JOSHUA 14 - KA BAIBL

Kaba ïasam ïa ka ri Kanaan da ka jingïakhalai ka jingïoh kynti

¹ Te kine ki long kita ki ri kynti kiba ki khun Israel ki la ïoh ha ri Kanaan, ïa kiba u Eleasar lyngdoh, bad u Joshua u khun u Nun, bad ki rangbah ki ïing ki kpa na ki jaid ki khun Israel, ki la ïasam ha ki,

² da ka jingkhalai ka jingïoh kynti jong ki, kumba U Trai u la hukum da ka kti u Moses, ha kita ki khyndai jaid, bad ha kata ka shiteng jaid.

³ Naba u Moses u la lah ai ka ri kynti jong kita ki ar jaid shiteng ha kata kawei ka liang ka Jordan: hynrei, ha ki Lebi um shym ai ri kynti hapdeng jong ki.

⁴ Naba ki khun u Joseph ki la long ar jaid, u Manasseh bad u Ephraim: namar kata, kim shym ai bynta ha ki Lebi ha kata ka ri, tang ki nongbah ban shong, bad ki rudnong jong ki na ka bynta ki jingri jong ki bad na ka bynta ka kamai jong ki.

⁵ Kumba U Trai u la hukum ïa u Moses, kumta ki khun Israel ki la leh, bad ki la ïabynta ïa ka ri.

La ai ïa ka Hebron ha u Kaleb

⁶ Ynda kumta, ki khun u Judah ki la wan ha u Joshua ha Gilgal: bad u Kaleb u khun u Jephunneh u nong Kenis u la ong ha u, “Me tip ïa kaba la ong U Trai ha u Moses u briew jong U Blei shaphang jong nga bad shaphang jong me ha Kadesh-barnea.

⁷ Nga la sawphew snem ka rta mynba u Moses u shakri U Trai u la phah ïa nga na Kadesh-barnea ban khmih syntiat ïa ka ri; bad nga la wallam ktien pat ha u kumba ka la don ha ka dohnud jong nga.

⁸ Pynban, ki paralok jong nga kiba la leit ryngkat bad nga, ki la pynum ïa ka dohnud u paidbah: hynrei, nga la bud naduh haduh ïa U Trai U Blei jong nga.

⁹ Te u Moses u la smai ha kata ka sngi, u da ong, ‘Da shisha kata ka khyndew halor kaba ki sla'jat jong me ki la ïuh, kan long ka ri kynti jong me bad ki khun jong me junom, naba me la bud naduh haduh ïa U Trai uba U Blei jong nga.’

¹⁰ Mynta te, ha khmih, U Trai u la ri im ïa nga, kumba u la ong, kine sawphew san snem, naduh ba U Trai u la kren ïa kane ka ktien ha u Moses keiñ, mynba ki Israel ki la ïaid ha ka ri khlaw: mynta te, ha khmih, nga long phraphew san snem, ha kane ka sngi.

¹¹ Toi ha kane ka sngi, nga dang khlaiñ kumjuh kumba ha kata ka sngi ba u Moses u la phah ïa nga: kumba ka bor jong nga ka la long mynkata, kumta ka bor jong nga ka long mynta ruh, ban ïapom, ban mih shabar bad ban wan shapoh.

¹² Mynta namar kata, to ai ha nga ïa une u lum, shaphang uba u la kren U Trai, myn ha kata ka sngi; namar me la ïohsngew ha kata ka sngi kumno ba ki Anak ki la don hangta, bad ba ki nongbah kiba khraw bad ba la ker kynroh: toi U Trai un don ryngkat bad nga, ba ngan beh noh ïa ki, kumba U Trai u la ong.”

¹³ Te u Joshua u la kyrkhu ïa u; bad u la ai ïa ka Hebron ha u Kaleb u khun u Jephunneh ban long ka ri kynti.

¹⁴ Namar kata, ka Hebron ka la long ka ri kynti u Kaleb u khun u Jephunneh u nong Kenis, haduh kane ka sngi; namar ba u la bud naduh haduh ïa U Trai, U Blei ki Israel.

¹⁵ Bad ka kyrteng ka Hebron mynshuwa ka la long “ka Kiriath-arba;” uta u Arba u la long u briew u bakhraw tam hapdeng ki Anak. Bad ka ri ka la ïoh ka jingshongthait na ka thma.