JOSHUA 17 - KA BAIBL

¹ Te kane ka la long ka bynta ïa ka jaid u Manasseh; namar u la long u khun nyngkong u Joseph. Te u Makhir, u khun nyngkong u Manasseh u kpa u Gilead, namar ba u la long u riewïapom, u la ïoh ïa ka Gilead bad ïa ka Bashan.

² Bad kata ka bynta ka la long ïa kiba dang sah na ki khun u Manasseh, kat kum ki ïing jong ki; ïa ki khun u Abieser, bad ïa ki khun u Helek, bad ïa ki khun u Asriel, bad ïa ki khun u Shekhem, bad ïa ki khun u Hepher, bad ïa ki khun u Shemida; kine ki la long ki khun shynrang u Manasseh u khun u Joseph katba kum ki ïing jong ki.

³ Hynrei, u Selophehad, u khun u Hepher, u khun u Gilead, u khun u Makhir, u khun u Manasseh, um don khun shynrang, tang ki khun kynthei: bad kine ki kyrteng ki khun kynthei jong u, “ka Mahlah”, bad “ka Noah”, “ka Hoglah”, “ka Milkah”, bad “ka Tirsah”.

⁴ Bad ki la wan hajan ha khmat u Eleasar lyngdoh, bad ha khmat u Joshua, u khun u Nun, bad ha khmat kita ki rangbah, ki ïa-ong, “U Trai u la hukum ïa u Moses ban ai ïa ngi ka ri kynti hapdeng ki para jong ngi:” namar kata, katba kum ka hukum U Trai u la ai ïa ki ka ri kynti hapdeng ki para u kpa jong ki.

⁵ Bad ka la hap ha u Manasseh shiphew bynta, nalor ka ri Gilead bad ka Bashan, kiba sha shiliang ka Jordan;

⁶ namar ki khun kynthei u Manasseh ki la ïoh ri kynti hapdeng ki khun shynrang jong u: bad kita kiwei ki khun shynrang u Manasseh ki la ïoh ïa ka ri Gilead.

⁷ Bad ka pud u Manasseh ka la long na Asher sha Mikhmethah, kaba marpyrshah ïa ka Shekhem; bad ka pud ka la leit shaphang kamon shaduh ki nong En-tappuah.

⁸ U Manasseh u la ïoh ïa ka ri Tappuah: hynrei, ka Tappuah hi ha ka pud u Manasseh ka la dei ïa ki khun u Ephraim.

⁹ Bad ka pud ka la hiar sha ka wah Kanah, shaphang shathie jong kata ka wah; kine ki nongbah ki la dei ki jong u Ephraim hapdeng ki nongbah u Manasseh: bad ka pud u Manasseh ruh ka la long shaphang shatei jong kata ka wah, bad ki bakut jong ka ki la long ha ka duriaw:

¹⁰ shaphang shathie ka la dei ka jong u Ephraim, bad shaphang shatei ka la dei ka jong u Manasseh, bad ka duriaw ka la long ka pud jong u; bad ki la ïakynduh ha ka jong u Asher shaphang shatei, bad ha ka jong u Issakhar shaphang mihngi.

¹¹ Bad u Manasseh u la don ha ka jong u Issakhar bad ha ka jong u Asher, ka Beth-shean bad ki shnong jong ka, ka Ibleam bad ki shnong jong ka, bad kiba shong ha Dor bad ki shnong jong ka, bad kiba shong ha Endor bad ki shnong jong ka, bad kiba shong ha Taanakh bad ki shnong jong ka, bad kiba shong ha Megiddo bad ki shnong jong ka, lai tylli ki jaka keiñ.

¹² Hynrei, ki khun u Manasseh kim lah ban beh noh ïa kita kiba shong ha kita ki shnong; hynrei, ki Kanaan ki shu shong bor ha kata ka ri.

¹³ Pynban, ynda ki khun Israel ki la nang khraw bor, ki la pynsiew khajna ïa ki Kanaan, hynrei, kim shym beh lut phar ïa ki.

¹⁴ Bad ki khun u Joseph ki la ïakren ha u Joshua, ki ïa-ong, “Balei me la ai ha nga tang kawei ka jingkhalai bad kawei ka bynta ban long ri kynti, haba nga long uba bun briew ruh, namar U Trai u la kyrkhu ïa nga haduh mynta?”

¹⁵ Te u Joshua u la ïathuh ha ki, “Lada me long uba bun briew, to leit kiew sha kata ka ri khlaw, bad shyrti ïa me hangta ha ka ri ki Peris bad ki Rephaim; haba u lum Ephraim u khim eh ïa me.”

¹⁶ Te ki khun u Joseph ki la ong, “Ka ri lum kam biang ïa ngi: bad ki Kanaan baroh kiba shong ha ka ri them ki don ki kali nar, kita kiba don ha Beth-shean bad ki shnong jong ka, bad kiba ha ka them Jesril ruh.”

¹⁷ Te u Joshua u la kren ha ka ïing u Joseph, ha u Ephraim bad u Manasseh, u da ong, “Me long uba bun briew, bad me don ka bor bakhraw ruh: men ym ïoh tang kawei ka bynta:

¹⁸ hynrei, kata ka lum kan long ka jong me; namar la ka long khlaw, men shyrti ïa ka, bad ki pud jong ka kin long ki jong me: namar men beh noh ïa ki Kanaan, la ki don ki kali nar, bad la ki long ki bakhrawbor ruh.”