JOSHUA 11 - KA BAIBL

Kaba jop ïa kiba bun ki syiem

¹ Te haba u Jabin u syiem ka Hasor u la ïohsngew ïa kane, u la phah ha u Jobab u syiem ka Madon, bad ha u syiem ka Shimron, bad ha u syiem ka Akhshaph,

² bad ha ki syiem kiba shaphang shatei, ha ri lum bad ha ri madan shaphang shathie na Khinneroth, bad ha ka ri them, bad ha ri lum Dor shaphang sepngi,

³ ha ki Kanaan shaphang mihngi bad shaphang sepngi, bad ha ki Amor, bad ki Hit, bad ki Peris, bad ki Jebus ha ri lum, bad ha ki Hib harum Hermon ha ri Mispah.

⁴ Te ki la mih noh, ma ki bad baroh ki paidïapom jong ki ryngkat bad ki, shibun ki briew, kat u shyiap uba harud duriaw ha ka jingbun lem bad ki kulai bad ki kali shibun eh.

⁵ Bad haba kine ki syiem baroh ki la ïashem lang, ki la wan shong dara lang ha ki um Merom, ban ïaleh ïa ki Israel.

⁶ Te U Trai u la ong ha u Joshua, “Wat sheptieng namar jong ki: namar lashai hamar kane ka por ngan aiti noh ïa ki baroh ba la pynïap ha khmat ki Israel: men thait ïa ki thied khohwah ki kulai jong ki, bad men thang ïa ki kali jong ki da ka ding.”

⁷ Kumta, u Joshua bad ki paidïapom baroh ryngkat bad u, ki la wan buk ha ki ha ki um Merom, bad ki la kynrup ïa ki.

⁸ Bad U Trai u la ai noh ïa ki ha ka kti ki Israel, ki te ki la pom ïa ki, bad ki la beh ïa ki haduh ka Sidon bah, bad haduh Misrephoth-maim, bad haduh ka them Mispeh shaphang mihngi; bad ki la pom ïa ki, haduh ba kim shym pynsah shuh uwei ruh.

⁹ Bad u Joshua u la leh ha ki kat kumba U Trai u la hukum ïa u: u la thait ïa ki thied ki khohwah ki kulai jong ki, bad u la thang ïa ki kali jong ki da ka ding.

¹⁰ Bad u Joshua u la phai noh ha kata por, bad u la jop ïa ka Hasor, bad u la pom ïa u syiem jong ka da ka waitlam: namar ka Hasor mynshuwa ka la long ha khlieh kita ki hima baroh.

¹¹ Bad ki la pom ïa ki mynsiem baroh kiba ha ka da ka syrti waitlam, ki da pynduh khoit ïa ki: ym shym pynsah shuh kawei ka mynsiem: bad u la thang ïa ka Hasor da ka ding.

¹² Ïa ki shnong jong kita ki syiem baroh, bad ïa ki syiem jong ki baroh ruh, u Joshua u la jop, bad u la pom ïa ki da ka syrti waitlam, bad u la pynduh khoit ïa ki; kumba u Moses u shakri U Trai u la hukum.

¹³ Hynrei, ïa kita ki shnong kiba don ha la ki lum, ki Israel kim shym thang, tang ïa ka Hasor hi; ïa kata u Joshua u la thang.

¹⁴ Te ïa ka jinglute baroh jong kine ki shnong, bad ïa ki jingri, ki khun Israel ki la shim ban long ka jinglute ïa lade; hynrei, ïa u briew baroh ki la pom da ka syrti waitlam, haduh ba ki la pynduh noh khoit ïa ki, kim shym pynsah shuh kawei ka mynsiem.

¹⁵ Kumba U Trai u la hukum ïa u Moses u shakri jong u, kumta u Moses u la hukum ïa u Joshua; kumta ruh u Joshua u la leh; um shym iehnoh ei ei khlem da leh na kita baroh ba U Trai u la hukum ïa u Moses.

U Joshua u jop ïa ka ri baroh kawei

¹⁶ Kumta, u Joshua u la shim ïa kata ka ri baroh, ïa ka ri lum, bad ka ri shaphang shathie, bad ïa ka ri Goshen baroh, bad ïa ka ri them, bad ïa ka ri madan, bad ïa ka ri lum Israel, bad ïa ka ri them jong u de;

¹⁷ naduh u lum Halak keiñ, uba leit suh sha Seir, haduh Baal-gad ha ka them Lebanon harum u lum Hermon: bad ïa ki syiem jong ki baroh u la kem, bad u la pom ïa ki, bad u la pynïap ïa ki.

¹⁸ U Joshua u la ïaleh thma slem bad kita ki syiem baroh.

¹⁹ Ym shym don kawei ka shnong ba la ïasuk bad ki khun Israel, tang ki Hib ki nong Gibeon: ki la jop ïa ki baroh ha ka thma.

²⁰ Namar ka la long na U Trai ban pyneh ïa ki dohnud jong ki, ba kin wan ïaleh ïa ki Israel ha ka thma, ba un ïoh pynduh ïa ki khoit, ba kin ym ïoh ka jingisynei, hynrei, ba un pynduh ïa ki, kumba U Trai u la hukum ïa u Moses.

²¹ Ha kata ka por ruh u Joshua u la wan, bad u la pynduh ïa ki Anak na ka ri lum, na Hebron, na Debir, na Anab, bad na ka ri lum Judah baroh, bad na ka ri lum Israel baroh: u Joshua u la pynduh khoit ïa ki bad ïa ki shnong jong ki.

²² Ym shym pynsah shuh uwei ruh na ki Anak ha ka ri ki khun Israel: tang ha Gasa, ha Gath, bad ha Ashdod, ki dang sah.

²³ Kumta, u Joshua u la shim ïa kata ka ri baroh, kat kumba U Trai u la ong ha u Moses baroh; bad u Joshua u la ai kynti ïa ka ha ki Israel katba kum ki bynta jong ki ha la ki jaid ki jaid. Bad ka ri ka la shongthait na ka thma.