JONAH 3 - KA BAIBL

Ka jingkylla-ka-bamut ka Ninebeh

¹ Bad ka ktien U Trai ka la wan ka ba-ar sien ha u Jonah, ka da ong,

² “To ïeng, to leit sha Ninebeh, kata ka nongbah kaba khraw, bad to ïathuhkhana ha ka, ïa ka jingïathuhkhana kaba ngan ong ma nga ha me.”

³ Kumta, u Jonah u la ïeng, bad u la leit sha Ninebeh katba kum ka ktien U Trai. Te ka Ninebeh ka la long ka nongbah bakhraw shibun eh, ka balai sngi lynti.

⁴ Bad u Jonah u la sdang ban rung shapoh ka nongbah shi sngi lynti, bad u la pyrta, bad u la ong, “Sa sawphew sngi, te ïa ka Ninebeh yn pynkyllon.”

⁵ Te ki nong Ninebeh ki la ngeit ïa U Blei; bad ki la pynbna ïa ka jingshah jingit, bad ki la phong da ki jaiñ byrni, naduh uba khraw tam jong ki haduh uba rit tam jong ki.

⁶ Te ka jingbna ka leit poi haduh u syiem ka Ninebeh, bad u la ïeng na la ka khet, bad u la buh noh ïa la ka jaiñkup syiem, bad u la tap ïa lade da ka jaiñ byrni, bad u la shong ha ka dpei.

⁷ Bad u la pynbna bad pyrta ïa ka Ninebeh, “Da ka hukum u syiem bad ki myntri jong u,” u da ong, “u briew lane u mrad, ki masi lane ki langbrot, kin ym mad ei ei: kin ym bam phlang, lane dih um:

⁸ hynrei, ai ban tap ïa ki da ki jaiñ byrni, bad briew bad mrad, bad ai ba kin pyrta kyang ha U Blei: shisha, ai ba kin phai noh uwei uwei baroh na la ka lynti basniew, bad na kata ka jingleh-jubor kaba ha ka kti jong ki.

⁹ Uei ba tip la U Blei un kylla ne em bad kylla-ka-bamut, bad phai noh na kata ka jingbitar lep jong u, ba ngin ym ïap noh?”

¹⁰ Bad U Blei u la ïohi ïa ki jingleh jong ki, ba ki la phai noh na la ka lynti basniew; bad U Blei u la kylla-ka-bamut na kata ka jingsniew, kaba u la ong ba un leh ïa ki; te um shym leh ïa ka.