JOSHUA 2 - KA BAIBL

Ki nongsyntiat ïa ka Jerikho

¹ Te u Joshua u khun u Nun u la phah ar ngut ki briew jar jar na Shittim ban syntiat, u da ong, “Khie leit jngoh ïa ka ri, bad ïa ka Jerikho.” Te ki la leit, bad ki la poi ruh ha ka ïing kawei ka nuti kaba kyrteng “ka Rahab,” bad ki la shong basa hangta.

² Te la ïathuh ha u syiem ka Jerikho, da kaba ong, “Ha khmih, la wan ki briew shane ha kane ka miet na ki khun Israel ban syntiat ïa ka ri.”

³ Bad u syiem ka Jerikho u la phah ha ka Rahab, u da ong, “To wallam noh ïa kita ki briew ba la wan ha pha, kiba la rung ha ïing jong pha: namar ki la wan ban syntiat ïa ka ri baroh.”

⁴ Hynrei, kata ka kynthei ka la shim ïa kita ki ar ngut ki briew bad ka la buhrieh ïa ki; ka la ong ruh, “La wan kita ki briew ha nga shisha, hynrei, ngam shym tip kiba na-ei:

⁵ ka la jia ruh hamar ka por ban khang ïa ka khyrdop, haba ka la dum, ba kita ki briew ki la leit noh: shano kita ki briew ki la leit, ngam tip shuh: beh kloi nadien jong ki; namar phin lap ïa ki.”

⁶ Hynrei ka, ka la lah lam ïa ki, shalor ïing, bad ka la buhrieh ïa ki da ki dieng 'saihon, ïa kiba ka la lah thad ter ter halor ïing.

⁷ Te kita ki briew ki la beh nadien jong ki ha lynti ka Jordan haduh ka jaka khriang: te ki tang shu lah mih kita kiba la beh nadien jong ki, la khang ïa ka khyrdop.

⁸ Bad haba kim pat thiah, ka la wan kiew sha ki, shalor ïing;

⁹ ka la ong ruh ha kita ki briew, “Nga tip ba U Trai u la ai ha phi ïa kane ka ri, bad ba ka jingsheptieng ïa phi ka la hap halor jong ngi, bad baroh ki trai-shnong kane ka ri kim don mynsiem shuh ïa phi.

¹⁰ Namar ngi la ïohsngew kumno U Trai u la pynrngad ïa ka um ka Duriaw Basaw ha shuwa jong phi, mynba phi la mih noh na Ijipt; bad kumno phi la leh ïa ar ngut ki syiem ki Amor, kiba ha shiliang ka Jordan, u Sihon bad u Og keiñ, ïa kiba phi la pynjot thiaw.

¹¹ Te katba ngi la ïohsngew ïa kata, ki dohnud jong ngi ki la um, lymne ha uno uno ruh ym sah mynsiem shuh ïa phi: naba U Trai U Blei jong phi u long U Blei ha bneng sha jrong, bad ha ka khyndew shapoh.

¹² Te namar kata, nga duwai ha phi, to smai ha nga da U Trai, namar ba nga la leh isynei ïa phi, ba phi ruh phin leh isynei ïa ka ïing u kpa jong nga, bad ba phin ai ka dak kaba shisha ha nga:

¹³ bad ba phin pynim ïa u kpa jong nga bad ïa ka kmie jong nga, bad ïa ki para jong nga kynthei bad shynrang, bad ïa baroh ba ki don, bad ba phin pyllait ïa ki mynsiem jong ngi na ka jingïap.”

¹⁴ Te kita ki briew ki la ïathuh ha ka, “Ka jingim jong ngi namar ka jong phi, lada phin ym pynpaw ïa kane ka kam jong ngi; kan long ruh, haba U Trai un ai ïa kane ka ri ha ngi, ba ngin leh isynei bad kaba shisha ïa phi.”

¹⁵ Ynda kumta, ka la pynhiar ïa ki da u tyllai na ka jingkhang ïit: namar ka ïing jong ka, ka la don ha ka kynroh shnong, bad ka la shong ïing halor kata ka kynroh.

¹⁶ Ka la ong ruh ha ki, “Khie leit sha u lum, ïoh ba ki nongbeh kin ïashem ïa phi; buhrieh ïa lade ruh hangta lai sngi, ha ban da wan noh kita ki nongbeh; te hadien kata, phin leit ha la ka lynti.”

¹⁷ Te kita ki briew ki la ong ha ka, “Ngin long kiba lait na kane ka jingsmai jong pha ïa kaba pha la pynsmai ïa ngi.

¹⁸ Ha khmih, ynda ngin wan sha kane ka ri, phan teh ïa une u 'sai saw na kata ka jingkhang ïit na kaba pha la pynhiar ïa ngi: ïalum ruh ïa la u kpa bad ïa la ka kmie, bad ïa la ki para, bad ïa baroh ba dei ïa u kpa jong pha, ha pha ha kane ka ïing.

¹⁹ Kan long ruh, ba jar uba mih na ki jingkhang ka ïing jong pha sha lynti shnong, ka snam jong u kan long halor ka khlieh jong u hi, bad ngi ngin long khlem jingrem: bad jar ba don lem bad pha ha ïing, ka snam jong u kan long halor ka khlieh jong ngi, lada yn buh ka kti ha u.

²⁰ Te lada phan pynpaw ïa kane ka kam jong ngi, ynda kumta, ngi la lait na ka jingsmai jong pha ïa kaba pha la pynsmai ïa ngi.”

²¹ Ka te ka la ong, “To kan long kumta katba kum ka ktien jong phi.” Ka la phah noh ïa ki, bad ki la leit noh. Bad ka la teh ïa uta u 'sai saw ha kata ka jingkhang ïit.

²² Te ki la leit, bad ki la ïapoi ha uta u lum, ki la sah ruh hangta lai sngi, ha ban da kita ki nongbeh ki la wan noh: bad kita ki nongbeh ki la wad ïa ki baroh shilynter ka lynti, hynrei, kim shym shem.

²³ Kumta, kita ar ngut ki briew ki la leit wan noh, bad ki la hiar na uta u lum, bad ki la leit sha shiliang ruh, bad ki la wan ha u Joshua u khun u Nun; bad ki la ïathuh ruh ha u ïa kiei kiei baroh ba la jia ha ki.

²⁴ Bad ki la ong ha u Joshua, “Da shisha U Trai u la ai ha ki kti jong ngi ïa kata ka ri baroh; namar ki trai-shnong baroh ruh ha kata ka ri kim don mynsiem shuh ïa ngi.”