JOSHUA 21 - KA BAIBL

Ki nongbah jong ki Lebi

¹ Ynda kumta, ki rangbah ki kpa ki Lebi ki la wan hajan ha u Eleasar lyngdoh, bad ha u Joshua u khun u Nun, bad ha ki rangbah ki kpa ki jaid ki khun Israel;

² bad ki la kren ha ki ha Sheiloh ha ka ri Kanaan, ki da ong, “U Trai u la hukum da ka kti u Moses ban ai ha ngi ki nongbah ba ngin shong, bad ki rudnong jong ki, ïa ki jingri jong ngi.”

³ Bad ki khun Israel ki la ai ha ki Lebi na kata ka jingïoh kynti jong ki, da ka hukum U Trai, ïa kine ki nongbah bad ki rudnong jong ki.

⁴ Bad ka jingkhalai ka la hap ha ka ïing ki Kohath: bad ki khun u Aaron lyngdoh, kiba long ki Lebi, ki la ïoh da ka jingkhalai na ka jaid u Judah, bad na ka jaid u Simeon, bad na ka jaid u Benjamin, khatlai ki nongbah.

⁵ Bad kiba dang sah na ki khun u Kohath ki la ïoh da ka jingkhalai na ki ïing ka jaid u Ephraim, bad na ka jaid u Dan, bad na shiteng ka jaid u Manasseh, shiphew ki nongbah.

⁶ Bad ki khun u Gershon ki la ïoh da ka jingkhalai na ki ïing ka jaid u Issakhar, bad na ka jaid u Asher, bad na ka jaid Naphtali, bad na shiteng ka jaid u Manasseh ha Bashan, khatlai ki nongbah.

⁷ Ki khun u Merari kat kum ki ïing jong ki, ki la ïoh na ka jaid u Reuben, bad na ka jaid u Gad, bad na ka jaid u Sabulon, khat-ar ki nongbah.

⁸ Bad ki khun Israel ki ïa-ai da ka jingkhalai ha ki Lebi ïa kine ki nongbah bad ki rudnong jong ki, kumba U Trai u la hukum da ka kti u Moses.

⁹ Bad ki la ai na ka jaid ki khun u Judah, bad na ka jaid ki khun u Simeon, ïa kine ki nongbah kiba la ong hangne da ka kyrteng:

¹⁰ bad ki la long ïa ki khun u Aaron, na ki ïing ki Kohath, kiba na ki khun u Lebi: namar ka jong ki ka la long ka jingkhalai banyngkong.

¹¹ Bad ki la ai ha ki, ïa ka Kiriath-arba, uta u Arba u la long u kpa u Anak, (kata ka long “ka Hebron”), ha ri lum Judah, bad ki rudnong jong ka baroh sawdong.

¹² Hynrei, ïa ki lyngkha jong kata ka nongbah, bad ki nongrit jong ka, ki la ai ha u Kaleb u khun u Jephunneh ban long ka jong u.

¹³ Bad ki la ai ha ki khun u Aaron lyngdoh ïa ka Hebron bad ïa ki rudnong jong ka, ka nongbah jaka rieh ïa u nongpynïap briew, bad ïa ka Libnah bad ki rudnong jong ka;

¹⁴ bad ka Jattir bad ki rudnong jong ka, bad ka Eshtemoa bad ki rudnong jong ka;

¹⁵ bad ka Holon bad ki rudnong jong ka, bad ka Debir bad ki rudnong jong ka;

¹⁶ bad ka Ain bad ki rudnong jong ka, bad ka Juttah bad ki rudnong jong ka, bad ka Beth-shemesh bad ki rudnong jong ka; khyndai tylli ki nongbah na kita ki ar jaid.

¹⁷ Bad na ka jaid u Benjamin, ïa ka Gibeon bad ki rudnong jong ka, ka Geba bad ki rudnong jong ka;

¹⁸ ka Anathoth bad ki rudnong jong ka, bad ka Almon bad ki rudnong jong ka; saw ki nongbah.

¹⁹ Baroh ki shnong ki khun u Aaron, ki lyngdoh, ki la long khatlai ki nongbah bad ki rudnong jong ki.

²⁰ Bad ki ïing ki khun u Kohath, ki Lebi keiñ kiba dang sah na ki khun u Kohath, ki la ïoh ki shnong ka bynta jong ki na ka jaid u Ephraim.

²¹ Bad ki la ai ha ki, ïa ka Shekhem bad la ki rudnong ha u lum Ephraim, ka shnong jaka rieh ïa u nongpynïap briew, bad ïa ka Geser bad la ki rudnong;

²² bad ka Kibsaim bad la ki rudnong, bad ka Beth-horon bad la ki rudnong; saw tylli ki nongbah.

²³ Bad na ka jaid u Dan, ïa ka Eltekeh bad la ki rudnong, ka Gibbethon bad la ki rudnong;

²⁴ ka Aijalon bad la ki rudnong, ka Gath-rimmon bad la ki rudnong; saw tylli ki nongbah.

²⁵ Bad na ki shiteng ka jaid u Manasseh, ïa ka Taanakh bad la ki rudnong, bad ka Gath-rimmon bad la ki rudnong; ar tylli ki nongbah.

²⁶ Baroh ki shnong kiba dei ïa ki ïing ki khun u Kohath kiba dang sah ki la long shiphew bad la ki rudnong.

²⁷ Bad ha ki khun u Gershon, na ki ïing u Lebi, na kata ka shiteng jaid u Manasseh ki la ai ïa ka Golan ha Bashan bad la ki rudnong, ka shnong jaka rieh ïa u nongpynïap briew; bad ka Beeshterah bad la ki rudnong; ar tylli ki nongbah.

²⁸ Bad na ka jaid u Issakhar, ïa ka Kishion bad la ki rudnong, ka Daberath bad la ki rudnong;

²⁹ ka Jarmuth bad la ki rudnong, ka En-gannim bad la ki rudnong; saw tylli ki nongbah.

³⁰ Bad na ka jaid u Asher, ïa ka Mishal bad la ki rudnong, ka Abdon bad la ki rudnong;

³¹ ka Helkath bad la ki rudnong, bad ka Rehob bad la ki rudnong; saw tylli ki nongbah.

³² Bad na ka jaid u Naphtali, ïa ka Kedesh ha Galilaïa bad la ki rudnong, ka shnong jaka rieh ïa u nongpynïap briew, bad ka Hammoth-dor bad la ki rudnong, bad ka Kartan bad la ki rudnong; lai tylli ki nongbah.

³³ Baroh ki shnong ki Gershon kat kum ki ïing jong ki, ki la long khatlai tylli ki nongbah bad la ki rudnong.

³⁴ Bad ha ki ïing ki khun u Merari, kiba sah na ki Lebi, na ka jaid u Sabulon, ïa ka Jokneam bad la ki rudnong, bad ka Kartah bad la ki rudnong,

³⁵ ka Dimnah bad la ki rudnong, ka Nahalal bad la ki rudnong, saw tylli ki nongbah.

³⁶ Bad na ka jaid u Reuben, ïa ka Beser bad la ki rudnong; bad ka Jahas bad la ki rudnong,

³⁷ ka Kedemoth bad la ki rudnong, bad ka Mephaath bad la ki rudnong; saw tylli ki nongbah.

³⁸ Bad na ka jaid u Gad, ïa ka Ramoth ha Gilead bad la ki rudnong, ka shnong jaka rieh ïa u nongpynïap briew, bad ka Mahanaim bad la ki rudnong;

³⁹ ka Heshbon bad la ki rudnong, ka Jaser bad la ki rudnong; baroh saw tylli ki nongbah.

⁴⁰ Kine ki shnong baroh kiba dei ïa ki khun u Merari kat kum ki ïing jong ki, kiba sah na ki ïing ki Lebi keiñ; ki la long da ka jingkhalai khat-ar tylli ki nongbah.

⁴¹ Ki shnong ki Lebi baroh hapdeng ka bynta ki khun Israel ki la long sawphew phra tylli ki nongbah bad la ki rudnong.

⁴² Kine ki shnong ki la long kawei pa kawei bad la ki rudnong baroh sawdong: kumta ka la long ha kine ki shnong baroh.

Ki khun Israel ki ïoh kynti ïa ka ri

⁴³ Kumta U Trai u la ai ha ki Israel ïa kata ka ri baroh ïa kaba u la smai ban ai ha ki kpa jong ki; bad ki la ïoh ïa ka, bad ki la shong ha ka.

⁴⁴ Bad U Trai u la ai ha ki ka jingshongthait baroh sawdong, kat kumba u la smai baroh ha ki kpa jong ki: bad ym shym don uwei u briew na ki nongshun jong ki baroh uba la ïeng ha khmat jong ki; U Trai u la ai noh ïa ki nongshun jong ki baroh ha ka kti jong ki.

⁴⁵ Kam shym duh ei ei na kiei kiei ki babha ïa kiba U Trai u la kren ha ka ïing Israel; ka la wan long baroh.