JONAH 1 - KA BAIBL

U Jonah u phet rieh na khmat U Trai

¹ Te ka ktien U Trai ka la wan ha u Jonah u khun u Amittai, ka da ong,

² “To ïeng, to leit sha Ninebeh, kata ka nongbah kaba khraw, bad to pyrta pyrshah ïa ka; naba ka jingleh bymman jong ki ka la wan kiew ha khmat jong nga.”

³ Hynrei, u Jonah u la ïeng ban phet noh sha Tarshish na khmat U Trai; te u la leit hiar sha Joppa, bad u la shem ïa ka lieng kaba leit sha Tarshish; kumta, u la siew ïa ka bai lieng jong ka bad u la hiar sha ka, ïa ka ban leit lem bad ki sha Tarshish na khmat U Trai.

⁴ Hynrei, U Trai u la pynmih noh ïa ka lyer kaba jur sha ka duriaw, bad la don ka 'erïong kaba khraw ha ka duriaw, ba kumta ka lieng ka la imat kum ban sa pait.

⁵ Ynda kumta, ki riewlieng ki la sheptieng, bad ki la kyrpad uwei uwei baroh ïa la u blei; bad ki la bred noh sha ka duriaw ïa ki mar kiba ha ka lieng, khnang ban pynsting ïa ka, ïa lade. Hynrei, u Jonah u la lah hiar sha ki jaka ba kham shapoh jong ka lieng; bad u la thiah, bad u la ïohthiah lyngngai ruh.

⁶ Kumta, u rangbah lieng u la wan ha u, bad u la ong ha u, “Me mut aïu, ko nongthiah? To khie, to duwai ha U Blei jong me, ïoh lehse U Blei un kynmaw ïa ngi, ba ngin ym ïap.”

⁷ Te ki la ïa-ong paralok hi, “Ïa, ngin ïa-pynnoh ka jingkhalai, ba ngin ïoh tip namar jongno ba kane ka jingshitom ka don ha ngi.” Kumta, ki la pynnoh ka jingkhalai, bad kata ka jingkhalai ka la hap ha u Jonah.

⁸ Ynda kumta, ki la ong ha u, “To ïathuh ha ngi, ngi kyrpad ïa me, namar jongno kane ka jingshitom ka la wan ha ngi; kaei ka kam jong me? Bad nangno me wan? Kaei ka ri jong me? Bad ki briew jong me ka jaid aïu?”

⁹ U te u la ong ha ki, “Nga long u Hebru; bad nga sheptieng ïa U Trai, U Blei ka bneng, uba la thaw ïa ka duriaw bad ïa ka ryngkew.”

¹⁰ Ynda kumta, kita ki briew ki la sheptieng shikatdei, bad ki la ong ha u, “Kaei kane kaba me la leh?” Naba kita ki briew ki la tip ba u la phet na khmat U Trai, namar u la lah ïathuh ha ki.

¹¹ Te ki la ong ha u, “Ngin leh kumno ïa me, ba ka duriaw kan jai jai ïa ngi?” Naba ka jingkhih ka duriaw ka la nang jur nang jur.

¹² U te u la ong ha ki, “To shim ïa nga, bad to bred noh ïa nga sha duriaw; kumta keiñ ka duriaw kan jai jai ïa phi: naba nga tip ba namar jong nga kane ka 'erïong kaba jur ka don ha phi.”

¹³ La kumta ruh, kita ki briew ki la king tyngeh ïa ka ban leit phai pat sha ryngkew; hynrei, kim lah shuh: naba ka jingkhih ka duriaw pyrshah ïa ki ka la nang jur nang jur.

¹⁴ Namar kata, ki la kyang ha U Trai, bad ki la ong, “Ngi kyrpad ïa me, A Trai, ngi kyrpad ïa me, wat ai ba ngin ïap namar ka jingim une u briew, bad wat tei ka snam balui lui halor jong ngi: naba me A Trai, me la leh katba me la ibit.”

¹⁵ Kumta, ki la shim ïa u Jonah, bad ki la bred noh ïa u sha duriaw: te ka duriaw ka la long jai jai.

¹⁶ Ynda kumta, kita ki briew ki la sheptieng shibun ïa U Trai; bad ki la ainguh ïa ka jingkñia ha U Trai, bad ki la kular ki jingkular.

¹⁷ Te U Trai u la khreh ïa u dohkha uba khraw ban nguid ïa u Jonah; bad u Jonah u la don ha ka kpoh uta u dohkha lai sngi bad lai miet.