JOSHUA 19 - KA BAIBL

Ka bynta u Simeon

¹ Bad ka jingkhalai ka ba-ar ka la hap ha u Simeon, ha ka jaid ki khun u Simeon keiñ kat kum ki ïing jong ki: bad ka bynta jong ki ka la long ha ka ri kynti ki khun u Judah.

² Bad ki la ïoh ban long ka ri kynti jong ki, ïa ka Beer-sheba, lane ka Sheba, bad ka Moladah;

³ bad ka Hasar-shual, bad ka Balah, bad ka Esem;

⁴ bad ka Eltolad, bad ka Bethul, bad ka Hormah;

⁵ bad ka Siklag, bad ka Beth-markaboth, bad ka Hasar-susah:

⁶ bad ka Beth-lebaoth, bad ka Sharuhen: khatlai ki nongbah bad ki nongrit jong ki de:

⁷ ka Ain, ka Rimmon, bad ka Ether, bad ka Ashan; saw tylli ki nongbah bad ki nongrit jong ki de:

⁸ bad ki nongrit baroh kiba la don sawdong ïa kine ki nongbah haduh Baalath-beer, ka Ramah kaba shathie. Kane ka ri kynti ka jaid ki khun u Simeon kat kum ki ïing jong ki.

⁹ Na ka bynta jong ki khun u Judah ka la long ka ri kynti ki khun u Simeon: namar ka bynta ki khun u Judah ka la bun eh ïa ki: namar kata, ki khun u Simeon ki la ïoh ïa la ka ri kynti ha ka ri kynti jong ki.

Ka bynta u Sabulon

¹⁰ Bad ka jingkhalai ka balai ka la hap ha ki khun u Sabulon kat kum ki ïing jong ki: bad ka pud ka ri kynti jong ki ka la kot haduh Sarid:

¹¹ bad ka pud jong ki ka la kiew sha sepngi, haduh Maralah, bad ka la poi haduh Dabbasheth; bad ka la poi haduh ka wah kaba ha pyrshah ka Jokneam;

¹² bad ka la phai na Sarid shaphang mihngi sha kaba mih ka sngi haduh ka pud ka Khisloth-tabor; bad hadien kata, ka la suh sha Daberath, bad ka la kiew sha Japhia;

¹³ bad nangta ka la pom shaphang mihngi sha Gath-hepher, sha Eth-kasin; bad ka la suh sha Rimmon kaba kot sha Neah;

¹⁴ bad ka pud ka la ïaid tawiar ïa ka shaphang shatei, sha Hannathon: bad ki bakut jong ka ki long ha ka them Iphtahel:

¹⁵ bad ka Kattath, bad ka Nahalal, bad ka Shimron, bad ka Idalah, bad ka Bethlehem: khat-ar ki nongbah bad ki nongrit jong ki de:

¹⁶ kane ka long ka bynta ki khun u Sabulon kat kum ki ïing jong ki, kine ki nongbah bad ki nongrit jong ki.

Ka bynta u Issakhar

¹⁷ Ka jingkhalai ka basaw ka la hap ha u Issakhar, ha ki khun u Issakhar kat kum ki ïing jong ki.

¹⁸ Bad ka pud jong ki ka la long haduh Jesril, bad ka Khesulloth, bad ka Shunem;

¹⁹ bad ka Hapharaim, bad ka Shion, bad ka Anaharath;

²⁰ bad ka Rabbith, bad ka Kishion, bad ka Ebes;

²¹ bad ka Remeth, bad ka En-gannim, bad ka En-haddah, bad ka Beth-passes;

²² bad ka pud ka la poi haduh Tabor, bad Shahasumah, bad Beth-shemesh; bad ki bakut ka pud jong ki, ki la long ha Jordan: khathynriew ki nongbah bad ki nongrit jong ki de.

²³ Kane ka long ka ri kynti ka jaid ki khun u Issakhar kat kum ki ïing jong ki, ki nongbah bad ki nongrit jong ki.

Ka bynta u Asher

²⁴ Bad ka jingkhalai ka basan ka la hap ha ka jaid ki khun u Asher kat kum ki ïing jong ki.

²⁵ Bad ka pud jong ki ka la long ka Helkath, bad ka Hali, bad ka Beten, bad ka Akhshaph;

²⁶ bad ka Allammelekh, bad ka Amad, bad ka Mishal; bad ka poi sha Karmel shaphang sepngi bad sha Shihor-libnath;

²⁷ bad ka la phai shaphang kaba mih ka sngi sha Beth-dagon, bad ka la poi haduh Sabulon, bad haduh ka them Iphtahel shaphang shatei ïa ka Beth-emek bad ka Neiel; bad ka la leit sha Kabul sha kadiang,

²⁸ bad ka Ebron, bad ka Rehob, bad ka Hammon, bad ka Kanah, haduh ka Sidon bah;

²⁹ bad kata ka pud ka la phai sha Ramah, bad sha ka shnong ba la ker kynroh ka Tyros; bad ka pud ka phai sha Hosah; bad ki bakut jong ka ki don harud ka duriaw hajan ka ri Akhsib:

³⁰ ka Ummah ruh, bad ka Aphek, bad ka Rehob: arphew ar ki nongbah bad ki nongrit jong ki de.

³¹ Kane ka ri kynti ka jaid ki khun u Asher kat kum ki ïing jong ki, kine ki nongbah bad ki nongrit jong ki.

Ka bynta u Naphtali

³² Bad ka jingkhalai ka bahynriew ka la hap ha ki khun u Naphtali, ha ki khun u Naphtali kat kum ki ïing jong ki.

³³ Bad ka pud jong ki ka la long na Heleph, na uta u dieng Sning ha Saanannim, bad ka Adami-nekeb, bad ka Jabnil, haduh Lakkum; bad ki bakut jong ki, ki la long ha Jordan:

³⁴ bad kata ka pud ka phai shaphang sepngi sha Asnoth-tabor, bad ka suh nangta sha Hukkok; bad ka la poi haduh Sabulon shaphang shathie, bad ka la poi haduh Asher shaphang sepngi, bad haduh Judah ha Jordan shaphang mihngi.

³⁵ Bad ki nongbah ba la ker kynroh ki la long ka Siddim, ka Ser, bad ka Hammath, ka Rakkath, bad ka Khinnereth;

³⁶ bad ka Adamah, bad ka Ramah, bad ka Hasor;

³⁷ bad ka Kedesh, bad ka Edrei, bad ka En-hasor;

³⁸ bad ka Iron, bad ka Migdal-el, ka Horem, bad ka Beth-anath, bad ka Beth-shemesh: khatkhyndai ki nongbah bad ki nongrit jong ki de.

³⁹ Kane ka ri kynti ka jaid ki khun u Naphtali kat kum ki ïing jong ki, ki nongbah bad ki nongrit jong ki.

Ka bynta u Dan

⁴⁰ Bad ka jingkhalai ka bahynñiew ka la hap ha ka jaid ki khun u Dan kat kum ki ïing jong ki.

⁴¹ Bad ka pud ka ri kynti jong ki ka la long ka Sorah, bad ka Eshtaol bad ka Ir-shemesh;

⁴² bad ka Shaalabbin, bad ka Aijalon, bad ka Ithlah;

⁴³ bad ka Elon, bad ka Timnah, bad ka Ekron;

⁴⁴ bad ka Eltekeh, bad ka Gibbethon, bad ka Baalath;

⁴⁵ bad ka Jehud, bad ka Bene-berak, bad ka Gath-rimmon;

⁴⁶ bad ka Me-jarkon, bad ka Rakkon, lem bad ka pud ha pyrshah Joppa.

⁴⁷ Bad ka pud ki khun u Dan ka la suh palat ïa ki: naba ki khun u Dan ki la kiew ban ïateh ïa ka Leshem, bad ki la jop ïa ka, bad ki la pom ïa ka da ka syrti waitlam, bad ki la ïoh ïa ka, bad ki la shong ha ka, bad ïa ka Leshem ki la kyrteng “Dan,” na ka kyrteng u Dan u kpa jong ki.

⁴⁸ Kane ka long ka ri kynti ka jaid ki khun u Dan kat kum ki ïing jong ki, kine ki nongbah bad ki nongrit jong ki.

Ka bynta u Joshua

⁴⁹ Ynda ki la wai ban sam ïa ka ri ban long ka ri kynti katba kum ki pud jong ki, ki khun Israel ki la ai ri kynti ha u Joshua u khun u Nun hapdeng jong ki:

⁵⁰ katba kum ka hukum U Trai ki la ai ha u ïa kata ka nongbah ba u la ïapan, ka Timnath-serah keiñ ha u lum Ephraim; bad u la tei ïa kata ka nongbah, bad u la shong ha ka.

⁵¹ Kine ki jingïoh kynti, kiba u Eleasar lyngdoh, bad u Joshua u khun u Nun bad ki rangbah ki kpa ki jaid ki khun Israel, ki la ïasam ban long ri kynti da ka jingkhalai ha Sheiloh ha khmat U Trai, ha ka jingkhang Ka Tabernakl ka jingïaseng. Kumta, ki la dep kaba ïasam ïa ka ri.