JOEL 3 - KA BAIBL

Ka jingbishar U Blei halor ki jaid bynriew

¹ “Naba ha khmih, ha kita ki sngi, bad ha kata ka por, haba ngan wallam pat ïa ka jingpynwir ki Judah bad Jerusalem,

² ngan lum ïa ki jaid bynriew baroh, bad ngan wallam ïa ki ha Ka Them u Jehoshaphat; te ngan ïasaid bad ki hangta na ka bynta la ki briew bad na ka bynta ki Israel kaba ka bynta jong nga, ïa kiba ki la pynsaphred hapdeng ki jaid bynriew, bad ki la ïasam ïa ka ri jong nga.

³ Te ki la ïakhalai ïa ki briew jong nga: ki la ai da u khynnah ïa ka nuti, bad ki la die ïa ka khynnah namar ka Waiñ, ba kin ïoh dih.

⁴ “Shisha ruh, phi ka Tyros, bad ka Sidon, bad ki phang ka Philistia baroh, phi long aïu ïa nga? phin leh kylliang ïa nga? bad lada phin leh kylliang ïa nga, ngan pynphai kloi bad stet ïa ka jingleh kylliang jong phi halor ka khlieh jong phi hi.

⁵ Namar ba phi la shim ïa ka rupa jong nga bad ka ksiar jong nga, bad ba phi la rah sha la ki ïing blei ïa kiei kiei kiba kor ba sngewbha jong nga;

⁶ ïa ki khun Judah ruh bad ki khun Jerusalem, phi la die noh ha ki khun Grik, khnang ba phin pynkynriah sha jngai ïa ki na la ka muluk ka jaka:

⁷ ha khmih, ngan pynkhih ïa ki, na kata ka jaka sha kaba phi la die noh ïa ki, bad ngan pynphai ïa ka jingleh kylliang jong phi halor ka khlieh jong phi;

⁸ te ngan die noh ïa ki khun shynrang jong phi bad ki khun kynthei jong phi ha ka kti ki khun u Judah, ki te kin die noh ïa ki ha ki nong Sheba, ha ka jaid bynriew kaba sha jngai:” naba U Trai u la kren ïa ka.

⁹ “To pynbna ïa kane hapdeng ki jaid bynriew; to khreh ïa ka thma: to pynkhih ïa ki rangbah bakhlaiñ; ai ki riewïapom baroh ba kin wan hajan, to kin ïakiew.

¹⁰ To shoh ïa la ki phar ban long ki waitlam, bad ïa ki wait khmut ban long ki sum: ai ba uba tlot un ong, ‘Nga khlaiñ.’

¹¹ “To pynkloi, ale, phi ki jaid bynriew baroh sawdong, to ïalum lang ruh:” to pynhiar ïa la kiba khlaiñ hangta, ko Trai.

¹² “Ai ki jaid bynriew kin pynkhih ïa lade, bad kin wan kiew sha Ka Them u Jehoshaphat: naba hangta ngan shong ïa ka ban bishar baroh ïa ki jaid bynriew kylleng sawdong.

¹³ “To suh ïa ka rashi, naba ka jingot ka la ih: ale, to ïuh; naba ka jingtylliat soh ka la dap, bad ki jingdiang soh ki la shlei; naba ka jingbymman jong ki ka la bun.”

¹⁴ Ki paidbah, ki paidbah ha ka them ka jingpynkut! naba ka sngi U Trai ka jan ha ka them ka jingpynkut.

¹⁵ Ka sngi bad u bnai ki la dum, bad ki khlur ki khang ïa la ka jingtyngshaiñ.

Ka jingpyllait im ïa ka Judah

¹⁶ Bad U Trai un kyrhuh na Seïon, bad un pynmih ïa la ka ktien na Jerusalem; bad ki bneng bad ka khyndew kin khih: hynrei, U Trai un long jaka rieh ïa la ki briew, bad ka kut baskhem ïa ki khun Israel.

¹⁷ “Kumta phin ïoh tip ba nga long U Trai U Blei jong phi, uba shong sah ha Seïon u lum bakyntang jong nga: ynda kumta, ka Jerusalem kan long ka bakyntang, bad yn ym don ki nongwei ki ban ïaid ïa ka shuh.

¹⁸ “Te kan jia ha kata ka sngi, ba ki lum kin pynjaw ïa ka Waiñ thiang, bad ki lum rit kin tuid da ka dud, bad ki wah duid ka Judah baroh kin tuid da ki um; bad ka umpohliew kan mih noh na ka ïing U Trai, bad kan ai um ïa Ka Them Shittim.

¹⁹ “Ka Ijipt kan long ka jingkynjah, bad ka Edom kan long ka khlaw bakynjah, namar kata ka jingleh-jubor ba la leh ïa ki khun Judah, namar ba ki la pynmih ïa ka snam balui lui ha ka ri jong ki.

²⁰ Hynrei, ka Judah kan ïaineh junom, bad ka Jerusalem pateng la pateng.

²¹ Bad ngan sait ïa kata ka snam jong ki kaba ngam pat la sait: naba U Trai u shong sah ha ka Seïon.”