliang ha shuwa ka synduk U Trai U Blei jong phi shapdeng ka Jordan, to rah ruh uwei uwei baroh na phi ïa la u maw halor la ka tyrpeng, katba kum ka jingkheiñ ki jaid ki khun Israel:

⁶ ba kane kan ïoh long ka dak hapdeng jong phi, ba haba ki khun jong phi kin kylli lashai lashisngi, da kaba ong, ‘Da kine ki maw phi mut aïu?’

⁷ Ynda kumta, phin ïathuh ha ki, ‘La pyndkut noh ïa ki um ka Jordan ha shuwa ka synduk ka jutang U Trai; mynba ka la leit sha shiliang ka Jordan, ïa ki um ka Jordan la pyndkut noh: bad kine ki maw kin long ka jingkynmaw ïa ki khun Israel junom.’ ”

⁸ Te ki khun Israel ki la leh kumta kumba u Joshua u la hukum, ki la shim ruh ïa ki khat-ar tylli ki maw napdeng ka Jordan, kumba U Trai u la kren ha u Joshua, katba kum ka jingkheiñ ki jaid ki khun Israel; ki la rah ruh ïa ki sha shiliang ryngkat bad ki sha kata ka jaka ha kaba ki la sah miet, bad ki la buh ïa ki hangta.

⁹ Bad u Joshua u la pynïeng khat-ar tylli ki maw hapdeng ka Jordan, ha kata ka jaka ha kaba ki sla'jat kita ki lyngdoh kiba la bah ïa kata ka synduk ka jutang ki la ïeng: ki don hangta ruh, haduh kane ka sngi.

¹⁰ Te kita ki lyngdoh kiba bah ïa kata ka synduk ki la ïeng hapdeng ka Jordan, ha ban da la pyndep ïa baroh ba la hukum U Trai ha u Joshua ban kren ha u paidbah, katba kum ïa baroh ba la hukum u Moses ha u Joshua: te uta u paidbah u la kyrkieh bad u la leit sha shiliang.

¹¹ Te ynda uta u paidbah baroh phar u la leit sha shiliang, kata ka synduk U Trai ruh ka la leit sha shiliang, bad kita ki lyngdoh, ha khmat uta u paidbah.

¹² Ki khun u Reuben, bad ki khun u Gad, bad ka shiteng ka jaid Manasseh ruh, ki la leit sha shiliang kiba la kieng atiar, ha khmat ki khun Israel, kumba u Moses u la kren ha ki:

¹³ kumba sawphew hajar ba la kieng atiar ban hiar thma ki la leit ha khmat U Trai sha ka thma, sha ki madan Jerikho.

¹⁴ Ha kata ka sngi, U Trai u la pyndonburom ïa u Joshua ha khmat ki Israel baroh; te ki la sheptieng ïa u, kumba ki la ju sheptieng ïa u Moses, baroh ki sngi ka rta jong u.

¹⁵ Bad U Trai u la kren ha u Joshua, u da ong,

¹⁶ “To hukum ïa kita ki lyngdoh kiba bah ïa kata ka synduk ka jingphla, ba kin ïawan kiew na Jordan.”

¹⁷ Namar kata, u Joshua u la hukum ïa kita ki lyngdoh, u da ong, “To wan kiew noh na Jordan.”

¹⁸ Te haba kita ki lyngdoh kiba bah ïa kata ka synduk ka jutang U Trai ki la kiew noh napdeng ka Jordan, bad ba ki sla'jat kita ki lyngdoh ki la kiew sha ryngkew, ki um ka Jordan ki la phai pat sha la ka jaka, bad ki la shlei ïa la ki rud baroh, kumba mynshuwa.

¹⁹ Bad uta u paidbah u la kiew na Jordan ha ka bashiphew sngi jong u bnai u banyngkong, bad ki la shong dara ha Gilgal, ha ka pud kaba shaphang mihngi jong ka Jerikho.

²⁰ Te ïa kita ki khat-ar tylli ki maw, ïa kiba ki la rah na Jordan, u Joshua u la thung ha Gilgal.

²¹ U la kren ruh ha ki khun Israel, u da ong, “Haba ki khun jong phi kin sa kylli lashai lashisngi; da kaba ong, ‘Kine ki maw ki mut aïu?’

²² Ynda kumta, phin pyntip ha la ki khun, da kaba ong, ‘Ki Israel ki la ryngkang ïa kane ka Jordan na ryngkew.’

²³ Naba U Trai U Blei jong phi u la pynrngad ïa ki um ka Jordan ha shuwa jong phi, ha ban da phi la leit sha shiliang, kumba U Trai U Blei jong phi u la leh ïa ka Duriaw Basaw, ïa kaba u la pynrngad na shuwa jong ngi, ha ban da ngi la leit sha shiliang:

²⁴ ba ki bynriew baroh ha ka pyrthei kin dup ithuh ïa ka kti U Trai, ba ka long kaba don bor; ba kin dup sheptieng ïa U Trai U Blei jong phi junom.”