JOSHUA 20 - KA BAIBL

Kaba buh la ki jaka rieh

¹ Bad U Trai u la kren ha u Joshua, u da ong,

² “To kren ha ki khun Israel, da ong, ‘To buh ha phi ïa kita ki shnong jaka rieh, kiba nga la kren ha phi da ka kti u Moses:

³ ba u nongpynïap briew uba kum pynïap klep ïano ïano ruh u lah ban phet ïap hangta: bad kin long ka jaka rieh jong phi na u nongpynhiar kput ka snam.

⁴ Bad haba uta uba phet ïap ha kano kano na kita ki nongbah, un ïeng ha khmat ka khyrdop ka shnong, bad un ïathuh ïa la ka kam ha ki shkor ki tymmen basan jong kata ka shnong; te kin shim ïa u shapoh shnong ha ki, bad kin ai jaka ïa u, ba un ïoh shong hapdeng jong ki.

⁵ Bad lada u nongpynhiar kput ka snam un beh ïa u, te kin ym ai noh ïa uta u nongpynïap briew ha ka kti jong u; namar ba u la kum shoh ïap ïa la u paramarjan, bad um shym shun ruh ïa u mynshuwa.

⁶ Bad un shong ha kata ka shnong, ha ban da un ïeng ha khmat ka jingïaseng ban bishar, haduh ka jingïap u rangbah lyngdoh uba don ha kita ki sngi: hadien kata, uta u nongpynïap briew un leit phai noh, bad un wan sha la shnong, bad sha la ïing, sha kata ka shnong na kaba u la phet ïap.’ ”

⁷ Bad ki la buh ïa ka Kedesh ha Galilaïa ha u lum Naphtali, bad ïa ka Shekhem ha u lum Ephraim, bad ka Kiriath-arba (kata ka long “ka Hebron”) ha u lum Judah.

⁸ Bad sha shiliang ka Jordan shaphang mihngi ïa ka Jerikho, ki la buh ïa ka Beser ha ri khlaw ha ka ri madan na ka jaid u Reuben, bad ïa ka Ramoth ha Gilead na ka jaid u Gad, bad ïa ka Golan ha Bashan na ka jaid u Manasseh.

⁹ Kine ki la long kita ki nongbah ba la buh ïa ki khun Israel baroh, bad ïa u nongwei uba shong hapdeng jong ki, ba jar uba kum pynïap ïano ïano u lah ban phet hangta, bad ba un ym ïap da ka kti u nongpynhiar kput ka snam, haduh ba ban da un ïeng ha khmat ka jingïaseng.