JOSHUA 18 - KA BAIBL

Kaba ïasam bynta ïa ka ri ha Sheiloh

¹ Bad u paidbah ki khun Israel baroh ki la ïalum lang ha Sheiloh, bad ki la pynïeng ïa Ka Tabernakl ka jingïaseng hangta: bad la lah jop ïa ka ri ha shuwa jong ki.

² Bad la dang sah hynñiew jaid hapdeng ki khun Israel, ki bym pat ïoh ïa la ka ri kynti.

³ Te u Joshua u la ong ha ki khun Israel, “Haduh katno phin pynslem ban leit ïoh ïa kata ka ri, ïa kaba U Trai, U Blei ki kpa jong phi, u la ai ha phi?

⁴ To sei napdeng jong phi lai ngut ki briew na kawei kawei ka jaid: bad ngan phah ïa ki, bad kin mih, bad kin ïaid ïa kata ka ri, kin jurib ïa ka kat kum ka ri kynti jong ki; bad kin wan pat sha nga.

⁵ Bad kin ïasam hynñiew bynta ïa ka: u Judah un sah ha la ka pud shaphang shathie, bad ka ïing u Joseph kan sah ha la ka pud shaphang shatei.

⁶ Bad phin jurib ïa kata ka ri hynñiew bynta, bad phin wallam shane ha nga: bad ngan pynkhalai na ka bynta jong phi hangne ha khmat U Trai uba U Blei jong ngi.

⁷ Naba ki Lebi kim don bynta hapdeng jong phi; namar ka jinglong lyngdoh U Trai ka long ka jingïoh kynti jong ki: bad u Gad bad u Reuben bad shiteng ka jaid u Manasseh ki la ïoh ïa la ka ri kynti sha shiliang ka Jordan shaphang mihngi, ïa kaba u Moses u shakri U Trai u la ai ha ki.”

⁸ Bad kita ki briew ki la ïaïeng, bad ki la ïaleit: bad u Joshua u la hukum ïa kita kiba leit jurib ïa ka ri, u da ong, “Khie leit ïaid ïa ka ri baroh, bad jurib ïa ka, bad wan pat sha nga, bad ngan pynkhalai na ka bynta jong phi hangne ha khmat U Trai ha Sheiloh.”

⁹ Te kita ki briew ki la leit bad ki la ïaid ïa kata ka ri, bad ki la jurib ïa ka katba kum ki shnong, hynñiew bynta ha ka kot, bad ki la wan pat ha u Joshua ha ka dara ha Sheiloh.

¹⁰ Bad u Joshua u la pynkhalai na ka bynta jong ki ha Sheiloh ha khmat U Trai: bad u la ïasam ïa ka ri ha ki khun Israel katba kum ki bynta jong ki.

Ka bynta u Benjamin

¹¹ Bad ka bynta ka jaid ki khun u Benjamin ka la hap kat kum ki ïing jong ki bad ka pud ka bynta jong ki ka la hap hapdeng ki khun u Judah bad ki khun u Joseph.

¹² Bad ka pud jong ki shaphang shatei ka la long na ka Jordan; bad ka pud ka la kiew harud Jerikho shaphang shatei, bad ka la kiew sha ka ri lum shaphang sepngi; bad ki bakut jong ka ki la long ha ka ri khlaw Beth-aben.

¹³ Bad ka pud ka la pom nangta sha Lus, harud Lus keiñ (kata ka long “ka Bethel”), shaphang shathie; bad ka pud ka la hiar sha Ataroth-addar, hajan uta u lum uba shaphang shathie jong ka Beth-horon kaba harum.

¹⁴ Bad ka pud ka la suh nangta bad ka la ïaid tawiar na ka phang sepngi shathie, na uta u lum uba ha pyrshah Beth-horon shaphang shathie; bad ki bakut jong ka ki la long ha Kiriath-baal (kata ka long “ka Kiriath-jearim”), ka nongbah ki khun u Judah: kane ka long ka pud shaphang sepngi.

¹⁵ Bad kata ka phang shathie ka la long na ka bakut ka Kiriath-jearim, bad ka pud ka la leit mih shaphang sepngi, bad ka la mih ha ka pukri ki um Nephtoah:

¹⁶ bad ka pud ka la hiar sha ka bakut uta u lum uba ha pyrshah ka them u khun u Hinnom, kaba ha ka them ki Rephaim shaphang shatei; bad ka la hiar sha ka them u Hinnom, markhap ki Jebus shaphang shathie, bad ka la hiar sha En-rogel;

¹⁷ bad ka la suh na shaphang shatei, bad ka la leit sha En-shemesh, bad ka la leit poi sha Geliloth, kaba ha marpyrshah ka thiep Adummim; bad ka la hiar ha u maw u Bohan u khun u Reuben;

¹⁸ bad ka la pom sha ka phang ha pyrshah ka Arabah shaphang shatei; bad ka la hiar haduh Arabah:

¹⁹ bad ka pud ka la pom harud ka Beth-hoglah shaphang shatei: bad ki bakut jong ka pud ki la don ha ka khmut kaba shaphang shatei ka Duriaw Mluh, ha ka bakut ka Jordan shaphang shathie: kane ka pud shaphang shathie.

²⁰ Bad ka Jordan ka la long ka pud jong ka shaphang mihngi. Kane ka ri kynti ki khun u Benjamin, da ki pud jong ka sawdong, katba kum ki ïing jong ki.

²¹ Te ki nongbah ka jaid ki khun u Benjamin kat kum ki ïing jong ki, ki la long ka Jerikho, bad ka Beth-hoglah, bad ka Emek-kesis;

²² bad ka Beth-arabah, bad ka Semaraim, bad ka Bethel;

²³ bad ka Abbim, bad ka Parah, bad ka Ophrah;

²⁴ bad ka Khephar-ammoni, bad ka Ophni, bad ka Geba; khat-ar ki nongbah bad ki nongrit jong ki de:

²⁵ ka Gibeon, bad ka Ramah, bad ka Beeroth;

²⁶ bad ka Mispeh, bad ka Khephirah, bad ka Mosah;

²⁷ bad ka Rekem, bad ka Irpil, bad ka Taralah;

²⁸ bad ka Selah, ka Eleph, bad ka Jebus (kata ka long “ka Jerusalem”), ka Gibeah, bad ka Kiriath; khatsaw ki nongbah bad ki nongrit jong ki de. Kane ka long ka ri kynti ki khun u Benjamin kat kum ki ïing jong ki.