JOSHUA 10 - KA BAIBL

Ka jingshahjop ki Amor

¹ Te haba u Adonisedek u syiem ka Jerusalem u la ïohsngew kumno u Joshua u la jop ïa ka Ai, bad ba u la pynduh khoit ïa ka; kumba u la leh ïa ka Jerikho bad ïa u syiem jong ka, kumta, u la leh ïa ka Ai bad ïa u syiem jong ka; bad kumno ki nong Gibeon ki la ïasuk bad ki Israel, bad ki la don hapdeng jong ki ruh;

² kumta, ki la sheptieng shibun eh, namar ka Gibeon ka la long ka nongbah ka bakhraw, kum kawei na ki nongbah shong syiem, bad namar ka la long kham khraw ban ïa ka Ai, bad ki rangbah jong ka baroh ruh kiba khlaiñ.

³ Namar kata, u Adonisedek u syiem ka Jerusalem u la phah ha u Hoham u syiem ka Hebron, bad ha u Piram u syiem ka Jarmuth, bad ha u Japhia u syiem ka Lakhish, bad ha u Debir u syiem ka Eglon, u da ong,

⁴ “To wan kiew sha nga, to ïarap ïa nga ruh, ba ngin ïoh jop ïa ka Gibeon: namar ba ka la ïasuk bad u Joshua bad ki khun Israel.”

⁵ Namar kata, kita ki san ngut ki syiem ki Amor, u syiem ka Jerusalem, u syiem ka Hebron, u syiem ka Jarmuth, u syiem ka Lakhish, u syiem ka Eglon, ki la ïalum lang, bad ki la leit kiew, ma ki bad ki paidïapom jong ki baroh, bad ki la shong dara ha khmat ka Gibeon, bad ki la ïaleh ïa ka.

⁶ Te ki nong Gibeon ki la phah ha u Joshua sha ka dara ha Gilgal, ki da ong, “Wat kynran ïa la ka kti na ki shakri jong me; wan kiew kloi sha ngi, to pynim ïa ngi ruh, bad to ïarap ïa ngi: namar ki syiem ki Amor baroh kiba shong ha ri lum ki la ïalum lang pyrshah ïa ngi.”

⁷ Kumta, u Joshua u la kiew na Gilgal, ma u bad ki paidïapom baroh ryngkat bad u, bad baroh ki briew ki bashait bashlur.

⁸ Bad U Trai u la ong ha u Joshua, “Wat sheptieng ïa ki: namar nga la ai noh ïa ki ha ka kti jong me; ym don uwei na ki u ban ïeng ha khmat jong me.”

⁹ Namar kata, u Joshua u la wan buk ha ki; namar u la kiew artet na Gilgal baroh shi miet.

¹⁰ Bad U Trai u la pynjot ïa ki ha khmat ki Israel, bad u la pynïap ïa ki da ka jingpynïap bakhraw ha Gibeon, u la beh ïa ki ruh ha ka lynti ka thiep Beth-horon, bad u la pynïap ïa ki haduh Asekah, bad haduh Makkedah.

¹¹ Ka la jia ruh, katba ki la phet ïap na khmat ki Israel, haba ki la don ha ka jur Beth-horon, ba U Trai u la pynhap ki maw bakhraw halor jong ki na bneng haduh Asekah, bad ki la ïap: ki la long ruh kham bun kiba la ïap da u phria ban ïa kita ba ki khun Israel ki la pynïap da ka waitlam.

¹² Ynda kumta, u Joshua u la kren ha U Trai ha kata ka sngi ba U Trai u la aiti noh ïa ki Amor ha khmat ki khun Israel, bad u la ong ha khmat ki Israel, “Ko sngi, to phan ïeng thik ha Gibeon, ma me ruh, ko bnai, ha ka them Aijalon.”

¹³ Te ka sngi ka la ïeng thik, u bnai ruh u la sangeh, ha ban da u paidbah u la pynhiar kput halor ki nongshun. Ym shym la thoh ïa kane ha Ka Kitab u Jashar? Kumta, ka sngi ka la ïeng thik hapdeng ka bneng, bad kam shym la kyrkieh ban sep kumba shi sngi biang.

¹⁴ Bad ym shym don ka sngi kum kata mynshuwa jong ka lane hadien jong ka, ba U Trai u la sngap ïa ka ktien kyrpad u briew: naba U Trai u la ïaleh na ka bynta ki Israel.

¹⁵ Bad u Joshua u la leit phai, ma u bad ki Israel baroh ryngkat bad u, sha ka dara ha Gilgal.

¹⁶ Hynrei, kita ki san ngut ki syiem ki la phet ïap, bad ki la ïarieh ha ka krem ha Makkedah.

¹⁷ Te la ïathuh ha u Joshua, da kaba ong, “La shem ïa kita ki san ngut ki syiem, ba ki la ïarieh ha ka krem ha Makkedah.”

¹⁸ Bad u Joshua u la ong, “Pyntyllun ki maw bakhraw ha khmat kata ka krem, buh briew ruh hajan jong ka ban ap ïa ki:

¹⁹ ma phi te wat sangeh; beh ïa la ki nongshun, pynïap ruh ïa ki bakhatduh na ki; wat shah ba kin rung ha ki shnong jong ki: namar U Trai U Blei jong phi u la ai noh ïa ki ha ka kti jong phi.”

²⁰ Te haba u Joshua bad ki khun Israel ki la wai ban pynïap ïa ki da ka jingpynïap bakhraw, ha ban da ki la duh noh khoit, bad ba kat kiba sah na ki, ki la rung ha ki nongbah ba la ker kynroh,

²¹ kumta, uta u paidbah baroh u la phai noh sha ka dara ha u Joshua ha Makkedah ha kaba suk: mano mano ruh ym shym la pynkhih ïa la u thylliej pyrshah ïa uwei na ki khun Israel.

²² Ynda kumta, u Joshua u la ong, “To plie ïa ka khmat ka krem, wallam ruh ïa kita san ngut ki syiem na kata ka krem ha nga.”

²³ Te ki la leh kumta, bad ki la wallam ïa kita san ngut ki syiem ha u na kata ka krem, u syiem ka Jerusalem, u syiem ka Hebron, u syiem ka Jarmuth, u syiem ka Lakhish, bad u syiem ka Eglon.

²⁴ Te haba ki la wallam noh ïa kita ki syiem ha u Joshua, u Joshua u la phah khot ïa uta u paidbah Israel baroh, bad u la ong ha ki rangbah ki paidïapom kiba la leit bad u, “Ale hajan, buh ruh ïa la ki poh'jat halor ki ryndang jong kine ki syiem.” Te ki la wan hajan, bad ki la buh ruh ïa la ki poh'jat halor ki ryndang jong ki.

²⁵ Bad u Joshua u la ong ha ki, “Wat sheptieng, lymne wat kyiuh; pynkhlaiñ ïa lade pynshlur bha ïa lade: naba kumne U Trai un leh ïa ki nongshun jong phi baroh ïa kiba phi ïaleh.”

²⁶ Hadien kata, u Joshua u la shoh ïa ki, bad u la pynïap ïa ki, bad u la sdien ïa ki ruh halor san tylli ki dieng: bad ki la sdien halor kita ki dieng haduh janmiet.

²⁷ Ka la jia ruh ha ka por ba ka sngi ka la sep, ba u Joshua u la hukum, bad ki la pynhiar ïa ki na kita ki dieng bad ki la bred ïa ki ha kata ka krem ha kaba ki la ïarieh, bad ki la buh ïa ki maw bakhraw ha khmat kata ka krem, kiba sah haduh kane ka sngi hi.

²⁸ Te ha kata ka sngi, u Joshua u la jop ïa ka Makkedah, bad u la pom ïa ka da ka syrti waitlam, bad ïa u syiem jong ka; u la pynduh khoit ïa ki bad ïa ki mynsiem baroh kiba ha ka, um shym pynsah shuh uwei ruh: bad u la leh ïa u syiem ka Makkedah kumba u la leh ïa u syiem ka Jerikho.

²⁹ Ynda kumta, u Joshua bad ki Israel baroh ryngkat bad u, ki la leit na Makkedah sha Libnah, bad u la ïaleh ïa ka Libnah:

³⁰ U Trai u la ai noh ïa ka ruh, bad ïa u syiem jong ka, ha ka kti ki Israel; bad u la pom ïa ka da ka syrti waitlam, bad ki mynsiem baroh ruh kiba ha ka; um shym pynsah shuh uwei ruh; bad u la leh ïa u syiem jong ka kumba u la leh ïa u syiem ka Jerikho.

³¹ Bad u Joshua u la leit na Libnah, bad ki Israel baroh ryngkat bad u, sha Lakhish, bad u la ker tawiar ïa ka, bad u la ïaleh ïa ka ruh:

³² bad U Trai u la ai noh ïa ka Lakhish ha ka kti ki Israel, kiba la jop ïa ka ha ka sngi ka ba-ar, bad ki la pom ïa ka da ka syrti waitlam, bad ki mynsiem baroh kiba ha ka, katba kum ïa baroh ba u la leh ïa ka Libnah.

³³ Ynda kumta, u Horam u syiem ka Geser u la wan kiew ban ïarap ïa ka Lakhish; bad u Joshua u la pom ïa u bad ïa ki briew jong u, haduh ba um shym pynsah shuh uwei ruh.

³⁴ Bad na Lakhish, u Joshua u la leit bad ki Israel baroh ryngkat bad u sha Eglon; bad ki la ker tawiar ïa ka, bad ki la ïaleh ïa ka;

³⁵ bad ki la jop ïa ka ruh ha kata ka sngi, bad ki la pom ïa ka da ka syrti waitlam, bad ïa ki mynsiem baroh kiba ha ka, u la pynduh khoit ha kata ka sngi, katba kum ïa baroh ba u la leh ïa ka Lakhish.

³⁶ Bad u Joshua u la leit kiew na Eglon bad ki Israel baroh ryngkat bad u sha Hebron; bad ki la ïaleh ïa ka:

³⁷ bad ki la jop ïa ka, bad ki la pom ïa ka da ka syrti waitlam, bad u syiem jong ka, bad ki shnong jong ka baroh, bad ki mynsiem baroh kiba ha ka; um shym pynsah shuh wat uwei ruh, katba kum ïa baroh ba u la leh ïa ka Eglon; namar u la pynduh khoit ïa ka, bad ïa ki mynsiem baroh kiba ha ka.

³⁸ Bad u Joshua u la phai noh, bad ki Israel baroh ryngkat bad u, sha Debir; bad ki la ïaleh ïa ka:

³⁹ u la jop ïa ka ruh bad ïa u syiem jong ka, bad ïa ki shnong jong ka baroh; bad ki la pom ïa ki da ka syrti waitlam, bad u la pynduh khoit ïa ki mynsiem baroh kiba ha ka; um shym pynsah shuh uwei ruh: kumba u la leh ïa ka Hebron, kumta u la leh ïa ka Debir, bad ïa u syiem jong ka; kumba u la leh ïa ka Libnah ruh, bad ïa u syiem jong ka.

⁴⁰ Kumta, u Joshua u la jop ïa ka ri baroh, ïa ka ri lum, bad ïa ka shathie, bad ïa ka ri them, bad ïa ki ranab lum, bad ïa ki syiem jong ki baroh; um shym la pynsah uwei ruh: hynrei, u la pynduh khoit ïa baroh kat kiba don mynsiem, kumba U Trai U Blei ki Israel, u la hukum.

⁴¹ Bad u Joshua u la pom ïa ki naduh Kadesh-barnea haduh Gasa, ka ri Goshen baroh ruh, haduh Gibeon.

⁴² Ïa kine ki syiem baroh bad ka ri jong ki u Joshua u la jop ha kajuh ka por, namar U Trai, U Blei ki Israel, u la ïaleh na ka bynta ki Israel.

⁴³ Hadien kata, u Joshua u la leit phai noh, bad ki Israel baroh ryngkat bad u, sha ka dara ha Gilgal.