JOEL 2 - KA BAIBL

¹ “To put ïa ka ronsing ha Seïon, to put ïa ka jingmaham ha u lum bakhuid jong nga; ai kin khynñiuh kiba shong ha ka ri baroh: naba ka sngi U Trai ka wan, naba ka la jan;

² ka sngi kaba dum bad baïong, ka sngi ki lyoh bad ka jingdum barben, kumba ka step phyrngab ka phriang halor ki lum; u paidbah u bakhraw bad u bakhlaiñ, ym shym don mynno mynno uba kat uta, lymne kan ym long shuh ruh hadien jong u, haduh ki snem pateng la pateng keiñ.

³ “Ka ding ka bam duh ha shuwa jong ki; bad hadien jong ki ka thylliej ding ka jliah: ka ri ha shuwa jong ki ka long kum ka kper Eden, bad hadien jong ki ka khlaw ba la pynsniew; te ym don ei ei ba la lait na ki.”

⁴ Ka jing-i jong ki ka kum ka jing-i ki kulai; bad kum ki nongshong kulai, kumta ki ïamareh.

⁵ Kum ka jingsawa ki kali ha khlieh ki lum ki ïarynsied, kum ka jingsawa ka thylliej ding kaba bam ïa u skum, kum u paidbah bakhlaiñ ba la buh riang ïa ka thma.

⁶ Ha khmat jong ki, ki paidbah ki pisa: ki khmat baroh ki thangïong.

⁷ Ki mareh kum ki rangbah bashait; ki kiew ïa ka kynroh kum ki riewïapom; ki ïaid uwei uwei baroh ha la ki lynti, bad kim ïabakla na la ki lynter.

⁸ Kim ïalymbub paralok; ki ïaïaid riang uwei uwei ha la ka jong ka lynti: bad ki ïatur lyngba ïa ki tiar ïapom, te kim ïabakla na la ka jingïaid.

⁹ Ki ïarynsied halor ka nongbah; ki ïamareh halor ka kynroh; ki kiew shapoh ki ïing; ki ïarung na ki jingkhang ïit kum u nongtuh.

¹⁰ Ka khyndew ka kyiuh ha khmat jong ki; ki bneng ki ïakhynñiuh: ïa ka sngi bad ïa u bnai la pyndum, bad ki khlur ki khang ïa la ka jingtyngshaiñ:

¹¹ te U Trai u pynmih ïa la ka ktien ha khmat la u paidïapom; naba u paid jong u, u khraw eh; naba uba khlaiñ uta uba pyndep ïa ka ktien jong u: naba ka sngi U Trai ka long kaba khraw bad kaba itieng eh; te uei ba lah ban shah ïa ka?

Ka jingisynei ka jong U Trai

¹² “La kumta ruh wat mynta hi,” ong U Trai, “to phai ha nga da la ka dohnud baroh, bad da ka jingshah jingit, bad da kaba ïam, bad kaba ïam sngewsih:

¹³ bad to kad ïa la ka dohnud, te ym ïa la ki jaiñkup,” bad to phai sha U Trai U Blei jong phi: naba u long uba aiei bad uba isynei lem, uba suki ban bitar, bad uba kynrei ha ka jingisynei, bad uba kylla-ka-bamut na ka jingpynsniew.

¹⁴ Uei ba tip la un phai noh ne em bad kylla-ka-bamut, bad un pynsah ka jingkyrkhu hadien jong u, wat ka jingainguh bam bad ka jingainguh dih ha U Trai U Blei jong phi?

¹⁵ To put ïa ka ronsing ha Seïon, to pynkyntang ïa ka jingshah jingit, to khot lang ïa ka jingïaseng bakyrpang:

¹⁶ to lum ïa u paidlang, to pynkyntang ïa ka jingïaseng, lum lang ïa ki tymmen, to lum ïa ki khynnah, bad ïa kita kiba dang buiñ: ai ba u nongleit-kurim un mih noh na la ka kamra, bad ka nongleit-kurim na la ka pulit.

¹⁷ Ai ba ki lyngdoh, ki shakri U Trai, kin ïam hapdeng ka khyrdop bad ka duwan, bad to kin ong, “To isynei ïa la ki briew, A Trai, bad wat buh ïa la ka bynta ban long ka jingrkhiebeiñ, ba ki jaid bynriew kin synshar halor jong ki: balei kin ïa-ong hapdeng ki jaid bynriew, ‘Hangno U Blei jong ki?’ ”

¹⁸ Ynda kumta, U Trai u la sngewskuiñ na ka bynta la ka ri, bad u la isynei ïa la ki briew.

¹⁹ Te U Trai u la ïathuh bad u la ong ha la ki briew, “Ha khmih, ngan phah Kew ha phi, bad ka Waiñ, bad ka umphniang, bad yn pynkdang ïa phi da kine: bad ngan ym pynlong ka jingrkhiebeiñ shuh ïa phi hapdeng ki jaid bynriew.

²⁰ “Hynrei, ngan pynkynriah sha jngai na phi ïa u paidïapom ka ri shatei, bad ngan beh noh ïa u sha ka ri kaba lyngki bad kaba kynjah, ka bynta kaba sha khmat jong u sha ka duriaw mihngi, bad ka bynta kaba shadien jong u sha ka duriaw sepngi; te ka jingiwkhong jong u kan kiew, bad ka jingiwtung jong u kan kiew, namar ba u la leh ïa kiei kiei kiba khraw.

²¹ “Wat sheptieng, ko pha ka ri, to sngewbha bad to leh kmen; naba U Trai u la leh ïa kiei kiei kiba khraw.

²² Wat sheptieng, phi ki mrad ha lum; naba ki jaka bam phlang ha ri khlaw ki ïamih, naba u dieng u sei la u soh, u dieng Dumbur bad u dieng Waiñ ki ïa-pynmih ïa la ka bor.

²³ “To ïasngewbha te, phi ki khun ka Seïon, bad to leh kmen ha U Trai U Blei jong phi: naba u ai ha phi ïa u slap uba shuwa ha ka jingthew kaba biang, bad u pynhap ïa u slap ha phi, u slap uba shuwa bad u slap uba khatduh, ha u bnai banyngkong.

²⁴ “Te yn pyndap ïa ki thiar da u Kew, bad ki jingdiang soh kin shlei da ka Waiñ bad ka umphniang.

²⁵ Bad ngan pynai pat ha phi kita ki snem kiba ki la bam u puit kluiñ, u 'ñiangdkoh, bad u puit bamphlang bad u puit khlam, u paidïapom bakhraw jong nga uba nga la phah hapdeng jong phi.

²⁶ “Bad phin ïoh bam kyrhai bad phin kdang, bad phin ïaroh ïa ka kyrteng U Trai U Blei jong phi, uba la leh phylla ha phi: bad yn ym pynlehrain ïa u paidbah jong nga lano lano ruh.

²⁷ Te phin ïoh tip ba nga long hapdeng ki Israel, bad ba nga long U Trai U Blei jong phi, bad ym don uwei pat: bad yn ym pynlehrain ïa u paidbah jong nga lano lano ruh.

Ka jingtheh noh buk ïa U Mynsiem halor ka doh baroh

²⁸ “Te kan jia hadien kata, ba ngan theh buk ïa la U Mynsiem halor ka doh baroh; bad ki khun shynrang bad ki khun kynthei jong phi kin ïathuhlypa, ki tymmen jong phi kin phohsniew ki jingphohsniew, ki samla jong phi kin ïohi ïa ki jingithuhpaw:

²⁹ bad halor ki shakri shynrang bad halor ki shakri kynthei ngan theh buk ïa la U Mynsiem ha kita ki sngi.

³⁰ “Bad ngan pyni ki jingphylla ha ki bneng bad ha ka khyndew, ka snam, ka ding, bad ki rishot tdem.

³¹ Ïa ka sngi yn pynkylla jingdum, bad ïa u bnai ka snam, ha ban sa wan kata ka sngi ka bakhraw bad ba-itieng jong U Trai.

³² Te kan long, ba uwei uwei baroh uba khot kyrpad ïa ka kyrteng U Trai yn pynim ïa u: naba ha u lum Seïon bad ha Jerusalem kin long kita kiba lait im, kumba U Trai u la ong, bad hapdeng kita ba la pynsah, kita ïa kiba U Trai u khot.