JOSHUA 22 - KA BAIBL

Ka duwan ba la tei harud ka Jordan

¹ Ynda kumta, u Joshua u la khot ïa ki Reuben, bad ïa ki Gad, bad ki shiteng jaid jong u Manasseh,

² bad u la ong ha ki, “Phi la sumar ïa baroh kaba u Moses u shakri U Trai u la hukum ïa phi, bad phi la kohnguh ïa ka ktien jong nga baroh kaba nga la hukum ïa phi:

³ phim shym iehnoh la katta sngi ïa la ki para jin haduh kane ka sngi, hynrei, phi la sumar ïa ka rukom ka hukum U Trai U Blei jong phi.

⁴ Mynta te, U Trai U Blei jong phi u la ai ka jingshongthait ïa ki para jong phi, kumba u la ong ïa ki: namar kata, mynta phin phai noh, bad phin leit noh sha la ki ïingjaiñ, bad ha ka ri ka bynta jong phi, ïa kaba u Moses u shakri U Trai u la ai ha phi sha shiliang ka Jordan.

⁵ Hynrei, sumar bniah ban leh ïa ka hukum bad ka aiñ, kiba u Moses u shakri U Trai u la hukum ïa phi, ban ieit ïa U Trai U Blei jong phi, bad ban ïaid ha ki lynti jong u baroh, bad ban sumar ïa ki hukum jong u, bad ban snoh ha u, bad ban shakri ïa u da la ka dohnud baroh bad da la ka mynsiem baroh.”

⁶ Kumta, u Joshua u la kyrkhu ïa ki, bad u la phah noh ïa ki: te ki la leit sha la ki ïingjaiñ.

⁷ Te ha ka shiteng ka jaid u Manasseh, u Moses u la ai ka bynta ha Bashan: hynrei, ha kata kawei pat ka shiteng, u Joshua u la ai hapdeng ki para jong ki ha kane ka liang ka Jordan shaphang sepngi. Bad haba u Joshua u la phah noh ïa ki ha la ki ïingjaiñ, u la kyrkhu ïa ki,

⁸ bad u la kren ha ki, u da ong, “To phai noh sha la ki ïingjaiñ bad bun ki spah, bad ki jingri shibun eh, bad ka rupa bad ka ksiar, bad ka rnong bad ka nar, bad ki jaiñ shibun eh: to ïasam ïa ka jinglute ki nongshun jong phi bad la ki para.”

⁹ Te ki khun u Reuben bad ki khun u Gad bad ka shiteng jaid u Manasseh ki la phai, bad ki la mih noh na ki khun Israel na Sheiloh, kaba ha ka ri Kanaan, ban leit sha ka ri Gilead, sha ka ri ka bynta jong ki, kaba ki la ïoh, katba kum ka ktien U Trai da ka kti u Moses.

¹⁰ Te haba ki la wan sha ki rud ka Jordan, kiba ha ka ri Kanaan, ki khun u Reuben bad ki khun u Gad bad ka shiteng jaid u Manasseh ki la tei hangta ka duwan harud ka Jordan, ka duwan kaba khraw kaba paw bha.

¹¹ Te ki khun Israel ki la ïohsngew ba la ong, “Ha khmih, ki khun u Reuben bad ki khun u Gad bad ka shiteng jaid u Manasseh ki la tei ka duwan marpyrshah ka ri Kanaan, ha ki rud ka Jordan, ha kaba ki khun Israel ki la ryngkang.”

¹² Te haba ki khun Israel ki la ïohsngew ïa kata, u paidbah ki khun Israel baroh ki la ïalum lang ha Sheiloh, ban ïaleh thma ïa ki.

¹³ Bad ki khun Israel ki la phah ïa u Phinehas, u khun u Eleasar lyngdoh, ha ki khun u Reuben, bad ha ki khun u Gad, bad ha ka shiteng jaid jong u Manasseh, sha ka ri Gilead:

¹⁴ lem bad u ruh shiphew ngut ki rangbah, uwei uwei u rangbah na kawei kawei ka ïing u kpa na ki jaid Israel baroh; bad uwei uwei ruh u la long u rangbah ha ka ïing ki kpa jong ki hapdeng ki hajar jong ki Israel.

¹⁵ Bad ki la wan ha ki khun u Reuben, bad ha ki khun u Gad, bad ha ka shiteng jaid u Manasseh, ha ka ri Gilead, bad ki la ïakren bad ki, ki da ong,

¹⁶ “Kumne u ong u paidbah U Trai baroh, ‘Ka jingryngkang kaba kumno kane kaba phi la leh pyrshah ïa U Blei ki Israel, ban phai noh ha kane ka sngi na kaba bud ïa U Trai, ha kaba phi la tei ka duwan ha phi, ïa ka ban ïaleh pyrshah ïa U Trai ha kane ka sngi?

¹⁷ Hato ka pop u Peor kam biang ïa ngi, na kaba ym shym la pynkhuid ïa ngi haduh kane ka sngi, la ka la ngat ka jingïapthem ruh ha u paidbah U Trai,

¹⁸ ba phin shu phai noh ha kane ka sngi na kaba bud ïa U Trai? bad kan long, naba phi ïaleh pyrshah ïa U Trai ha kane ka sngi, ba lashai un bitar ïa u paidbah Israel baroh.

¹⁹ Hynrei, lada ka ri ka bynta jong phi ka tngit, kumta wan sha shiliang sha ka ri ka bynta U Trai, ha kaba Ka Tabernakl U Trai ka shong, bad shim bynta hapdeng jong ngi: hynrei, wat ïaleh pyrshah ïa U Trai, lymne ïaleh pyrshah ïa ngi, da kaba tei ha phi kawei pat ka duwan nalor ka duwan U Trai U Blei jong ngi.

²⁰ U Akhan u khun u Serah um shym la leh palat ha kata ka basang, bad ka jingbitar ka la hap ha u paidbah ki Israel baroh? bad uta u briew um shym la jot marwei ha la ka pop.’ ”

²¹ Ynda kumta, ki khun u Reuben bad ki khun u Gad bad ka shiteng jaid u Manasseh ki la ïathuh, bad ki la ong ha ki rangbah ki hajar jong ki Israel,

²² “U Trai, U Blei ki blei, U Trai, U Blei ki blei, u tip, bad u Israel un sa tip; lada ka long ha ka jingïaleh pyrshah, lane lada ha ka jingpalat ïa U Trai, (wat pynim ïa ngi ha kane ka sngi,)

²³ ba ngi la tei ka duwan ha ngi ban phai noh na kaba bud ïa U Trai; lane lada ïa ka ban ainguh halor jong ka, ka jingainguh thang lane ka jingainguh bam, lane lada ban kñia halor jong ka ki jingkñia pynïasuk, to U Trai hi un pan;

²⁴ bad lada ngim shym leh ïa kane da kaba leh sumar khnang, ngi da ong, ‘Lashai lashisngi ki khun jong phi ki lah ban kren ha ki khun jong ngi, da kaba ong, “Phi donkam aïu bad U Trai U Blei ki Israel?” ’

²⁵ namar U Trai u la buh ïa ka Jordan ban long ka pud hapdeng jong ngi bad jong phi, ma phi ki khun u Reuben bad ki khun u Gad keiñ; phim don ka bynta ha U Trai: kumta, ki khun jong phi kin khang ïa ki khun jong ngi ïa ka ban sheptieng ïa U Trai.

²⁶ Namar kata, ngi la ong, ‘Ïa ngin ïakhreh mynta ban tei ka duwan ha ngi, ym ïa ka jingainguh thang, lymne ïa ka jingkñia:

²⁷ hynrei, ba kan long ka sakhi hapdeng jong ngi bad jong phi, bad ki khun ki ksiew jong ngi hadien jong ngi, ba ngi lah ban shakri ïa U Trai ha khmat jong u da la ki jingainguh thang, bad da la ki jingkñia, bad da la ki jingainguh pynïasuk; ba ki khun jong phi kin ym ong ha ki khun jong ngi lashai lashisngi, “Phim don ka bynta ha U Trai.” ’

²⁸ Namar kata, ngi la ïa-ong, ‘Kan long, haba kin ong kumta ha ngi lane ha ki khun ki ksiew jong ngi lashai lashisngi, ba ngi ruh ngin ong pat, “Ha khmih, ka dur ka duwan U Trai, kaba ki kpa jong ngi ki la thaw, ym ïa ka jingainguh thang, lymne ïa ka jingkñia; hynrei, ka long ka sakhi hapdeng jong ngi bad jong phi.” ’

²⁹ Kaba jngai ïa ngi ban ïaleh pyrshah ïa U Trai, bad ban phai noh ha kane ka sngi na kaba bud ïa U Trai, ban tei ïa ka duwan ïa ka jingainguh thang, lane ïa ka jingainguh bam, lane ïa ka jingkñia, nalor kata ka duwan ka jong U Trai U Blei jong ngi kaba ha khmat Ka Tabernakl jong u.”

³⁰ Te haba u Phinehas lyngdoh, bad ki rangbah u paidbah, kata, ki rangbah ki hajar ki Israel kiba la don ryngkat bad u, ki la ïohsngew ïa kita ki ktien kiba ki khun u Reuben bad ki khun u Gad bad ki khun u Manasseh ki la ïakren, ki la sngewbha shibun.

³¹ Bad u Phinehas u khun u Eleasar lyngdoh u la ong ha ki khun u Reuben, bad ha ki khun u Gad, bad ha ki khun u Manasseh, “Ha kane ka sngi ngi la tip ba U Trai u don hapdeng jong ngi, namar phim shym leh ïa kane ka jingpalat ïa U Trai: kumta, phi la pyllait ïa ki khun Israel na ka kti U Trai.”

³² Bad u Phinehas u khun u Eleasar lyngdoh, bad kita ki rangbah, ki la ïaphai noh na ki khun u Reuben, bad na ki khun u Gad, na ka ri Gilead, sha ka ri Kanaan, ha ki khun Israel, bad ki la wallam ktien ha ki pat.

³³ Te kata ka la pynsngewbha ïa ki khun Israel; bad ki khun Israel ki la kyrkhu ïa U Blei, bad kim shym kren shuh ban leit ïaleh thma ïa ki, ïa ka ban pynjot ïa kata ka ri ha kaba ki khun u Reuben bad ki khun u Gad ki la shong.

³⁴ Te ki khun u Reuben bad ki khun u Gad ki la kyrteng “ka Ed” ïa kata ka duwan: “Namar kane,” ki la ong, “ka long ka sakhi hapdeng jong ngi ba U Trai u long U Blei.”