JOSHUA 3 - KA BAIBL

Ki paidbah ki la leit sha shiliang ka Jordan

¹ Te u Joshua u la khie dang step, bad ki la ïamih na Shittim, bad ki la ïapoi sha Jordan, ma u bad ki khun Israel baroh; bad ki la shong shuwa hangta, ki sa ryngkang sha shiliang.

² Ka la jia ruh ynda la lai sngi, ba ki rangbah ki la ïaid lyngba ïa ki dara;

³ bad ki la hukum ïa u paidbah, ki da ong, “Haba phi ïohi ïa ka synduk ka jutang U Trai U Blei jong phi, bad ba ki lyngdoh ki Lebi ki da bah ïa ka, ynda kumta, phin ïeng na ka jaka jong phi, bad phin leit hadien jong ka.

⁴ Hynrei, phin kham pajih hapdeng jong phi bad ka, kumba ar hajar pruh da ka jingthew: wat wan hajan jong ka, ba phin tip ïa ka lynti da kaba phin ïaid; naba phim ju ïaid na kane ka lynti mynno mynno ruh.”

⁵ Te u Joshua u la ong ha u paidbah, “To pynkyntang ïa lade; namar lashai U Trai un leh ïa ki jingphylla hapdeng jong phi.”

⁶ U Joshua u la kren ruh ha ki lyngdoh, u da ong, “To ïarah ïa ka synduk ka jutang, bad leit sha shiliang ha shuwa u paidbah.” Te ki la ïarah ïa ka synduk ka jutang, bad ki la leit ha shuwa u paidbah.

⁷ Bad U Trai u la ong ha u Joshua, “Ha kane ka sngi, ngan sdang ban pynkhraw ïa me ha khmat ki Israel baroh, ba kin ïoh tip ba, kumba nga la don ryngkat bad u Moses, kumta, ngan don ryngkat bad me.

⁸ Bad men hukum ïa ki lyngdoh kiba bah ïa ka synduk ka jutang, da ong, ‘Haba phi la poi harud ka um ka Jordan, phin sangeh ha ka Jordan.’ ”

⁹ Te u Joshua u la ong ha ki khun Israel, “Ale shane, bad to sngap ïa ki ktien U Trai U Blei jong phi.”

¹⁰ Bad u Joshua u la ong ruh, “Da kane phin tip ba U Blei u ba-im u don hapdeng jong phi, bad ba da shisha un beh ha shuwa jong phi ïa ki Kanaan, bad ïa ki Hit, bad ïa ki Hib, bad ïa ki Peris, bad ïa ki Girgash, bad ïa ki Amor, bad ïa ki Jebus.

¹¹ Ha khmih, ka synduk ka jutang U Trai ka pyrthei baroh ka leit ha shuwa jong phi sha Jordan.

¹² Mynta te, to shim khat-ar ngut ki rangbah na ki jaid Israel, uwei uwei u rangbah na kawei ka jaid.

¹³ Kan jia ruh ba, katba ki poh'jat ki lyngdoh kiba bah ïa ka synduk U Trai, U Trai ka pyrthei baroh keiñ, kin ïeng ha ki um ka Jordan, ba ïa ki um ka Jordan yn pynkhlad noh, kata, ïa ki um kiba hiar na neng; bad kin ïeng kum ka kynton.”

¹⁴ Te haba ki paidbah ki la ïamih na la ki ïingjaiñ, ban leit sha shiliang ka Jordan, bad ki lyngdoh kiba bah ïa ka synduk ka jutang ki ha shuwa u paidbah;

¹⁵ bad haba kita kiba bah ïa ka synduk ki la poi ha Jordan, bad ba ki poh'jat kita ki lyngdoh kiba bah ïa ka synduk ki la dei ha ka rmiang ka um, (namar ka Jordan ka ju shlei miar baroh ka aïom ot,)

¹⁶ te kita ki um kiba hiar na neng ki la ïeng, bad ki la ïeng kum ka kynton, kham sha jngai eh, hajan ka shnong Adam, kaba ha syndah ka Sarethan: bad kita kiba hiar sha ka duriaw ka madan, ka Duriaw Mluh keiñ, ki la duh khoit: kumta, u paidbah u la leit sha shiliang marpyrshah ka Jerikho.

¹⁷ Bad ki lyngdoh kiba bah ïa ka synduk ka jutang U Trai ki la ïeng skhem ha ryngkew hapdeng ka Jordan, bad ki Israel baroh ki la leit sha shiliang na ryngkew, ha ban da u paidbah baroh u la leit phar sha shiliang ka Jordan.