JOSHUA 23 - KA BAIBL

Ki jingsneng u Joshua ïa ki paidbah

¹ Te kham slem, ynda U Trai u la ai ka jingshongthait ïa ki Israel na ki nongshun jong ki baroh kylleng sawdong, u Joshua u la man tymmen bad u la hiar arsut ka rta;

² bad u Joshua u la phah khot ïa ki Israel baroh, ïa ki tymmen basan keiñ jong ki bad ïa ki rangbah jong ki, bad ïa ki nongbishar jong ki bad ïa ki nongkam jong ki, bad u la ong ha ki, “Nga la tymmen bad nga la hiar arsut ka rta:

³ phi ruh phi la ïohi ïa baroh kaba U Trai U Blei jong phi u la leh ïa kine ki jaid bynriew baroh na ka bynta jong phi; namar U Trai U Blei jong phi keiñ u long uta uba la ïaleh na ka bynta jong phi.

⁴ Ha khmih, nga la ïasam ha phi ïa kine ki jaid bynriew ba dang sah, ban long ki jingïoh kynti ïa ki jaid jong phi, naduh Jordan, lem bad kita ki jaid bynriew baroh ba nga la ot noh, haduh ka duriaw bad shaphang sepngi.

⁵ Bad U Trai U Blei jong phi un beh noh ma u ïa ki ha shuwa jong phi, bad un beh noh ïa ki na khmat jong phi; bad phin ïoh ïa ka ri jong ki, kumba U Trai U Blei jong phi u la ong ha phi.

⁶ Namar kata, phin long shlur bha ban sumar bad ban leh ïa baroh kaba la thoh ha Ka Kitab Ka Hukum u Moses, ba phin ym phai noh na ka sha kamon lane sha kadiang;

⁷ ba phin ym ïalok bad kine ki jaid bynriew, kiba dang sah hapdeng jong phi; lymne wat ong ïa ka kyrteng ki blei jong ki, lymne smai ha ki, lymne shakri ïa ki, lymne dem ïa lade ha ki:

⁸ hynrei, to snoh ha U Trai U Blei jong phi, kumba phi la leh haduh kane ka sngi.

⁹ Namar U Trai u la beh noh na khmat jong phi ïa ki jaid bynriew bakhraw bad badonbor: hynrei ïa phi, ym shym don uwei u briew uba la ïeng ha khmat jong phi haduh kane ka sngi.

¹⁰ Uwei u briew na phi un beh ïa ki shi hajar: namar U Trai U Blei jong phi u long ma u uba ïaleh na ka bynta jong phi, kumba u la ong ha phi.

¹¹ Namar kata, to sumar bniah ïa lade, ba phin ieit ïa U Trai U Blei jong phi.

¹² Lymda kumta, lada phin phai kumno kumno ruh, bad phin snoh ha kita kiba dang sah na kine ki jaid bynriew, kine kiba dang sah hapdeng jong phi keiñ, bad phin ïashongkurim bad ki, bad phin ïaleit shapoh sha ki, bad ki sha phi:

¹³ to tip da shisha ba U Trai U Blei jong phi un ym beh shuh ïa kine ki jaid bynriew na khmat jong phi; hynrei, kin long ki shangkhawiah bad ki jingriam ïa phi, bad ki jingsympat ha ki krung jong phi, bad ki shiah ha ki khmat jong phi, ha ban da phin duh noh na kane ka ri ka babha kaba U Trai U Blei jong phi u la ai ha phi.”

¹⁴ “Ha khmih ruh, ha kane ka sngi nga leit ha ka lynti ka pyrthei baroh: bad phi ruh phi tip ha la ka dohnud baroh bad ha la ki mynsiem baroh, ba ym shym duh kawei na kita kiei kiei ki babha baroh ba U Trai U Blei jong phi u la kren shaphang jong phi; ki la jia long baroh ha phi, bad kam shym duh kawei na ki.

¹⁵ Te kan long, ba kumba kiei kiei baroh ki babha ki la jia ha phi ïa kiba U Trai U Blei jong phi u la ong ha phi, kumta U Trai un wallam halor jong phi ïa kiei kiei ki basniew baroh, haduh ban da la pynduh noh khoit ïa phi na kane ka ri ka babha ïa kaba U Trai U Blei jong phi u la ai ha phi.

¹⁶ Haba phin ryngkang ïa ka jutang U Trai U Blei jong phi, kaba u la hukum ïa phi, bad phin leit shakri ïa kiwei ki blei, bad phin dem ïa lade ha ki; ynda kumta, ka jingbitar U Trai kan meh pyrshah ïa phi, bad phin duh shen na kane ka ri ka babha kaba u la ai ha phi.”