JOSHUA 13 - KA BAIBL

Ki pud ka ri ki bym pat jop

¹ Te u Joshua u la tymmen bad u la hiar arsut ka rta; bad U Trai u la ong ha u, “Me la tymmen bad me la hiar arsut ka rta, hynrei, dang sah bun ka khyndew kaba dei ban ïoh.

² Kane ka long ka khyndew kaba dang sah: ki phang ki Philistia baroh, bad ki Geshur baroh;

³ na Shihor, kaba ha shuwa ka Ijipt, haduh ka pud ka Ekron shaphang shatei, ïa kata, la ñiew ka jong ki Kanaan: san ngut ki doloi ki Philistia; ki Gasa, ki Ashdod, ki Ashkelon, ki Gath, bad ki Ekron; ki Abbim ruh, shaphang shathie:

⁴ ka ri ki Kanaan baroh, bad ka Mearah ka jong ki Sidon, haduh Aphek, haduh ki pud ki Amor:

⁵ bad ka ri ki Gebal, bad u Lebanon baroh, shaphang kaba mih ka sngi, haduh Baal-gad harum u lum Hermon haduh kaba leit rung sha Hamath:

⁶ kiba shong ha ri lum baroh naduh Lebanon haduh Misrephoth-maim, ki Sidon baroh keiñ: ïa kita, ngan beh na khmat ki khun Israel: tang ba men ïasam ïa ka da ka jingkhalai ha ki Israel ban long ka ri kynti, kumba nga la hukum ïa me.

⁷ Namar kata te, to ïasam ïa kane ka ri ban long ka ri kynti ha ki khyndai jaid, bad ha shiteng ka jaid u Manasseh.”

Ki pud ka bynta u Manasseh, u Reuben bad u Gad

⁸ Lem bad u, ki Reuben bad ki Gad ki la ïoh ïa la ka ri kynti, kaba u Moses u la ai ha ki, sha shiliang ka Jordan shaphang mihngi, kumba u Moses u shakri U Trai u la ai ha ki;

⁹ naduh Aroer, kaba long ha ka rud ka them Arnon, bad kata ka shnong kaba hapdeng kata ka them, bad ka madan Medeba baroh haduh Dibon;

¹⁰ bad baroh ki shnong u Sihon u syiem ki Amor, uba ju synshar ha Heshbon, haduh ka pud ki khun u Ammon;

¹¹ bad ka Gilead, bad ka pud ki Geshur bad ki Maakath, bad u lum Hermon baroh, bad ka Bashan baroh haduh Salekah;

¹² ka hima u Og baroh ha Bashan, uba ju synshar ha Ashtaroth bad ha Edrei, (uba sah na ki riewradbah); namar ïa kine u Moses u la pom, bad u la beh noh ïa ki.

¹³ Pynban, ki khun Israel kim shym beh ïa ki Geshur, lymne ki Maakath; hynrei, ki Geshur bad ki Maakath ki la shong hapdeng ki Israel, haduh kane ka sngi.

¹⁴ Tang ïa ka jaid u Lebi um shym ai ri kynti; ki jingkñia U Trai, U Blei ki Israel, ba la pynlong da ka ding, ki long ka jingïoh kynti jong ki, kumba u la ong ha ki.

¹⁵ Bad u Moses u la ai ha ka jaid ki khun u Reuben katba kum ki ïing jong ki.

¹⁶ Bad ka pud jong ki ka la long na Aroer, kaba don ha ka rud ka them Arnon, bad kata ka shnong kaba hapdeng kata ka them; bad ka ri madan baroh hajan Medeba;

¹⁷ ka Heshbon, bad ki shnong jong ka baroh kiba ha ka madan; ka Dibon, bad ka Bamoth-Baal, bad ka Beth-baal-meon;

¹⁸ bad ka Jahas, bad ka Kedemoth, bad ka Mephaath;

¹⁹ bad ka Kiriathaim, bad ka Sibmah, bad ka Sereth-shahar ha u lum ka them;

²⁰ bad ka Beth-peor, bad ki ranab Piskah, bad ka Beth-jeshimoth;

²¹ bad ki shnong ka ri madan baroh, bad baroh ka hima u Sihon u syiem ki Amor, uba ju synshar ha Heshbon, ïa uba u Moses u la jop lem bad ki rangbah Midian, u Ebi, bad u Rekem, bad u Sur, bad u Hur, bad u Reba, ki rangbah u Sihon, kiba shong ha kata ka ri.

²² Ïa u Balaam ruh u khun u Beor, u nongkren byrtong, ki khun Israel ki la pynïap da ka waitlam hapdeng kita kiba ki la pynïap.

²³ Bad ka pud ki khun u Reuben ka la long ka Jordan, bad ka rud jong ka. Kane ka la long ka ri kynti ki khun u Reuben katba kum ki ïing jong ki, ki nongbah bad ki nongrit jong ki.

²⁴ Bad u Moses u la ai ha ka jaid u Gad, ha ki khun u Gad keiñ, katba kum ki ïing jong ki.

²⁵ Bad ka pud jong ki ka la long ka Jaser, bad ki shnong ka Gilead baroh, bad shiteng ka ri ki khun u Ammon, haduh Aroer kaba ha shuwa Rabbah;

²⁶ bad naduh Heshbon haduh Ramath-mispeh, bad Betonim; bad naduh Mahanaim haduh ka pud ka Debir;

²⁷ bad ha ka ri them, ka Beth-haram, bad ka Beth-nimrah, bad ka Sukkoth, bad ka Saphon, kaba sah na ka hima u Sihon u syiem ka Heshbon, ka Jordan bad ka rud jong ka, haduh ka rud ka duriaw Khinneroth sha shiliang ka Jordan shaphang mihngi.

²⁸ Kane ka long ka ri kynti ki khun u Gad kat kum ki ïing jong ki, ki nongbah bad ki nongrit jong ki.

²⁹ Bad u Moses u la ai ha ki shiteng ka jaid u Manasseh: bad ka la long ïa ki shiteng jaid ki khun u Manasseh kat kum ki ïing jong ki.

³⁰ Bad ka pud jong ki ka la long na Mahanaim, ka Bashan baroh, ka hima u Og u syiem ka Bashan baroh, bad baroh ki shnong u Jair, kiba ha Bashan, hynriewphew shnong:

³¹ bad shiteng ka Gilead, bad ka Ashtaroth, bad ka Edrei, ki shnong ka hima u Og ha Bashan, ki la dei ïa ki khun u Makhir u khun u Manasseh, ha ki shiteng ki khun u Makhir keiñ kat kum ki ïing jong ki.

³² Kine ki long kita ki ri kynti kiba u Moses u la ïasam ha ki madan Moab, sha shiliang ka Jordan hajan Jerikho, shaphang mihngi.

³³ Hynrei, ha ka jaid u Lebi, u Moses um shym ai ri kynti: U Trai, U Blei ki Israel, u long ka jingïoh kynti jong ki, kumba u la ong ha ki.