JONAH 2 - KA BAIBL

Ka jingduwai u Jonah

¹ Ynda kumta, u Jonah u la duwai ha U Trai U Blei jong u na ka kpoh uta u dohkha,

² bad u la ong, “Nga la kyrpad ha U Trai namar ka jingjynjar jong nga, te u la phai ktien ha nga; na ka kpoh ka dujok nga la kyang, bad me la ïohsngew ïa ka ktien jong nga.

³ Naba me la bred noh ïa nga sha kaba jylliew, hapdeng ki duriaw, te ka jingshlei ka la ker tawiar ïa nga; ki jingat phyllung bad ki jingphaloh jong me baroh ki la tyllep ïa nga.”

⁴ Te nga la ong, “La shop noh ïa nga na khmat ki khmat jong me; pynban, ngan peit pat sha ka templ ka bakhuid jong me.

⁵ Ki um ki la ker sawdong ïa nga, jin haduh ka mynsiem; ka jingjylliew ka la don baroh sawdong ïa nga; u 'lang duriaw u la spaiñ ïa ka khlieh jong nga.

⁶ Nga la hiar haduh trai jong ki lum; ka khyndew bad la ki narkhang ka la set khop ïa nga junom: pynban, me la kyntiew ïa ka jingim jong nga na ka jingtep, A Trai U Blei jong nga.

⁷ Haba ka mynsiem jong nga ka la ïapler hapoh jong nga, nga la kynmaw ïa U Trai: bad ka jingduwai jong nga ka la rung sha me, sha ka templ ka bakhuid jong me.

⁸ Kita kiba bat ïa ki jingthala kiba lamler, ki kyntait ïa la ka jong ka jingisynei.

⁹ Hynrei, ma nga, ngan kñia ha me da ka jingsawa ka jingainguh; ngan siew ïa kata kaba nga la kular. Ka jingpynim ka long na U Trai.”

¹⁰ Te U Trai u la kren ha uta u dohkha, bad u la prie noh ïa u Jonah ha ka ryngkew.